NGUMINNGINA TI GAGATANGEN—ANIA TI ARAMIDEM?

Agbalinka a Kontento

Mannakibagay dagiti tattao a kontento. No agbaliw ti situasionda, nalakada laeng nga ag-adjust depende iti adda a kuartada.

NO APAY A NAPATEG

Naobserbaran ti psychologist a ni Jessica Koehler a mas positibo dagiti kontento a tattao. Nakitana met a basbassit ti posibilidad nga umapalda. Isu a kaaduanna a naragragsak ken basbassit ti paka-stress-an dagiti kontento a tattao. Kinaagpaysuanna, awan met unay ti makukuarta ti dadduma a naragsak a tattao. Agpayso dayta lalo kadagidiay mangibilang a ti kapatgan ket dagiti banag a saan a magatang ti kuarta, kas iti ragsak a mariknada no kaduada dagiti kapamilia ken gagayyemda.

“Kontentotayo koman no adda taraon ken badotayo.”—1 Timoteo 6:8.

TI MABALINMO NGA ARAMIDEN

Saanka nga agikomkompara. No ikomkomparam ti simple a panagbiagmo iti kasla naluho a panagbiag ti sabali a tao, posible nga agbalinka a saan a kontento ken naapal pay ketdi. Kasta met, baka ti tao a pangikomkomparaam iti bagim ket saan met a talaga a nabaknang. Dadduma nga adu ti sanikuana ket nailumlom met gayam iti utang. Kuna ni Nicole a taga-Senegal: “Diak kasapulan ti adu a banag tapno agbalinak a naragsak. Gapu ta kontentoak, naragsakak latta uray no saanak a kas iti dadduma nga adu ti sanikuana.”

Padasem daytoy: Liklikam dagiti adbertismen wenno post iti social media a mangipakita iti kinabaknang wenno kinaluho ti biag ti dadduma.

“Uray no kasano kabaknang ti maysa a tao, ti biagna ket saan nga agdepende kadagiti adda kenkuana.”—Lucas 12:15.

Agbalinka a managyaman. Mas kontento dagiti tattao a managyaman. Kasta met, kaaduanna a saanda a marikna a kayatda ti maaddaan iti ad-adu a banag wenno saanda a panunoten a maikarida a maaddaan kadagita. Imbaga ni Roberton a taga-Haiti: “Ikagkagumaak a lagipen ti kinaimbag ti dadduma a tao kaniak ken iti pamiliak. Kalpasanna, ibagak kadakuada nga agyamyamanak unay iti inaramidda. Isursurok met iti anakko a lalaki a walo ti tawenna nga ag-thank you iti amin a maawatna.”

Padasem daytoy: Kada aldaw, isuratmo dagiti banag a pagyamyamanam. Kas pagarigan, mabalinmo nga isurat ti nasayaat a salun-at, naragsak a pamilia, pudno a gagayyem, wenno uray ti napintas nga ilelennek ti init.

“Inaldaw nga agpiesta daydiay naragsak ti pusona.”—Proverbio 15:15.

Saan a kanayon a nalaka ti agbalin a kontento. Ngem saan a sayang no ikagumaantayo. No pilientayo ti agbalin a kontento, pilpilientayo met ti agbalin a naragsak—banag a saan a magatang ti kuarta.