Kapitulo 22

Itultuloyyo nga Iyebkas ti Sao ti Dios a Situtured

1. (a) Ania a naimbag a damag ti inwaragawag dagiti adalan ni Jesus nangrugi idi Pentecostes ti 33 K.P., ngem aniat’ reaksion dagiti agtuturay ken panglakayen dagiti Judio? (b) Ania a salsaludsod ti mabalin isaludsodtayo iti bagbagitayo maipapan iti daytoy?

DAGITI kapapatgan unay a paspasamak iti nasurok nga 4,000 a tawtawen iti historia ti tao ti nalpasdan. Ti mismo nga Anak ti Dios, a ni Jesu-Kristo, ti napulotanen kas ti masanguanan nga Ari iti intero a daga. Nupay napapatay ni Jesus babaen ti panangsugsog dagiti narelihiusuan a kabkabusor, pinagungar ni Jehova ti Anakna manipud kadagiti natay. Babaen kenkuana posible ti biag nga agnanayon kas kalat. Ngem idi inwaragawag dagiti matalek nga adalan ni Jesus daytoy naimbag a damag iti publiko, bimtak ti narungsot a pannakaidadanes. Umuna, dua kadagiti apostoles ti naipalladaw iti pagbaludan, kalpasanna isuda aminen. Nababaotda ken naibilin kadakuada nga isardengdan ti agsasao babaen iti nagan ni Jesus. (Ara. 4:1-3, 17; 5:17, 18, 40) Ania ngay ita ti aramidenda? Ania koma met ti inaramidyo? Intultuloyyo koma aya ti nangaskasaba a situtured?

2. (a) Ania pay a nakaskasdaaw a damag ti kasapulan nga iwaragawagtayo kadagitoy nga al-aldawtayo? (b) Asino ti addaan responsabilidad a mangaramid iti dayta?

² Idi tawen 1914 K.P. napasamak ti ad-adda manen a nakaskasdaaw a banag nga addaan sapasap a kinapategna. Ti Pagarian ti Dios kadagiti im-ima ni Jesu-Kristo ti naipasdeken kadagiti langlangit. Sumaganad, ni Satanas ken dagiti demoniona ti naigarangugongda ditoy daga. (Apoc. 12:1-5, 7-12) Dagiti maudi nga al-aldaw ti agdama a dakes a sistema ti nangrugin. Sakbay a matay ti kaputotan a nakaimatang kadagiti paspasamak ti 1914, burakburaken ti Dios ti intero a sistema dagiti bambanag ni Satanas. (Mat. 24:34) Adda iti sanguanan dagiti makalasat ti namnama ti biag nga awan inggana. Kas kaitungpalan ti orihinal a panggep ti Dios, ti intero a daga ti agbalinton a Paraiso. No inabrasayon daytoy naimbag a damag, addaankayo met ti responsabilidad a mangiranud iti dayta kadagiti dadduma. (Mat. 24:14) Ngem ania a sungbat ti inkay manamnama?

3. (a) Kasano ti panangawat dagiti tattao iti mensahe ti Pagarian? (b) Gapuna, ania a saludsod ti masapul nga intay sanguen?

³ Nupay dadduma a tattao abrasaendakayo a sibabara kas manangiwaragawag ti Pagarian, ti kaaduan ti aleng-alengda laeng. (Mat. 24:37-39) Mabalin a dadduma ti manglais wenno mangbusor a sipapait kadakayo. Namakdaar ni Jesus a dadduma nga ibubusor ti mabalin nga aggapu kadagiti mismo a kabagianyo. (Luc. 21:16-19) Mabalin a dayta met ti masabatyo iti pagtrabahuanyo wenno idiay eskuelaan. Iti adu a paspaset ti daga dagiti Saksi ni Jehova ti naikabilda pay iti di nainkalintegan a panangiparit ti gobierno. No naipasangokayo iti maysa wenno amin kadagita a sirkumstansia, itultuloyonto pay met laeng aya nga iyebkas ti Sao ti Dios a situtured?

4. Ti kadi personal a determinasion ipasigurona ti panagtultuloytayo nga agserbi iti Dios a simamatalek?

⁴ Awan duadua, kayatyo ti agbalin a maingel nga adipen ti Dios. Kaskasdi, dadduma kadagidiay nagkuna nga awan ti mabalin a mangpasanud kadakuada ti awandan iti ranggo dagiti manangiwaragawag ti Pagarian. Maisupadi iti dayta, dadduma, agraman tattao a medio managbabainda, ti agtultuloyda kas nareregta nga ad-adipen ti Dios. Kasanoyo a paneknekan kas maysa a makapagtakder “a sititibker iti pammati”?​—1 Cor. 16:13.

Di Agpannuray iti Bukodyo a Pigsa

5. (a) Tapno mapaneknekantay ti bagbagitayo kas matalek nga ad-adipen ti Dios, ania ti pamunganayan a kasapulan? (b) Apay a nasken unay dagiti panaggigimong?

⁵ Siempre, adu a bambanag ti nairaman iti panagbalin a matalek nga adipen ti Dios. Ngem kangrunaan kadakuada amin isut’ panagpannuray ken Jehova ken kadagiti saganana. Kasanot’ panangipakitatayo ti kasta a panagpannuray? Ti maysa ket babaen ti itatabunotayo iti panaggigimong ti kongregasion. Igunamgunam ti Kasuratan kadatayo a ditay ida a liwliwayan. (Heb. 10:23-25) Dagidiay nagtultuloy a matalek a saksi ni Jehova, iti imatang man ti publiko a panangiyaleng-aleng wenno panangidadanes, ti naagawada iti regular nga itatabunoda iti panaggigimong a kadua dagiti padada a managdaydayaw. Kadagitoy a panaggigimong ti pannakaammotayo kadagiti Kasuratan ti maparang-ay, ngem saan laeng a ti pannakakayaw kadagiti baro a bambanag ti mamagtipon kadatayo. (Idiligyo iti Aramid 17:21.) Ti panangapresiartayo kadagiti nalawagen a kinapudno ti dumakkel, ket ti pannakaawattayo kadagiti pamay-an a panangusar kadakuada ti tumadem. Ti ulidan nga impakita kadatayo ni Jesus ti maipasagepsep met unay iti isip ken pusotayo. (Efe. 4:20-24) Agbalintayo a nasinged kadagiti kakabsattayo a Kristiano iti nagkaykaysa a panagdayaw ket personal a mapapigsatayo nga agtultuloy a mangaramid ti pagayatan ti Dios. Ti espiritu ni Jehova ti mangipaay ti panangiwanwan babaen iti kongregasion, ket babaen iti dayta nga espiritu ni Jesus ti adda iti nagtetengngaantayo no agtataripnongtayo iti naganna.​—Apoc. 3:6; Mat. 18:20.

6. Idiay luglugar a maiparit dagiti Saksi ni Jehova, aniat’ maar-aramidan maipapan iti panaggigimong?

⁶ Regularkay met laeng aya a tumabtabuno iti amin a panaggigimong ken iyap-aplikaryo met laeng aya a personal ti mangmangngegyo a mapagsasaritaan sadiay? No maminsan, no adda iti pannakaiparit, nesesita ti panagtataripnong iti babassit a grupo kadagiti pribado a pagtaengan. Ti luglugar ken oras ti mabalin a masukatsukat ket mabalin a saan a kanayon a kumbiniente dayta, dadduma a panaggigimong ti maang-angay uray ngangngani tengnga ti rabiin. Ngem, agpapan pay peggad wenno saan a kinakumbiniente iti personal, dagiti matalek a kakabsat a lallaki ken babbai ti mangipapaayda ti napasnek a panagregget nga adda iti tunggal panaggigimong.

7. (a) Kasano pay ti panangidemostratayo ti panagpannuraytayo ken ni Jehova? (b) Kasano a matulongannatay daytoy nga agtultuloy nga agsao a situtured?

⁷ Ti panagpannuray ken Jehova ti maipakita met babaen ti regular a panagturong kenkuana iti kararag​—saan a kas maysa laeng a pormal a gagangayen a banag, no di ket addaan ti naimpusoan a pannakaawat a kasapulantayo ti tulong ti Dios. Ar-aramidenyo aya dayta? Maulit-ulit a nagkararag ni Jesus bayat ti naindagaan a ministeriona. (Luc. 3:21; 6:12, 13; 9:18, 28; 11:1; 22:39-44) Ken idi rabii sakbay ti pannakailansana inggunamgunamna kadagiti adalanna: “Agpuyatkayo ket agkararagkayo, tapno dikay sumrek iti pannakasulisog.” (Mar. 14:38) No maipasangotayo ti kasta unay a panangiyaleng-aleng iti mensahe ti Pagarian, mabalin nga adda sulisog a kumapuytayo iti ministeriotayo. No lalaisendatayo dagiti tattao wenno no adda pay nakaro unay a pannakaidadanes, mabalin a masulisogtayo nga agulimek tapno maliklikantay dayta. Ngem no agkararagtayo a sipapasnek a dumawat iti espiritu ti Dios tapno matulongantayo nga agtultuloy nga agsao a situtured, masaluadantayo iti pannakatnagtayo iti pannakasulisog.​—Luc. 11:13; Efe. 6:18-20.

Ti Rekord ti Maingel a Panangaskasaba

8. (a) Apay a ti rekord iti libro Dagiti Aramid makapainteres unay kadatayo? (b) Sungbatanyo dagiti salsaludsod a naikabil iti murdong daytoy a parapo, nga ipagpaganetget no kasano a ti impormasion ti makagunggona kadatayo.

⁸ Ti rekord a linaon ti libro Dagiti Aramid ti makapainteres unay kadatayo. Ibaga dayta kadatayo no kasano a dagiti apostoles ken dadduma kadagiti immuna nga ad-adalan, tattao a parpareho ti rikriknada kas kadatayo, ti naparmekda dagiti adu a lapped ket pinaneknekanda nga isuda dagiti natured ken matalek a saksi ni Jehova. Sukimatentayo ti maysa a paset dayta a rekord babaen iti tulong dagiti sumaganad a salsaludsod ken dagiti naisitar a kasuratan. Bayat nga ar-aramidentay dayta, usigenyo no kasano a personal a nagunggonaankayo manipud iti adda a nabasayo.

Tattao aya a nangangato ti adal dagiti apostoles? Tattaoda aya a sigud nga awan butengda, uray aniat’ mapaspasamak? (Ara. 4:13; Juan 18:17, 25-27; 20:19)

Aniat’ nakatulong ken Pedro a nagsao a situtured iti sanguanan ti pagukoman a Judio a nangkondenar iti mismo nga Anak ti Dios sumagmamano a lawas sakbay daytoy? (Ara. 4:8; Mat. 10:19, 20)

Aniat’ ar-aramiden dagiti apostoles kadagiti lawas sakbay a naisangoda iti Sanhedrin? (Ara. 1:14; 2:1, 42)

Idi binilin ida dagiti agtuturay nga isardengdan ti panangaskasabada babaen iti nagan ni Jesus, aniat’ insungbat da Pedro ken Juan? (Ara. 4:19, 20)

Kalpasan iti pannakaibulosda, iti siasino manen ti tinaliawda a maipaay iti tulong? Indawdawatda aya a pasardengennan ti pannakaidadanesda, wenno ania? (Ara. 4:24-31)

Babaen iti ania a pamay-an a nangted tulong ni Jehova idi pinadpadas dagiti bumusbusor a pasardengen ti trabaho a panangasaba? (Ara. 5:17-20, 33-40)

Kasano nga impakita dagiti apostoles a naawatanda ti rason ti pannakaispalda? (Ara. 5:21, 41, 42)

Uray pay idi adu kadagiti adalan ti nawarawara gaput’ nabara a pannakaidadanes, aniat’ intultuloyda nga aramiden? (Ara. 8:3, 4; 11:19-21)

9. (a) Ania a makaparagsak a resulta ti pinataud ti ministerio dagidiay immuna nga ad-adalan? (b) Kasano a nairamantayo?

⁹ Ti aramidda maipapan iti naimbag a damag ti saan nga ubbaw. Agarup 3,000 nga adalan ti nabautisaran idi Pentecostes ti 33 K.P. “Ket dagidi mammati iti Apo umaduda la nga umadu, adu unay a lallaki ken kasta met dagiti babbai.” (Ara. 2:41; 4:4; 5:14) Idi agangay naipadamag metten nga uray daydi maysa kadagiti kapudotan a manangidadanes, ni Saulo ti Tarso, ti nagbalin metten a Kristiano ket isu a mismo ti situtured a mangikaskasaban iti kinapudno. Isut’ nagbalinen a ni apostol Pablo. (Gal. 1:22-24) Ti trabaho a nangrugi iti umuna a siglo ti saan a nagsardeng. Daytat’ pimmartak kadagitoy “maudi nga al-aldaw” ket dimmanonen iti amin a paset ti daga. Addaantayo ti pribilehio a makiramraman met iti dayta, ket bayat nga ar-aramidentayo dayta makaadaltayo met manipud iti ulidan nga ipakpakita dagiti nasungdo a sasaksi a nagserserbi nga immun-una ngem kadatayo.

10. (a) Ania dagiti gundaway nga inusar ni Pablo a panangasaba? (b) Kadagiti ania a pamay-an nga iranranudyo met ti mensahe ti Pagarian kadagiti sabsabali?

¹⁰ Idi naadalen ni Pablo ti kinapudno maipapan ken Jesu-Kristo, saanna nga intantan dayta. “Ket dagus . . . inkaskasabana ni Kristo, nga Isu ti Anak ti Dios.” (Ara. 9:20) Inapresiarna ti di kaikarian a kinamanangaasi ti Dios kenkuana ket nabigbigna a tunggal maysa kasapulanna ti naimbag a damag nga inawatna met. Sigun iti ugali kadagidiay nga al-aldaw, yantangay isut’ maysa a Judio napan kadagiti sinagoga, nga isut’ lugar a pagtataripnongan iti publiko dagiti Judio, tapno mangted pammaneknek. Isut’ nangaskasaba met kadagiti binalaybalay ken nakirinnason kadagiti tattao uray idiay paglaklakuan. Ken isut’ situtulok a mapan kadagiti baro a teritoria tapno ipablaak ti naimbag a damag sadiay.​—Ara. 17:17; 20:20; Roma 15:23, 24.

11. (a) Kasanot’ panangipakita ni Pablo a, nupay isut’ natured, isu met ti mannakaawat iti wagas a panangaskasabana? (b) Kasanotay met a maisarming dayta a kualidad no mangaskasabatayo kadagiti kabagiantayo, katrabahuantayo wenno kaeskuelaantayo?

¹¹ Ni Pablo ti natured, ngem isu met ti mannakaawat, kas rebbengtayo. Kadagiti Judio isut’ nagapelar sigun kadagiti karkari nga inaramid ti Dios kadagidi ammada. Kadagiti Griego isut’ nagsao babaen kadagiti bambanag a pagaammoda. No dadduma inusarna ti mismo a kapadasanna a nakaadal ti kinapudno kas pamay-an a mangted pammaneknek. Ken inlawlawagna: “Ket aramidek amin a banag gapu iti naimbag a damag, tapno manangiramanak iti dayta kadagiti dadduma.”​—1 Cor. 9:20-23; Ara. 22:​3-21.

12. (a) Nupay natured, aniat’ inaramid ni Pablo tapno maliklikanna ti panangipilit ti masansan a panagsasango kadagiti bumusbusor? (b) Kaano ti mabalin a panangtuladtayo a nainsiriban iti dayta nga ulidan, ken kasano? (c) Manipud sadino ti naggapuan ti pannakabalin tapno makapagtultuloy nga agsao a situtured?

¹² Idi pinagparang ti ibubusor a nasaysayaat ti panangikaskasaba ti naimbag a damag iti sabali a luglugar wenno tapno umakar iti sabali a teritoria iti apagbiit, inaramid ni Pablo daytoy imbes nga ipilit ti masansan a panagsasango kadagiti kabkabusor iti kinapudno. (Ara. 14:5-7; 18:5-7; Roma 12:18) Ngem nikaanoman isut’ saan a mabalin gapu iti naimbag a damag. (Roma 1:16) Nupay nakita ni Pablo ti nagubsang, uray pay ti naranggas, a panangtrabaho dagiti kabkabusor a di makaay-ayo, kunana “timmuredkami a sitatalek iti Diostayo” tapno maitultuloyna ti panangaskasaba. Nupay nastrekna dagiti naririgat a sirkumstansia, kunana: “Ngem ti Apo kimmappon kaniak ket pinapigsanak, tapno gapu kaniak mairingpas koma a naan-anay ti panangaskasaba.” (1 Tes. 2:2; 2 Tim. 4:17) Ti ulo ti kongregasion Kristiano, ni Apo Jesus, ti nagtultuloy a mangmangted ti pannakabalin nga isut’ kasapulan a mangiringpas iti trabaho nga impadtona nga agpaay kadagiti kaaldawantayo.​—Mar. 13:10.

13. Aniat’ mangted pammaneknek iti Nakristianuan a kinatured, ket ania ti pakaibatayan dayta?

¹³ Addaantay amin a rason a mangitultuloy a mangisasao iti Sao ti Dios a situtured, kas ti inaramid ni Jesu-Kristo ken dagiti dadduma kadagiti matalek nga ad-adipen ti Dios idi umuna a siglo. Saan a kayat a sawen daytoy nga agbalintayo a nagubsang wenno natangsit iti pamay-antayo. Saan a kasapulan ti panagbalin nga awan konsiderasionna wenno ipapilit ti mensahe kadagidiay madi umawat iti dayta. Ngem saantay a sumuksuko gapu laeng ta dagiti tattao ti aleng-alengda, ket ditay met agbuteng nga agturong iti kinaulimek gaput’ ibubusor. Kas ken Jesus, itudotayo ti Pagarian ti Dios kas ti nainkalintegan a gobierno nga agpaay iti intero a daga. Agsaotayo nga addaan talek agsipud ta ireprepresentartayo ni Jehova, ti Soberano ti Uniberso, ket ti mensahe nga iwarwaragawagtayo saan a naggapu kadatayo no di ket kenkuana.​—Fil. 1:27, 28; 1 Tes. 2:13.

Repaso a Pagsasaritaan

● Apay a nasken ti panangiranudtayo ti mensahe ti Pagarian iti isuamin nga inggat’ mabalin? Ngem ania a tignay ti namnamaentayo?

● Kasanotay nga ipakita a saantayo a padpadasen ti agpannuray iti mismo a pigsatayo iti panagserserbi ken ni Jehova?

● Ania a napapateg a leksion ti maadaltayo manipud libro Dagiti Aramid?