Kasano nga Agbiagtayo ti Agnanayon

MAIBAGAM kadi no aniat’ basbasaen ti bassit nga ubing ken ti gagayyemna? Wen, isu Ti Librok dagiti Estoria ti Biblia. Ken basbasaenda dagiti estoria a basbasaem ita—“Kasano nga Agbiagtayo ti Agnanayon.”

Ammom kadi ti ad-adalenda? Umuna isut’ panangammotayo maipapan ken Jehova a Dios ken ni Jesu-Kristo no kayattayo ti agbiag ti agnanayon. Kuna ti Biblia: ‘Kastoy ti panagbiag ti agnanayon. Ammuem ti pudpudno a Dios, ken ni Jesu-Kristo, nga Anakna.’

Kasanotay a maammuan da Jehova ken ni Jesus? Maysa ket babaen ti panagbasa Ti Librok dagiti Estoria ti Biblia. Adu ti maibaga dayta kadakuada a dua, saan kadi? Ngem masapul nga ad-adu pay ti aramidentayo ngem basta panangbasa itoy a libro.

Makitam kadi ti maysa pay a libro iti datar? Isu ti Biblia. Pabasam kadagiti dadduma dagiti paset ti Biblia a nakaibasaran dagiti estoria daytoy a libro. Ibaga ti Biblia kadatayo amin a masapul a maammuantayo maipapan ti panagserbi iti Dios. Isu a daytat’ adalentayo a kanayon.

Ngem ti basta panangammo maipapan ken Jehova a Dios ken ni Jesu-Kristo saan nga umdas. Ammom kadi pay ti kasapulan, tapno magun-odantayo ti biag nga agnanayon?

Masapul nga agbiagtayo a maitunos iti bambanag a maadadaltayo. Malagipmo kadi ni Judas Iscariote? Isut’ maysa kadagiti 12 a pinili ni Jesus nga apostolesna. Adut’ ammo ni Judas maipapan ken Jesus ken ni Jehova. Ngem nagbalin a naagum ket liniputanna ni Jesus kadagiti kabusorna iti 30 a kapisi ti pirak. Gapuna dinto umawat ni Judas ti biag nga agnanayon.

Malagipmo ni Giezi? Iti Estoria 69 nakitatayo ti panaggustona a maaddaan ti luplupot ken kuarta a dina kukua. Isu a nagulbod tapno maalana dagitoy a bambanag. Ngem isut’ dinusa ni Jehova. Ket dusaennatayo met, no ditay agtulnog iti linlintegna.

Ngem adu ti naimbag a tattao a kanayon nga agserserbi a simamatalek ken Jehova. Ni ubing a Samuel nagsayaat nga ulidan a suroten. Malagipmo, nakitatay idiay Estoria 55 nga uppat wenno lima a tawenna laeng idi nagserbin idiay tabernakulo. Isu nga uray kasano ti kinaubingmo, saanka nga ubing unay tapno agserbi ken Jehova.

Siempre, daydiay kayattay amin a suroten isu ni Jesu-Kristo. Uray idi isut’ ubing, kas naipakita iti Estoria 87, sarsaritaennan kadagiti dadduma maipapan ti nailangitan nga Amana. Tuladentayo ti ulidanna. Ibagatayo iti adu a tattao maipapan ti nakaskasdaaw a Diostayo a ni Jehova ken ti Anakna, a ni Jesu-Kristo. No aramidentayo dagitoy a bambanag, iti kasta makapagiantayto nga agnanayon idiay baro a paraiso ti Dios ditoy daga.