Kapitulo 15—Pannakailasat Agturong ti Baro a Daga
Pananglasinlasin kadagiti Tattao iti Isyu ti Pagarian
1. Apay a ti panangilasinlasin maipaay iti isyu ti Pagarian maysa a nakapatpateg a banag para iti tunggal maysa kadatayo?
TUNGGAL maysa kadatayo napasanguan iti narikut a pangngeddeng. Ti isyu isu ti kababalintayo iti Mesianiko a Pagarian ni Jehova kadagiti im-ima ni Jesu-Kristo. Maipapan iti daytoy nga isyu a maar-aramid ti pannakalasinlasin dagiti tattao iti amin a nasnasion. Maibatay iti panagtignay ti tunggal tao isut’ maikabil iti maysa kadagiti dua a grupo. Maymaysa laeng kadagitoy a grupo ti makalasat iti umadanin a pannakadadael ti lubong.—Mateo 24:40, 41.
2. (a) Kasano a daytoy a Mesianiko a Pagarian mainaig iti isyu iti kinasoberano ni Jehova? (b) Ania ti mabiiten a pagbalinanto ti Pagarian, gapuna ania koma ti serioso a pampanunotentayo?
2 Impatugawen ni Jehova iti trono ti napulotan nga Anakna, ti Mesiasna, kadagiti langlangit. Iti panungpalan ti “naituding a panawen dagiti nasnasion” idi 1914, inted ti Dios ken Jesu-Kristo dagiti nasnasion kas tawidna—ti isuamin a daga kas ti sanikuana. (Salmo 2:6, 8) Ti Mesianiko a gobierno, a ti napulotan nga Ari ni Jehova ti nakatugaw iti trono, isu ti pamay-an ti Dios a mangibanag iti nasirib ken naayat a panggepna maipapan iti daga. Ti kababalinyo maipapan iti Pagarian, ngarud, ipakitananto no kasano ti panagriknayo maipapan iti sapasap a kinasoberano ni Jehova. Din agbayag dayta a Mesianiko a Pagarian “burakennanton ken ipatinggananton” ti intero a napolitikaan a sistema a mangiturturayen kadagiti ar-aramid ti tao ket agbalinton a maymaysa a gobierno a mangituray iti isuamin a daga. (Daniel 2:44; Apocalipsis 19:11-21) Inton pagbalinennan ti daga a Paraiso, sadinonto ti ayanyo? Maysakayto kadi kadagidiay a maiturturong iti dayta a mangtagiragsakto iti naan-anay a biag? Imbaga ni Jesus ti pakaibatayan ti pannakiraman dagiti sibibiag a tattao itan iti kasta a namnama.
TI ARI KEN DAGITI “KAKABSATNA”
3. Idiay Mateo 25:31-33, ania ti dineskribir ni Jesus?
3 Idi imbagana kadagiti apostolesna ti maipapan “iti panungpalan ti sistema dagiti bambanag,” nangusar ni Jesus iti sumagmamano a pangngarig, wenno ilustrasion. Iti maudi kinunana: “Ngem intono ti Anak ti tao umayto agraman iti dayagna, ken amin dagiti anghel maikuyogda kenkuana, isu ti panagtugawnanto iti trono ti gloriana. Ket iti sanguananna, maurnongto dagiti isuamin a nasion, ket paglalasinennanto dagiti maysa ken maysa kadagiti tao, a kas iti pastor ilasinna dagiti karnero kadagiti kalding. Ket isaadnanto dagiti karnero iti makanawanna, ket dagiti kalding iti makatigidna.”—Mateo 24:3, 25:31-33.
4. (a) Kasano a mainaig daytoy a padto iti Daniel 7:13, 14? (b) Aniada a salsaludsod ti makagunggona nga imtuodentayo kadagiti bagbagitayo?
4 Paliiwenyo a saritaen ni Jesus ditoy ti bagina kas “ti Anak ti tao,” kas ti inaramidnan a maulit-ulit iti nasaksakbay iti daytoy a padto. (Mateo 24:27, 30, 37, 39, 44) Ti panangusarna iti daytoy nga ebkas ket maysa a mangipalagip iti naimpadtuan a sirmata a naited ken Daniel ngangngani innem a siglon a nasaksakbay, isu a maipapan iti dayta nagsurat ti mammadto: “Nakitak kadagiti parparmata iti rabii, ket adtoy! immay babaen kadagiti ul-ulep ti langit ti maysa a kas la anak ti tao [ni Jesu-Kristo]; ket dimteng ti Dati a Lakay [ni Jehova a Dios], ket isu inyasidegda iti saklangna. Ket isu naikkan iti panagturay ken dayag ken maysa a pagarian, nga amin dagiti il-ili, nasnasion, ken pagsasao agserbida koma kenkuana. Ti panagturayna agnanayon a panagturay a dinto mapalabas, ket ti pagarianna dinto maduprak.” (Daniel 7:13, 14; Hebreo 2:5-8) Dayta nga panagturay naiteden ken Jesu-Kristo. Nanipud 1914 isut’ agturturayen iti nailangitan a tronona. Nagtignaykayo kadin a personal iti panagturayna? Ti kadi pamay-an ti panagbiagyo paneknekanna ti umiso a panagraem iti Daydiay inaramid ti Dios a mismo nga Agturay iti isuamin a daga?
5. Kasano ti panangikeddeng ni Kristo iti kinapudno ti panagkuna ti maysa a kinapasnekna kenkuana kas Ari?
5 Dagiti basta sasao laeng saanda nga umdas. Nalaka laeng a kunaen ti maysa a tao nga isut’ mamati iti Pagarian ti Dios ken inay-ayatna ni Jesu-Kristo. Ngem iti pangngarigna iti karnero ken kalding impakita ni Jesus nga, agsipud ta isut’ di makita kadagiti langlangit, ti napateg a banag nga iramanna iti panangikeddengna iti kinapudno ti panamati ken panagayat ti maysa a tao isu ti panangtrato kadagidiay a mangibagi ken Kristo ditoy daga, dagiti “kakabsatna.”—Mateo 25:40, 45.
6. Siasino dagitoy a “kakabsat” ni Kristo?
6 Siasino dagitoy? Dagidiay a pinili ti Dios manipud sangatauan a makipagtawid ken Kristo iti nailangitan a Pagarian. Dagitoy adda bilangda a 144,000, nga adda laengen natda pay ditoy daga. (Apocalipsis 14:1, 4) Agsipud ta dagitoy “naiyanakda manen” babaen ti panagtignay ti espiritu ti Dios, dagitoy ket annak ti Dios, ket gapu itoy a rason masasaoda iti Kasuratan kas “kakabsat” ni Jesu-Kristo. (Juan 3:3; Hebreo 2:10, 11) Ipateg ni Jesus ti aramiden dagitoy a tattao kadagitoy “kakabsatna,” uray pay “iti kabassitan” kadakuada, a kas inaramidda kenkuana.
7. Apay a dagiti “kakabsat” ni Kristo saanda a miembro iti ig-iglesia ti Kakristianuan?
7 Sadino ti ayan dagitoy a “kakabsat” ni Kristo iti kaaldawantayo? Masarakanyo kadi ida kadagiti mannakimisa iti Kakristianuan? Bueno, ania ti kinuna ni Jesus maipapan kadagiti pudno a paspasurotna? “Saanda a paset ti lubong, a kas kaniak saanak a paset ti lubong.” (Juan 17:16) Kasta kadi ti maikuna kadagiti ig-iglesia ti Kakristianuan ken kadagiti miembroda? Kaaduanna, ti kababalinda ken ug-ugalida isarmingna laeng dagidiay a gagangayen iti paset iti lubong a pakasarakan kadakuada. Nalataken ti pannakairaman dagiti ig-iglesia iti politika. Idi naaramid ti United Nations Charter idi 1945, dagiti delegado ti Protestante, Katoliko ken Judio addada sadiay kas pagkonsultaan. Kadagiti nabiit pay a tawtawen, dagiti papa ti Roma indayawda ti Naciones Unidas kas “ti maudi a namnama iti panagkaykaysa ken talna” ken “ti katan-okan a tribuna iti talna ken kinahustisia.” Ti World Council of Churches, nga addaan iti miembro nga agarup 300 a relihiuso a grupo, nangipaayda pay kadagiti pundo a manggasto kadagiti napolitikaan a rebolusion. Ngem, ni Jesu-Kristo imbagana iti gobernador ti Roma a ni Pilato: “Ti pagariak saan a paset daytoy a lubong.”—Juan 18:36.
8. (a) Ania ti nakatulong kadakayo a mangilasin kadagiti “kakabsat” ni Kristo? (b) Kasano kapateg kadakuada ti trabaho a panangikasaba iti Pagarian?
8 Dagiti kinapudno ipakitada a maymaysa laeng a grupo ti nangala iti natibker a takder a maipaay iti Pagarian, a sipipinget a mangikagkagumaan a mangiwaragawag iti dayta iti sangalubongan, bayat ti panangliklikda iti pannakiraman iti aniaman a kita ti napolitikaan nga ar-aramid daytoy a lubong. Daytoy a grupo isu dagiti Saksi ni Jehova. Kadakuada masarakan dagiti natda kadagiti “kakabsat” ni Kristo. Kas panangtulad iti Apoda ken kadagiti apostolesna, dagitoy impaayda ti bagbagida a mapan kadagiti siudad ken iti balaybalay, a mangipakpakaammo kadagiti tattao ti naimbag a damag ti Pagarian ti Dios. (Lucas 8:1; Aramid 8:12; 19:8; 20:20, 25) Idi 1919, idiay maysa a kumbension dagiti Saksi ni Jehova (maaw-awagan idi kas Internasional nga Estudiante ti Biblia) idiay Cedar Point, Ohio, napalagipan dagiti nakikumbension a ti “trabahoda isu ti panangiwaragawag iti umay a nadayag a pagarian ti Mesias.” Iti kasta met laeng a kumbension idi 1922 daytoy naipaganetget manen, ket naparegtada: “Iwaragawag, iwaragawag, iwaragawag, ti Ari ken ti pagarianna.” Babaen ti panangusarda kadagiti isuamin a pamay-an nga adda kadakuada, intultuloyda nga inaramid dayta iti sangalubongan agingga itoy nga aldaw. (Mateo 24:14) Gapu iti trabahoda, ti isyu iti Pagarian naiparang kadakayo. Ania ti ar-aramidenyo iti dayta?
‘INARAMIDYO ITI MAYSA KADAGITI KAKABSATKO’
9. (a) Kasano a dagiti kasasaad a nadeskribir idiay Mateo 25:35-40 mainaig iti ministerio iti Pagarian? (b) Iti ania a pannakasubok a maipasango dagiti tattao iti sadinoman?
9 Ti napulotan-espiritu a “kakabsat” ni Kristo nagsagabada iti narikut a pannakasuot gapu iti situtured a panangikasaba iti Pagarian ti Dios, bayat a tagtaginayonenda ti pannakaisinada iti lubong. (Juan 15:19, 21) Dadduma ti nakapadas iti pannakabisin, pannakawaw ken kinakurang iti pagan-anay. Adu ti nangpanaw kadagiti pagtaenganda tapno agserbi kadagiti luglugar a sadiay ganggannaetda. Bayat ti panangaramidda iti ministerioda, dagitoy nagsagabada iti sakit ken pannakaibalud, uray pay ti ipapatay iti ima dagiti manangidadanes. Dagitoy a kapadasan dagiti “kakabsat” ni Kristo ti namataud iti pannakasubok dagiti tattao iti amin a nasnasion. Ti kadi ayat iti Dios ken ni Kristo ti mangtignay kadakuada a tumulong kadagitoy nga ambasador iti nailangitan a Pagarian? (Mateo 25:35-40; idiligyo ti 2 Corinto 5:20.) Saan a gapu kangrunaanna iti panangngaasi iti tao no di ket ti tulong a maipaay gapu ta dagitoy kakadua ni Kristo ti ibilang ti Ari a kas naaramid a personal kenkuana.—Marcos 9:41; Mateo 10:42.
10. (a) Apay a ti reklamo nga imbangon dagiti “kalding” saan a nainkalintegan? (b) Babaen iti panangidilig, ania a sasaaden ti innala dagiti “karnero”?
10 Dagidiay a mangipaay iti kasta a tulong ti impadis ni Jesus iti karnero. Dagiti tattao a di mangipaay iti tulong kadagiti “kakabsatna” matuktukoyda iti pangngarig ni Jesus kas kalding. Dagiti “kalding” mabalin nga agreklamoda a saanda a nakita ni Jesu-Kristo. Ngem imbaonna dagiti ad-adipenna kadakuada, ket dagitoy ti nalawag a nangilasin kadagiti bagbagida. Amin dagiti “kalding” ti mabalin a saan a nangidadanes kadagiti “kakabsat” ni Kristo, ngem saanda met a natignay babaen iti ayat iti nailangitan nga Ari a tumulong kadagiti pannakabagina. (Mateo 25:41-45) Agtalinaedda iti lubong a ni Satanas a Diablo ti di makita nga agturayna. Dagiti “karnero” dida met literal a makita ni Kristo. Ngem, maisupadi kadagiti “kalding,” dagitoy paneknekanda a saanda a maamak a mangilasin kadagiti bagbagida a kadua dagiti “kakabsat” ni Kristo, a tultulonganda dagitoy iti panangiwaragawag iti Pagarian ti Dios. Dagiti “karnero” ammoda nga ar-aramidenda, ken mangaramidda iti positibo a panagpili a maipaay iti Pagarian ti Dios babaen ken Jesu-Kristo. Dayta ti makagapu a ti panagtignayda adda pategna iti imatang ti Ari.
11. (a) Gapu ta adu a tattao ti pulos di pay nakasabet iti maysa kadagiti “kakabsat” ni Kristo, kasano a maukom dagitoy sigun iti pakaibatayan a nadeskribir ditoy? (b) Ania ti mangipanamnama iti balligi daytoy a trabaho?
11 Kasano, nupay kasta, a posible a maukom dagiti amin a nasnasion a maibatay iti daytoy? Saan kadi nga imbaga ni Jesus a dagiti “kakabsatna,” isu a pangitedan ti Ama iti nailangitan a Pagarian, ket maysa laeng a “bassit nga ipastoran”? (Lucas 12:32) Adu a tattao ti pulos a saan pay a nakasabet kadakuada. Pudno, ngem dagiti “kakabsat” ni Kristo buklenda ti sentro ti internasional nga organisasion dagiti Saksi ni Jehova. Babaen iti daytoy nga organisado a tattao, ti napateg nga isyu iti Pagarian maiparparangen kadagiti tattao iti sadinoman. Amin dagitoy ti iturturong ni Kristo a mismo manipud iti nailangitan a tronona ken babaen iti tulong dagiti anghel. Kadagiti 203 a dagdaga ken grupo dagiti isla iti agliklikmut ti globo—uray pay kadagiti lugar a sadiay linapdan ti gobierno ti panangikasaba iti Pagarian ti Dios—agtultuloy a di malapdan ti trabaho a panangilasinlasin, ket ti dakkel a bunggoy dagiti tattao mangal-aladan iti takderda iti dasig ti Pagarian ti Dios.
12. (a) Kasano a pagbalinen dagiti “karnero” a nalawag ti takder nga innalada? (b) Apay nga aramidenda dayta?
12 Kasano ti panangipakitada iti daytoy? Babaen ti panagtrabahoda a kadua dagiti napulotan, a sireregta a mangiwaragawag nga agturturayen ti Pagarian ket dandanin ti panangiyegna iti panungpalan ti sistema dagiti bambanag. Gapuna sipapanayag nga ilasinda ti bagbagida a nangalan iti takderda iti Mesianiko a Pagarian ni Jehova ket siaayat a paregtaenda dagiti dadduma a mangaramid met iti kasta. Saan laeng a ti tarigagay a makalasat ti mangtignay kadagitoy a nalinteg-panagpuspusona a tattao. Pudno nga inay-ayatda ni Jehova ken dagiti daldalanna. Ti probision ti Pagarianna a ni Kristo ti Ari ti mangpunno kadagiti puspusoda iti panagyaman, ket kayatda a magunggonaan met dagiti dadduma iti dayta. Gapuna makiramanda iti nasaknap a pamay-an a kabaelanda iti panangipaay iti pammaneknek iti Pagarian. Kas imbilin ni Jesus kadagiti ad-adalanna, dagitoy ‘birukenda nga umuna ti pagarian,’ a di palubosan dagiti pakadanagan iti material a kasapulan a mangikabil iti dayta iti maikadua a lugar. Iti kastoy a pamay-an nailineada a maipaay iti naindaklan a bendision.—Mateo 6:31-33.
“TAWIDEN[YONTO] AYA TI PAGARIAN”?
13. (a) Nanipud kaano a pampanunotenen ni Jehova ti maysa a gunggona para kadagiti mara-karnero? (b) Ania ti kaipapanan kadakuada ti “panangtawid iti pagarian”?
13 Ti agur-uray kadagidiay a mapaneknekan a “karnero” iti pangngarig ni Jesus ti pudno a nakaskasdaaw. Manipud iti nailangitan a tronona, kunana kadakuada: “Umaykayo, bendito ni Amak, tawidenyo ti pagarian a naisagana kadakayo nanipud idi pannakabangon ti lubong.” (Mateo 25:34) Nanipud pay “idi pannakabangon ti lubong,” idi tiempo a damo pay laeng ti panangipasngay ni Adan ken Eva kadagiti annak a mabalin a magunggonaanto manipud iti probision ti Dios a mangsubbot iti sangatauan, sigun iti Genesis 3:15, 16, pampanunotenen ni Jehova ti gunggona nga agpaay kadagitoy a “karnero.” (Idiligyo iti Lucas 11:50, 51.) Ti gunggonada isu ti gundaway a mangtagiragsak iti naisubli a Paraiso iti naan-anay a natauan a kinaperpekto ti biag isu a napukaw ni Adan. Ti ‘panangtawidda iti pagarian’ dina kaipapanan a mapanda idiay langit, agsipud ta ti “karnero” saanda a kas kadagiti “kakabsat” ti Ari, nga agtawid iti nailangitan a Pagarian. Gapuna ti “karnero” masapul nga agbalinda a naindagaan nga iturayan dayta a nailangitan a gobierno. Kuna ti Greek-English Lexicon ni Liddell ken Scott a ti Griego a termino a basileiʹa, a ditoy naipatarus a “pagarian,” ti mabalin nga awaten a pakaiyaplikaran, kayatna a sawen ti “panagpaituray iti maysa nga ari.” Nalawag a daytoy agaplikar iti kastoy a kaipapanan.
14. Kasano a ti panangukom a naipaay kadagiti “kalding” maisupadi iti tawid dagiti “karnero”?
14 No dagiti “kalding” mapanda iti “agnanayon a pannakapukaw,” iti naan-anay a pannakadadael a kasla babaen iti apuy, dagiti “karnero” ti italimengto ti Mesianiko nga Ari. (Mateo 25:41, 46; idiligyo iti Apocalipsis 21:8.) Maitalimengdanto iti dakkel a rigat, a saanen a kasapulan ti ipapatayda, a sumrek iti nadayag a “baro a daga” nga awananto iti dakes nga impluensia ni Satanas ken ti dakes a sistema dagiti bambanagna. Kukuadanto dayta a bendision agsipud ta mangar-aramidda iti umiso a pangngeddeng a maipaay iti isyu ti Pagarian itan.
15. (a) Kasano ti pannakaammotayo a daytoy a pangngarig agaplikar itan? (b) Gapuna, ania a trabaho ti napateg unay?
15 Maysanto a serioso a biddut ti agrason a, gapu ta ti pannakadadael dagiti “kalding” ti agnanayon, ti pangngarig saan nga agaplikar agingga iti naladladaw a tiempo, nalabit bayat ti Milenial a Panagturay ni Kristo. Maisuppadi ketdi, inted ni Jesus daytoy a pangngarig kas paset iti pagilasinan “iti panungpalan iti sistema dagiti bambanag.” (Mateo 24:3) Ti desdeskribirenna mapasamak kalpasan ti pannakaitronona ken kasta met bayat a dagiti “kakabsatna” addada pay iti lasag ken makapadpadas kadagiti rigat a dinakamatna. Agbibiagtayon iti dayta a tiempo, ket napartak a maib-ibusen. Anian a nasken, ngarud, ti saan laeng a panangipaay iti naan-anay a panagtalek iti Pagarian no di ket ti tumulong kadagiti dadduma a makakita iti kinapateg ti panangaramid iti kasta itan.