Kapitulo 18—Pannakailasat Agturong ti Baro a Daga
Nasungdokayo Aya iti Baro nga Ari ti Daga?
1. Idi naiparang ni Jesus kas Ari idi 33 K.P., kasano ti isusungbat dagiti tattao?
Idi Nisan 9 iti 33 K.P., imparang ni Jesu-Kristo ti bagina kadagiti Judio kas ti Arida, ti naipadto a Mesias. Bayat ti isasalogna iti Bantay dagiti Olibo nga agturong iti Jerusalem, dagiti umariwekwek nga ad-adalanna nagrag-oda ken indaydayawda ti Dios gapu kadagiti nakaskasdaaw nga ar-aramid nga inaramid ni Jesus. (Lucas 19:37, 38; Zacarias 9:9) Ngem agbalinda kadi a nasungdo iti Daydiay nga indaydayawda kas Ari? Ti kinasungdo di nagbayag ti nasuot.
2. (a) Kasano ti isusungbat itatta dagiti adu a tattao iti pannakaiyanunsio a ni Kristo ti baro nga Ari iti daga? (b) Ngem ania a salsaludsod ti rebbeng nga usigentayo a buyogen ti kinapasnek?
2 Nanipud 1914 ti napadayagen a Jesu-Kristo nga aktibo nga agturturayen manipud langit ti naiparang kadagiti amin a sangatauan kas ti baro nga Ari ti daga. Ti namnama ti biag iti sidong iti maysa a gobierno iti im-ima ni Kristo, nga addaan kadagiti pudno a solusion kadagiti parparikut iti sangatauan, ti nangpataud iti panagrag-o dagiti tattao iti isuamin a nasnasion. Ngem agbalindanto kadi a nasungdo? Ti ngay tunggal maysa kadatayo?
TI REKORD TI KINASUNGDO A MISMO TI ARI
3. (a) Apay a ni Jesus a mismo ti matuktukoy a “nasungdo” ken Jehova? (b) Ania ti kinasungdo?
3 Nakaipaayen ni Jesu-Kristo iti adu a pammaneknek a ti kinasungdona a mismo ken Jehova, ti Soberano iti Uniberso, ket di maisin. Isut’ siuumiso a matuktukoy iti Kasuratan a kas ti “nasungdo” ken Jehova. (Salmo 16:10; Aramid 2:24-27) Ti sao a Hebreo a “nasungdo” a nausar ditoy addaan ti kaipapanan a naasi nga ayat. Saan a nalamiis, a naibatay laeng iti linteg wenno kinahustisia, no di ket natignay met iti ayat ken panangapresiar.—Idiligyo iti Salmo 40:8; Juan 14:31.
4, 5. (a) Kasano a ti kinasungdo ni Jesus naipakita idiay langit, a simmaruno iti iyaalsa ni Satanas? (b) Kasano a dayta a kinasungdo naipakita met ditoy daga?
4 Idiay langit, idi rinugian ni Satanas a sinapul ti dayaw a maipaay iti bagina met laeng nga agpaay laeng iti Dios ken idi a dagiti dadduma nga angheles binaybay-anda ti umiso a lugarda iti nailangitan nga organisasion ni Jehova, ti inauna nga Anak ti Dios dina tinulad ti espirituda. Iti biangna saanna a maaramid ti kasta! Kasta ti managsakripisio a debosionna ta, iti panangibanagna iti pagayatan ni Amana, daytoy a nasungdo nga Anak pinanawanna ti nailangitan a dayagna, nagbalin a tao ket nagpaituray pay agingga iti ipapatay iti kayo a pagtutuokan. Siaayat, sinigurona nga, agpannuray kenkuana, awan ti detalye nga imbalabala ti Kasuratan a maipaay kenkuana ti saan a matungpal.—Filipos 2:5-8; Lucas 24:44-48.
5 Idi adda ni Jesus ditoy daga, kasta unay ti panangparigat ni Satanas kenkuana tapno tallikudanna ti trabaho nga inted ti Dios nga aramidenna—no mabalin, gagarienna nga agaramid iti banag a mangtignay iti Dios a di mangawat iti Anakna. Pinaregtana ni Jesus a mangaramid kadagiti bambanag a mangipaay kenkuana iti kinalatak ken pannakabalin —ngem agbalin a paset iti lubong a ni Satanas ti agturay. Nagkedked ni Jesus, a nagadaw iti Sagrado a Kasuratan kas ti giyana. (Mateo 4:1-10) Ni Jesus addaan kadagiti naisangsangayan nga abilidad ket inusarna ida a naimbag, ngem kanayon a maitunos iti pagayatan ni Amana. Isut’ okupado a mismo iti naan-anay a panangaramid iti trabaho ti Dios isu a nangibaonan ti Dios kenkuana. (Juan 7:16-18; 8:28, 29; 14:10) Anian a nagsayaatan nga ulidan iti kinasungdo!
6. Iti ania a pamay-an a ti gunggona a naited ken Jesus sapulenna ti kinasungdo kadatayo?
6 Gapu iti napaneknekan a kinasungdo ni Jesus, pinagungar ni Jehova manipud kadagiti natay, “nga intan-okna iti kangatuan unay ket inikkanna ti nagan a natantan-ok ngem iti amin a nagan, tapno iti nagan ni Jesus isuamin a tumeng agparintumeng . . . ken amin a dila ipudnoda a ni Jesu-Kristo isu ti Apo tapno pakaidayawan ti Dios Ama.” (Filipos 2:9-11) Daytoy a “nagan a natantan-ok ngem ti dadduma a nagan” iparangarangna ti pannakabalin ken autoridad a naited ken Jesus tapno matungpalna ti pagayatan ni Jehova. ‘Ti panagparintumeng’ kenkuana kaipapananna ti panangbigbig iti saadna ken panagpasakop iti autoridadna. Dayta iramanna ti panagbalin a nasungdo nga iturayanna kas Ari.
NASUNGDO NGA AYAT PARA KADAGITI PINULOTAN NI JEHOVA
7. Maipapan iti ania a bambanag a nasuot dagiti paspasurot ni Jesus no maipapan iti kinasungdoda?
7 Ti kinapudno a, kalpasan iti iyuulina idiay langit, ni Jesus saanen a makita ti mata ti tao agbanag iti makasukisok-puso a pannakasuot iti kinasungdo dagiti paspasurotna. Dagitoy surotendanto aya dagiti prinsipio nga insurona kadakuada? Agtalinaeddanto aya a saan a paset ti lubong? Raemendanto aya dagidiay inikkan ti nasantuan nga espiritu iti rebbengen a mangaywan? Naimpusuanto aya ti panangaramidda a naituding kadakuada?
8. Ania ti inladawan ti nasungdo nga ayat iti nagbaetan ni Jonatan ken ni David?
8 Kabayatanna dagiti “sabsabali a karnero” maurnongdanto a maikadua iti “bassit nga ipastoran” dagiti makipagtawid iti nailangitan a Pagarian. Pudno aya nga apresiarenda ti naituding a saadda no maipapan iti relasionda ken Kristo kas Ari ken ti relasionda iti maysa ken maysa? Dagiti kinapudno ipakitana ti napudno a panaginnayan-ayat iti ummong dagiti paset iti “maymaysa nga arban” iti sidong ni Jesu-Kristo. Daytoy ti inladawan ti di nadadael, di napukaw a panagayat ni Jonatan, ti anak a lalaki ni Ari Saul, ken David. Idi nasaksianna ti naan-anay a debosion ni David ken Jehova ken ti panagpannurayna iti Dios iti panangpatayna iti higante a ni Goliat, natignay a naimbag ni Jonatan ket ti “kararuana naisinggalut idi kararua ni David, ket ni Jonatan nagayat kenkuana a kas iti kararuana met laeng.” Ti ayatna saan a bimmaaw iti nalawagen a ti kinaari maited ken David ket saan a ken Jonatan. Mulit-ulit nga inrisgo ni Jonatan ti biagna a maipaay ken David.—1 Samuel 17:45-47; 18:1; 23:16, 17.
9. Kasano a ti umasping a kinasungdo impakita dagiti di Israelita a nagserbi iti buyot ni David?
9 Malaksid ken Jonatan, addada dagiti di Israelita a nangisinggalut iti bagbagida ken David. Dagitoy saanda a natignay gapu iti panagayatda iti kuarta no di ket maingelda a lallaki a nagtignay gapu iti debosionda ken David kas pinulotan ni Jehova. Dagiti Cereteos, Feleteos ken dagiti dati nga umili iti siudad a Filisteo a Gat ti nairaman kadagitoy. Dagitoy ti sisusungdo a nakikadua ken David idi a ti anakna a ni Absalom sisisikap nga inyadayona ti puspuso dagiti tattao ti Israel. Nupay no nalatak ken nasikap ni Absalom, saanda a naguliban babaen kadagiti nalamuyot a sasaona.—2 Samuel 15:6, 10, 18-22.
10. (a) Kasano a ti nasinged a relasion iti nagbaetan ni Kristo, dagiti napulotan a natda ken dagiti “sabsabali a karnero” nailadawan idiay Salmo 45? (b) Iti ania a pamay-an a ‘dagiti babbalasang a kakaduana simrekda iti palacio ti ari’?
10 Ti sabali pay a makapabileg-puso a deskripsion iti relasion ni Kristo, dagiti napulotan a natda ken dagiti “sabsabali a karnero” ti masarakan idiay Salmo 45. Daytoy ket saan laeng a napintas a berso no di ket naimpadtuan iti Mesianiko a Pagarian—a ti Dios a mismo ti “trono,” kayatna a sawen, ti pamuon ken sadiri iti kinaari ni Jesus. (Salmo 45:1-7; Hebreo 1:8, 9) Ti salmista deskribirenna ti nobia ni Kristo, “ti anak ti ari,” a naiyeg iti Ari iti aldaw ti panagkallaysana. Naikuyog kenkuana “dagiti babbalasang a kaduana.” Siasino dagitoy? Dagitoy dagiti manginanama nga agbalin nga iturayan iti Pagarian ti Dios. “Babaen ti rag-o ken panagragsak” kumuyogdanto iti klase “nobia” agingga a ti maudi kadagitoy ti maikadua ken Kristo idiay langit. Maikuyogda kadakuada, “sumrekda iti palacio ti ari,” saan a babaen ti iyuulida idiay langit, no di ket babaen ti panangitukonda iti bagbagida iti serbisio ti Ari. Nagbalinkayo kadin a paset dayta naragsak a prosesion?—Salmo 45:13-15.
ANIA TI SAPULEN TI KINASUNGDO KADATAYO?
11. Ania dagiti kasasaad a mangikabil kadatayo iti suot iti panagbalin a “saan a paset iti lubong”?
11 Dagiti adu a kasasaad iti biag ipakitana no aniatayo a kita ti tao. Pudno kadi a patientayo ti Mesianiko a Pagarian ni Jehova? Pudno kadi dayta kadatayo? Kinuna ni Jesus a dagiti pudno a paspasurotna “saanda a paset iti lubong.” Pudno kadi dayta kadakayo?—Juan 17:15, 16.
12. Nupay no imperpektotayo, kadagiti ania pay a pamay-an a mapaneknekantayo ti kinasungdotayo?
12 Iti kasotayo kas imperpekto a tattao, ti kinasungdo dina sapulen ti kinaperpekto. Ngem sapulenna ti pananglikliktayo iti ingagara a pananglabsing iti bilin ti Biblia, makitadatayo man dagiti sabsabali wenno saan. Dayta ti mangtignay kadatayo a mangikagumaan a mangiyaplikar kadagiti prinsipio ti Biblia a naan-anay, imbes nga ikagumaan ti panagbalintayo a nakasingsinged iti daldalan ti lubong. Dayta ti mangtignay kadatayo a mangsukay iti pudno a pananggura iti dakes.—Salmo 97:10.
13. Kasano a ti kinasungdo salaknibannatayo a maibusor iti nalamuyot a sasao dagiti apostata?
13 No pudno nga ayatentayo ti dakes, ditay palubosan ti panagusiuso a manggargari kadatayo nga umasideg iti dayta. Ti panagusiuso iti panagbiag dagiti tattao nga imoral iti sekso ti mangiturong iti maysa iti pannakadadael. (Proverbio 7:6-23) Kasta met, ti naespirituan a pannakadadael ti mabalin a mangringbaw kadagidiay a gapu iti panagusiuso gumatangda ken agbasada kadagiti literatura a patauden dagiti apostata, dagiti tattao a nangpanaw ken Jehova ken ti organisasionna ken kalpasanna babaen iti sasao “baotenda” dagiti dati a kakaduada. (Mateo 24:48-51) Ti Proverbio 11:9 mamakdaar: “Ti nadangkes a tao dadaelenna gapu iti ngiwatna ti kaarrubana.” Ngem ti kinasungdo ti mangsalaknib kadatayo a maallilaw babaen kadagiti nalamuyot a sasaoda.—2 Juan 8-11.
14. (a) Ania ti maysa kadagiti kapapatgan a pamay-an a maipakitatayo ti kinasungdotayo ken Kristo kas Ari? (b) Apay a nakapatpateg daytoy a trabaho?
14 Maysa kadagiti kapapatgan a pamay-an a maipakitatayo iti kinasungdo isu ti panagbalin a nasungdo iti trabaho nga insuro ni Jesus nga aramiden dagiti adalanna. Personal a nangipaay iti ulidan babaen ti ipapanna kadagiti amin nga il-ili ken purpurok, a nangikaskasaba iti naimbag a damag iti Pagarian ti Dios. (Lucas 8:1) Impadto ni Jesus no anianto ti aramiden dagiti pudno a Kristiano idi kinunana: “Daytoy naimbag a damag ti pagarian maikaskasabanto iti amin a mapagnaedan a daga a maipaay a pammaneknek kadagiti amin a nasnasion; ket iti kasta umayton ti panungpalan.” (Mateo 24:14) Babaen iti daytoy a panangikasaba iti naimbag a damag a ti isyu ti Pagarian maiparang kadagiti tattao iti isuamin a lugar tapno makapagaramidda iti personal a pangngeddeng. Para iti dakkel a bunggoy, dayta a pangngeddeng isunto ti mangiturong iti pannakaispal iti dakkel a rigat. (Apocalipsis 7:9, 10) Sisungsungdo kadi a makiramramankayo iti daytoy naganat a trabaho?
15. (a) Ania ti kunaen ti Salmo 145:10-13 a sawento dagiti nasungdo ken Jehova? (b) Kasano nga agaplikar daytoy kadatayo?
15 Nabayagen a tiempo insurat ni salmista David: “Amin dagiti ar-aramidmo agyamandanto kenka, O Jehova, ket dagiti nasungdo kenka bendituendakanto. Sasawendanto ti dayag ti pagariam ken saritaendanto ti pannakabalinmo, tapno ipakaammoda kadagiti annak dagiti tattao dagiti nabileg nga ar-aramidna, ken ti dayag ti nadaeg a pagarianna. Ti pagariam agnanayon a pagarian, ti panagturaymo mataginayon kadagiti amin a kaputotan.” (Salmo 145:10-13) Dayta a pagarian agturturayen babaen iti Mesianiko a Pagarian iti nasungdo a turay ni Jesu-Kristo, ket ipakitatayo ti kinasungdotayo agpadpada iti Dios ken ni Kristo babaen ti siwayawaya ken sigaganetget a panagsao maipapan iti dayta.
16. Kasano a ti kinasungdo impluensiaanna ti kasaknap ti pannakiramantayo iti panangikasaba iti Pagarian ken ti motibotayo iti panangaramid iti dayta?
16 Ania a panangipangpangruna iti biagyo ti impaayyon iti daytoy a trabaho a panangikasaba iti Pagarian? Pudno kadi nga ipangpangrunayo dayta ngem dagiti dadduma nga ar-aramid? Ti ar-aramidenyo a personal mabalin nga ad-adu wenno basbassit ngem ti maar-aramidan dagiti dadduma. Agduduma dagiti kasasaad dagiti indibidual. Ngem magunggonaantay amin babaen ti panangimtuodtay iti bagbagitayo kadagiti salsaludsod a kas kadagitoy: ‘Ti kadi pannakiramanko iparangarangna laeng ti basta pannakarikna iti rebbengen, a basta adda laeng daton? Matmatmatak kadi dayta a kas kasapulan laeng iti pannakailasat? Wenno gapu kadi iti ayat ken ni Jehova, ti debosion iti Mesianiko nga Ari ken ti pudno a pannakaseknan iti padak a tao ti mangtignay kaniak a mangipangpangruna iti dayta ta dagiti dadduma a bambanag iti biagko naibangonda iti aglawlaw dayta?’ Ti kinasungdo ti mangtignay kadatayo a mangsapul kadagiti pamay-an a mangipakita a daytoy a trabaho ti nakapatpateg kadatayo a kas ti kinapategna iti Aritayo.
17. Kadagiti siasino ti “pangisawan[to] [ni Jesus] iti kappia inton dadaelenna dagiti nadangkes?
17 Di agbayag Daydiay indayaw dagiti adalanna a buyogen ti ragsak kas Ari bayat ti iseserrekna iti Jerusalem idi 33 K.P. dadaelennanton dagiti amin a di mangawat iti kinasoberano ni Jehova kas naiyebkas babaen iti Masianiko nga Arina. Ngem isu “sawennanto ti kappia” iti dayta a “dakkel a bunggoy” dagiti tattao kadagiti amin a nasnasion a nangtulad iti ulidanna iti kinasungdo. Mairamankayto kadi kadakuada?—Zacarias 9:10; Efeso 4:20-24.