NGUMINNGINA TI GAGATANGEN—ANIA TI ARAMIDEM?

Agbalinka a Naparabur

No marigrigatanka a mangyanay iti adda a kuartam gapu ta nguminngina ti gagatangen, baka mariknam a saanen a kasapulan nga agbalinka a naparabur. Ngem no naparaburka latta, mabalin a makitamto a makatulong dayta kenka. Kayam ti mangted uray agtiptipidka.

NO APAY A NAPATEG

No naparaburtayo uray kadagiti simple a pamay-an, naragsaktayo ken dakkel ti kompiansatayo iti bagitayo. Kuna ti dadduma a doktor a makatulong ti panangted tapno nasalun-at ti bagi ken isiptayo. Kas pagarigan, mabalin a maksayan ti panagdandanagtayo, stress, ken uray ti sakit ken ut-ot ti bagitayo. Posible a bumaba pay ti presion ti daratayo ken naim-imas ti turogtayo.

“Naragragsak ti mangted ngem ti umawat.”—Aramid 20:35.

No mangtedtayo, kuarta man wenno aniaman a banag a kasapulan ti dadduma, mabalin a nalaklakanton para kadatayo ti umawat iti tulong no datayo ti agkasapulan. Kuna ni Howard a taga-England: “Agbirbirokkami ken ni baketko kadagiti gundaway a makatulong ken makaitedkami tapno inton dakami met ti matulongan, saankaminto a mabain ken saanmi a marikna a dadagsenkami.” Siempre, saan a namnamaen dagiti naparabur a tattao nga adda kasukat dagiti ar-aramidenda. Ngem mabalin a masubadandanto kadagiti pudno a gagayyem a nakasagana a tumulong kadakuada no agrigatda.

“Iyugaliyo ti mangted, tapno ikkandakayo dagiti tattao.”—Lucas 6:38.

TI MABALINMO NGA ARAMIDEN

Ibingaymo ti adda kenka. No bassit ti adda kenka, mabalin nga adda latta maitedmo, kas iti uray simple a makan. Ni Duncan ken ti pamiliana ket taga-Uganda. Uray no marigrigatda, maragragsakanda latta a mangted. Kuna ni Duncan: “Kada Domingo, awisenmi ken baketko iti balaymi ti maysa a bisita para iti simple a pannangan. Maragragsakankami a makadua ti dadduma a tattao.”

Siempre no mangtedka, masapul a balanseka. Saanka a mangted iti adu unay nga uray la agrigaten ti pamiliam.—Job 17:5.

Padasem daytoy: Iyawismo ti simple a makan wenno uray mainum laeng. No adda dagiti banag a saanmon a kasapulan, mabalinmo nga ipadawat dagita kadagiti gagayyemmo wenno kaarrubam a makausar ken makaapresiar kadagita.

Mangtedka iti dadduma pay a pamay-an. Saan a kanayon a kuarta ti kasayaatan a maitedmo iti dadduma. Kas pagarigan, maitedmo ti orasmo ken maipakitam a napategda kenka no adda aramidem a makatulong kadakuada. Posible nga agbalin a regalo uray dagiti sasaom! Isu nga ibagam no ania ti magusgustuam kadakuada ken no kasanoda kapateg kenka.

Padasem daytoy: Tumulongka iti dadduma kadagiti trabaho iti balayda, iti panagtarimaan, wenno iti dadduma pay a trabaho. Ikkam ti kard ti gayyemmo tapno agyamanka kenkuana, wenno iteksmo uray no ibagam laeng a malaglagipmo isuna.

No agbirbirokka kadagiti tsansa a makaitedka, agar-aramidka kadagiti oportunidad a pakagunggonaamto.

“Diyo liplipatan ti agaramid iti nasayaat ken ti mangibingay kadagiti bambanag nga adda kadakayo.”—Hebreo 13:16.

Agassawa a mangtultulong iti baket nga agdalus iti arubayanna. Ik-ikkan ida ti baket iti napudot a mainum bayat nga agkarkaraykay ken um-ummongenda dagiti bulong.