Talek iti Tulong ti Dios

ADU a ribu a tattao ti nagdaliasat manipud Babilonia a napan idiay Jerusalem. Ngem idi makagtengda, dakkel a rebba ti Jerusalem. Masapul a bangonen manen dagiti Israelitas ti amin a bambanag.

Maysa kadagiti immun-una a binangonda isu ti altar. Kalpasanna rinugianda a bangonen ti templo. Ngem dagiti kabusor nga aggigian kadagiti kabangibang binutbutengda dagiti Israelitas tapno agsardengda. Idi kuan dagitoy a kabusor nangpaaramidda ti baro a linteg a nairanta a mangpasardeng ti panagbangon.

Naglabas dagiti tawtawen. 17 a tawen kalpasan panagsubli dagiti Israelitas manipud Babilonia, imbaon ni Jehova da mammadtona a Hageo ken Zacarias nga ibaga a rugianda manen ti panagbangon. Nagtalek dagiti tattao ken Jehova, ket rinugianda manen a bangonen ti templo.

Gapu itoy, maysa nga opisial a Persas nga agnagan Tatanai immay ket sinaludsodanna ida no aniat’ karbenganda a mangibangon ti templo. Imbaga dagiti Israelitas kenkuana nga idi addada idiay Babilonia, kuna ni Ari Ciro kadakuada: ‘Inkay itan, idiay Jerusalem ket bangonenyo ti templo ni Jehova, a Diosyo.’

Nagsurat ni Tatanai idiay Babilonia ket sinaludsodna ken Ciro, a natay itan, no pudno nga imbagana dayta. Ti baro nga ari ti Persia ti nagsubalit. Imbagana a pudno a sinao ni Ciro dayta. Imbagana pay ken Tatanai a tulonganna dagiti Israelitas a mangbangon ti temploda. Iti uppat a tawen nalpasen ti templo.

Naglabas pay ti adu a tawtawen. Ngangngani 48 a tawtawen itan nanipud nalpas ti templo. Napanglaw dagiti tattao ti Jerusalem, ket ti siudad ken ti templo ti Dios di napintasen ti buyana. Idiay Babilonia, ni Israelita nga Esdras naammuanna maipapan ti pannakasapul a matarimaan manen ti templo ti Dios.

Gapu itoy, napan ni Esdras ken Artaxerxes, ari ti Persia, ket daytoy nagsayaat nga ari inikkanna ni Esdras ti adu a sagsagut nga isubli idiay Jerusalem. Ket, agangay 6,000 nga Israelitas ti nagkuna a tulonganda ni Esdras a mangawit kadagitoy a sagsagut idiay Jerusalem.

Nagadu a pirak ken balitok ken dadduma pay a napapateg a bambanag nga awitenda. Gapu itoy inawagan ni Esdras a sangsangkamaysa dagiti tattao, kas inka makita iti daytoy a retrato. Nagkararagda ken Jehova a salaknibanna koma ida manipud tattao a managdakdakes iti adayo a panagdaliasatda idiay Jerusalem.

Ket sinalakniban ni Jehova ida. Kalpasan ti uppat a bulan a panagdaliasatda, nakagtengda a sitatalged idiay Jerusalem. Saan kadi nga ipakpakita daytoy a salakniban ni Jehova dagidiay agtalek kenkuana a maipaay ti tulong?