Masirib nga Ari Salomon

TIN-EDYER pay la idi ni Salomon idi nagbalin nga ari. Inayatna ni Jehova, ket sinurotna ti nasayaat a pammagbaga ni amana a David. Naay-ayo ni Jehova ken Salomon. Maysa a rabii kinunana kenkuana iti tagtagainep: ‘Salomon, aniat’ kayatmo nga itdek kenka?’

Iti daytoy, simmungbat ni Salomon: ‘Jehova a Diosko, ubingak unay, ket diak ammo ti agturay. Ikkannak ngarud ti kinasirib a mangituray iti ilim a siuumiso.’

Naragsakan ni Jehova iti inkalikagum ni Salomon. Gapuna kunana: ‘Gapu ta dimmawatka ti kinasirib ket saan a ti atiddog a biag wenno kinabaknang, ikkanka ti ad-adu a kinasirib ngem ti asinoman a nagbiagen. Ket ikkankanto ti kinabaknang ken dayag.’

Di nagbayag kalpasanna, dua a babbai ti immay ken Salomon nga adda nadagsen a parikutda. Inlawlawag di maysa a babai: ‘Siak ken daytoy a babai maymaysa a balay ti paggigiananmi. Nangipasngayak ti ubing a lalaki, ket dua nga aldaw kalpasanna isu met ti nagpasngay ti ubing a lalaki. Maysa a rabii natay ti anakna, ngem idi matmaturogak, innalana ti anakko ket sana insukat ti natay nga anakna.’

Iti daytoy kuna met daydiay maysa a babai: ‘Saan! Ti sibibiag nga ubing ti anakko, ket ti natay ti anakna!’ Ket nagsinnungbat dagiti babbai. Ania ngay ti aramiden ni Salomon?

Dimmawat ti kampilan, ket kunana: ‘Guduaenyo ti ubing, ket ikkanyo ti tunggal babbai ti sagkagudua!’

Ti pudpudno nga ina kunana: ‘Saan! Pangngaasiyo ta dikay patpatayen ti ubing. Itedyo la kenkuanan!’ Ngem daydiay maysa a babai kunana: ‘Dikay it-ited uray asinoman kadakami; sige, guduaenyo ketdi.’

Ket kuna ni Salomon: ‘Dikay papatayen ti ubing! Itedyo iti umuna a babai. Isu ti pudpudno nga inana.’ Ammo ni Salomon daytoy agsipud ta ti pudpudno nga ina ayatenna unay ti ubing nga isut’ situtulok a mangited kenkuanan iti maysa a babai tapno isut’ di mapapatay. Idi nangngegan ti umili daytoy, maragsakanda a maaddaan ti masirib nga ari.

Bayat ti panagturay ni Salomon, binendisionan ti Dios ti ili. Nawadwad ti taraon a makan. Nagsuot dagiti tattao ti nasasayaat a kawkawes ken naggigianda ti nasasayaat a balbalay. Nawadwad dagiti bambanag para ti tunggal maysa.