Kapitulo 23—Pannakailasat Agturong ti Baro a Daga
“Masapulyo ti Anus”
1. (a) Apay a dagiti Saksi ni Jehova pudno a naragsakda a tattao? (b) Ania a balakad idiay Hebreo 10:36 ti agaplikar kadatayo amin?
DAGIDIAY a nagtalek ken ni Jehova ti kararagsakan a tattao ditoy daga. Ammoda no sadino ti pakasarakan ti kasayaatan a balakad maipapan iti no kasano ti agballigi kadagiti parparikut iti biag—ti Sao a mismo ti Dios. Saanda a maam-amak bayat ti panangmatmatda iti masanguanan, agsipud ta ammoda ti panggep ti Dios iti daytoy daga. (Jeremias 17:7, 8; Salmo 46:1, 2) Nupay kasta, nagsurat ni apostol Pablo kadagiti padana a Kristiano: “Ta masapulyo ti anus, tapno iti kalpasan ti panangaramidyo iti pagayatan ti Dios, awatenyo ti naikari.” (Hebreo 10:36) Ania ti mangipaay iti daytoy a pannakasapul iti anus?
2. Apay a kasapulan dagiti ad-adalan ni Jesus ti panagibtur?
2 Sakbay ti ipapatayna a mismo, ni Jesus pinagsiputna dagiti apostolesna iti adda iti masanguanan, a kunkunana: “No taga lubongkay koma, ti lubong ayatenna koma ti kukuana. Ngem gapu ta saankay a taga lubong, no di ket pinilikayo iti lubong, gapuna guraennakay ti lubong. Laglagipenyo ti sao nga imbagak kadakayo, Saan a dakdakkel ti adipen ngem ti apona. No inrurumendak, irurumendakayto met; no sinalimetmetanda ti saok, salimetmetandanto met ti saoyo. Ngem amin dagitoy aramidendanto kadakayo gapu iti naganko, ta dida ammo ti nangibaon kaniak.” (Juan 15:19-21) Anian ti kinapudno dayta!
3. (a) Kasano a ‘gapu iti nagan ni Jesus’ maidadanes dagiti ad-adalanna? (b) Iti ania a kaipapanan a dagiti manangidadanes “dida ammo” Daydiay nangibaon ken Jesus? (c) Sino ti makimbiang iti pannakaidadanes?
3 Dagiti paspasurot ni Jesus ket puntiria iti pannakagura gapu ta agbibiagda iti tengnga ti lubong a di mangawat iti pudno nga irepresentar ti Kinakristiano. Ti Kristo kaipapananna “Napulotan.” Ni Jesu-Kristo isu ti pinulotan ni Jehova nga agbalin nga Ari, a mangituray iti intero a daga. Gapuna idi kinuna ni Jesus a dagiti adalanna maidadanesdanto ‘gapu iti naganna,’ kayatna a sawen a ti pannakaidadanes ket maigapu iti panangipangagda kenkuana kas ti Mesianiko nga Ari ni Jehova, gapu iti panangtungpalda ken Kristo a nangnangruna ngem iti aniaman a naindagaan nga agturay, gapu iti nasungdo a panangipangagda iti Pagarianna ken saan a makinamin kadagiti ar-aramid ti natauan a gobgobierno. Kinuna pay ni Jesus a ti ibubusor ket gapu ta dagiti manangidadanes “dida ammo ti nangibaon kenkuana”—kayatna a sawen, dida bigbigen ni Jehova a Dios kas Sapasap a Soberano. (Idiligyo iti Exodo 5:2.) Sino ti kangrunaan a nanggargari iti daytoy a panangidadanes? Ni Satanas a Diablo.—Apocalipsis 2:10.
4. (a) Kasano a ti kaitungpalan iti Apocalipsis 12:17 apektaranna ti biagtayo? (b) Ania ti panggep ni Satanas?
4 Nangnangruna idi naitappuak ni Satanas manipud langit a simmaruno iti pannakaipasngay ti Mesianiko a Pagarian ni Jehova idi 1914, ti pammarigat kadagiti pudno a Kristiano kimmaro. Dikay tagtagibassiten dayta. Adda ti sapasap a pananggubat ti Diablo ken dagiti demoniona a maibusor kadagiti amin a mangala iti takderda iti dasig ti Pagarian ti Dios iti im-ima ni Jesu-Kristo. Maipapan iti daytoy, kuna ti Apocalipsis 12:17: “Ket nakapungtot daydi dragon (ni Satanas a Diablo] idi babai [ti kasla asawa a nailangitan nga organisasion ti Dios], ket napanna ginubat ti natda iti kapuonanna [ti napulotan-espiritu a paspasurot ni Kristo ditoy daga], a mangsalsalimetmet kadagiti bilbilin ti Dios ken addaanda ti pammaneknek ni Jesus.” Ti “sabsabali a karnero,” met, masarakanda ti bagbagida iti napinget a pannakidangadang. Babaen iti nasikap a pamay-an, ikagumaan ni Satanas ti manggargari wenno mangpuersa kadakuada a mangisardeng iti panangtungpalda kadagiti bilbilin ti Dios. Tarigagayanna a pakapuyen ken kalpasanna dadaelen a naan-anay ti espiritualidadda. Ti panggepna isu ti panangpaulimek ti panangiwaragawagda iti maipapan ken Jesus kas ti Mesianiko nga Ari ni Jehova. Ngem iti daytoy a naespirituan a pannakidangadang dagiti nasungdo nga ad-adipen ti Dios ti agballiginto.
Kasano Koma ti Panagtignay dagiti Kristiano?
5. Ania a tigtignay ti innala dagiti gobgobierno a maibusor kadagiti Saksi ni Jehova?
5 Adu nga opisiales ti gobierno ti makabigbig a dagiti Saksi ni Jehova managtungpal-lintegda a tattao ket addaanda iti nasayaat nga impluensia iti komunidad. Nupay kasta, amin dagiti natauan a gobgobierno ket paset iti sistema dagiti bambanag ti lubong ni Satanas. (1 Juan 5:19; Apocalipsis 13:2) Gapuna saan koma a pakasdaawan no dadduma a gobgobierno iparitda dagiti panaggigimong dagidiay agdaydayaw iti pudno a Dios, iparitda ti literaturada iti Biblia, iparitda ti panangasabada maipapan iti Pagarian ti Dios, wen, ibaludda pay ida ken pisikal a parigatenda ida. No personal a maparigatkayo iti kasta, anianto ti aramidenyo?
6. (a) Ania koma ti kababalintayo kadagiti opisiales ti gobierno? (b) Ngem ania ti sititibker a panggeptayo nga aramiden? (c) Nupay maidadanes, kasano a maitultuloytayo ti agbalin a naragsak?
6 Dagiti apostoles ni Jesu-Kristo nadayawda kadagiti opisiales ti gobierno. Idi naidadanesda, saanda a bimmales. Ngem idi nabilinda nga agsardeng a mangaramid iti imbilin ti Dios, situtured a simmungbatda: “Masapul nga agtulnogkami a nangnangruna iti Dios ngem kadagiti tao.” (Aramid 5:29; Roma 12:19; 1 Pedro 3:15) Uray pay idi nagpeggad ti biagda, ti panagbuteng iti ipapatay di namagbalin kadakuada a makikompromiso. Ammoda a pagserserbianda “ti Dios a mamagungar kadagiti natay.” (2 Corinto 1:9; Hebreo 2:14, 15) Nupay maidadanesda, naragsakda—naragsakda agsipud ta ammoda nga ay-ayuenda ti Dios, naragsakda ta addaanda ti gundaway a makiraman iti pannakaitan-ok ti naganna ken paneknekanda ti kinasungdoda iti napulotan nga Arina. (Aramid 5:41, 42; Mateo 5:11, 12) Kasta kadi ti kinataoyo? Sibabatad kadi nga ilasinyo ti bagiyo a kadua dagidiay agsagsagaba kadagita a kapkapadasan? Ni Ebedmelec ket maysa kadagiti di nagbuteng. Isut’ siasino?
7. (a) Sino ni Ebedmelec, ken apay nga isut’ paginteresantayo itan? (b) Idi nangngegna a naitappuak ni Jeremias iti nalutlut a bubon, ania a tignay ti innala ni Ebedmelec, ken apay?
7 Ni Ebedmelec ket maysa a managbuteng-Dios nga Etiope a nagnaed idiay Jerusalem bayat ti tiempo agingga iti pannakadadaelna babaen kadagiti taga Babilonia. Isut’ agserserbi iti sangakabbalayan ni Ari Sedekias. Iti dayta a tiempo ni Jeremias ket agserserbi kas maysa a mammadto ni Jehova iti Pagarian ti Juda ken dagiti nasnasion iti aglawlawna. Gaput’ inwaragawagna nga awan ti pannakikompromiso ti mensahe a pammakdaar ti Dios, isut’ nagbalin a puntiria ti nakaro a pannakaidadanes. Babaen iti panangidaulo ti dadduma a piprinsipe iti Jerusalem, isut’ naitappuak pay iti maysa a bubon tapno mailutlut ket matay. Nupay ni Ebedmelec saan a maysa nga Israelita, nabigbigna a ni Jeremias ket maysa a mammadto ni Jehova. Idi nangngegna ti napasamak, dagdagus a sinapulna ti ari iti ruangan iti siudad ket bimmalaet maigapu ken Jeremias. Babaen ti panagtignayna iti bilin ti ari, dagus a nangala kadagiti 30 a lallaki, agraman kadagiti tali ken daan a rigrigis. Binilinna ni Jeremias a mangikabil kadagiti rigrigis ken narutrut a pagan-anay kadagiti kilikilina iti likudan dagiti tali tapno saan a masaktan, ket kalpasanna inaonda ti mammadto iti bubon.—Jeremias 38:4-13.
8. Ania a makaipanamnama a kari ti impatulod ni Jehova ken Ebedmelec, ken apay?
8 Kaawatan a madanagan ni Ebedmelec maipapan iti aramiden dagiti piprinsipe kenkuana gapu iti panangupayna iti gakatda, ngem ti pannakaseknanna ti riningbawan ti panagraemna iti mammadto ni Jehova ken ti panagtalekna iti Dios. Kas banagna, impasiguro ni Jehova ken ni Ebedmelec babaen ken Jeremias: “‘Adtoy iyegkonto dagiti sasaok iti daytoy nga ili a maipaay iti pagdaksan ket saan a maipaay a pagimbagan, ket matungpaldanto iti sangom iti dayta nga aldaw. Ngem ispalenkanto iti dayta nga aldaw,’ kuna ni Jehova, ‘ket saankanto a mayawat iti ima dagiti tattao a pagbutngam. Ta kinapudnona siak ispalenkanto, ket dikanto mapasag iti kampilan, no di ket ti biagmo kaslanto sinamsammo, agsipud ta nagtalekka kaniak,’ kuna ni Jehova.”—Jeremias 39:16-18.
9. (a) Kasano a ti “sabsabali a karnero” kas ken ni Ebedmelec? (b) Gapuna, ania ti kaipapanan ti kari ni Jehova ken Ebedmelec kadagiti “sabsabali a karnero” itatta?
9 Anian a nagpateg dayta a kari kadagiti ad-adipen ni Jehova itatta! Kas ken Ebedmelec, dagiti “sabsabali a karnero” makitada dagiti kinaawan ti kinahustisia a maar-aramid kadagiti moderno-aldaw a klase Jeremias, ti napulotan a natda, ken ti panangikagumaan a mangpasardeng iti panangikasabada iti mensahe ni Jehova. Saanda a nagkedked a mangala iti aniaman a panagtignay a mabaelanda a mangsalaknib ken mangsuportar iti klase napulotan. Umiso unay, ngarud, ti kari ni Jehova ken Ebedmelec ti mangpabileg kadakuada, a mangpabileg iti panagtalekda a ti Dios dina palubosan dagiti bumusbusor a mangdadael kadakuada no di ket italimengna ida kas maysa a klase a lumasat iti umadanin a pannakadadael ti lubong a sumrek iti nalinteg a “baro a dagana.”
10. Iti ania a paspaset iti panagbiag ti Kristiano a mapadasanda ti pannakaidadanes?
10 Saan nga amin dagiti magna iti addang ni Jesu-Kristo mabutbutengda iti pannakaibalud, ngem amin ket makapadas iti pannakaidadanes iti maysa wenno dadduma a pamay-an. (2 Timoteo 3:12) Rinibribo a Kristiano nga assawa a babbai, ken assawa a lallaki, ti simamatalek a nagibtur iti nakaro a pannakabusor iti adu a tawtawen iti mismo a pagtaenganda. Dagiti ubbing, met, gapu iti tarigagayda nga agserbi ken ni Jehova, ti inlibak dagiti dadakkelda. (Mateo 10:36-38) Dagiti agtutubo a Kristiano mabalin met a maidadanesda idiay eskuelaan; dagiti natataengan, idiay pagtrabahuanda. Amin dagiti Saksi ni Jehova mapadasanda dayta bayat ti pannakiramanda iti panangasaba iti publiko maipapan iti Pagarian ti Dios. Kadagiti kakasta, agaplikar dagiti sasao ni Jesus: “Iti panaganusyo makupikupanyonto dagiti kararuayo.”—Lucas 21:19.
11. (a) Ania ti dadduma pay a kasasaad ti mangipaay iti nakaro a pannakasubok dagiti adu? (b) Sino pay ti makapadas kadagitoy a bambanag, ken apay?
11 Kadagiti adu, addada dadduma a kasasaad a mangikabil kadakuada iti pannakasubok. Mabalin nga addaanda iti serioso a sakit, ti mangrabsut kadakuada iti ragsak iti panagbiag. Wenno, nalabit agsagabada iti narikut a kasasaad iti ekonomia. Mabalin met a, no dadduma, dagiti sasao dagiti nasinged a kakaduada ket di nainkalintegan ken awanan asi. Iti kaso iti patriarka a ni Job, inusar ni Satanas amin dagitoy a pamay-an iti panangikagumaanna a mangdadael iti kinatarnawna. Kasanonto ti panagtignaytayo no masarakantayo ti bagitayo iti umasping a kasasaad?—Santiago 5:11.
12. (a) Apay a ni Noe kasapulanna a nangnangruna ti panagibtur iti ministeriona? (b) Kasano a ti kasasaad umasping iti kaaldawantayo?
12 Iti kasumbangirna, anian no personal a makasaraktayo iti nagbassitan nga interes iti panangikagumaantayo a mangpaneknek iti pangpanggep ni Jehova? Dayta, met, kasapulanna ti panagibtur. Laglagipenyo, bayat amin dagiti tawtawen a panangaskasaba ni Noe sakbay ti Layus, ti laeng asawana ken dagiti annakna ken dagiti mamanugangna ti nakikadua kenkuana iti panagserbi ken ni Jehova. Amin dagiti dadduma iti sangatauan “dida naawatan.” (Mateo 24:39) Umasping met iti dayta, ita, ti kaaduan ‘dida maawatan.’ Kadagiti dadduma a lugar, nupay kasta, sadiay adda idi bassit nga interes iti mensahe ti Pagarian, itan adda adu nga apit a managdaydayaw iti pudno a Dios. Naragsak dagidiay nagibtur iti adu a tawtawen a di panangikankano wenno ti direkta nga ibubusor ket itan makiramramandan iti daytoy nagkaragragsak a panagurnong!
‘Naragsak Dagidiay Agtalinaed nga Agibtur’
13. (a) Tapno makapagtalinaed nga agibtur, ania ti masapul a pangisentruantayo ti panagkitatayo? (b) Ania ti masapul a bigbigentayo no maipapan kadagiti pamay-an ni Satanas?
13 Tapno maliklikan ti pannakapukaw iti nakaskasdaaw a namnama iti biag iti “baro a daga,” nasken ti silalawag a panangisentrotayo iti dakkel nga isyu a naipasango iti amin a sangaparsuaan—ti isyu iti sapasap a kinasoberano. Addatayo kadi iti dasig ni Jehova nga awanan ti pannakikompromisona? Naan-anay kadi nga apresiarentayo nga adda laeng dua a dasig, nga awan ti pannakikompromiso? Tapno ditay mairaman kadagiti matay iti daytoy a gubat, masapul ti panangbigbigtayo a ti pannakagura ken ti pananggargari ket pamay-an nga inusaren ni Satanas a mangdadael iti kinatarnawtayo, tapno pasardengennatayo nga agtulnog iti Dios, tapno iyadayunatayo manipud iti nasken a trabaho a panangipaay iti pammaneknek iti Mesianiko a Pagarian.—1 Pedro 5:8, 9; Marcos 4:17-19.
14. (a) Ania a relasion ti masapul a sukayantayo, ken iti siasino? (b) Kasano ti panangtulongna kadatayo?
14 Masapul met a sukayantayo ti naan-anay a panagtalek ken ni Jehova. Anian a kinamaag ti panangpadas babaen iti bukodtayo a pigsa laeng a mangliklik iti nasikap a silo iti nabilbileg ngem tao a kabusor! Ngem no agtalektayo ken ni Jehova iti amin a pusotayo, ngarud no aglasattayo iti rigat ken mapasanguan iti pannakasulisog ad-adda nga umadanitayo kenkuana. (Efeso 6:10, 11; Proverbio 3:5, 6) Saannatayo a pilpiliten ni Jehova a magna iti maysa a dalan. Saannatayo nga iturong a maibusor iti pagayatantayo. Ngem no agturongtayo iti Saona a maipaay iti pannakaiwanwan, agkararagtayo kenkuana a maipaay iti bileg ken agtalinaedtayo a nasinged iti organisasionna, iturongna ti addangtayo. Ket pabilgennatayo iti napabaro a pammaneknek iti di mapaay nga ayatna.—Roma 8:38, 39.
15. (a) Sino koma ti ipangpangrunatayo iti panagbiagtayo? (b) Kasano koma a matmatantayo dagiti kasasaad a mangsubok iti pammatitayo?
15 Ti rigat ken pannakasulisog a mapasarantayo ti mangsubok kadatayo. Sino ti ipangpangrunayo iti biagyo? Ti karit ni Satanas a ta datay amin ti maseknan laeng iti bagitayo. Kaaduan a tattao ti kasta. Ni Jesu-Kristo naiduma. Kastakayo kadi? Nasursuroyo aya nga ipangpangruna ti panangitan-ok iti nagan ni Jehova? No kasta, ngarud, imbes a liklikan dagiti kasasaad a mangsubok iti pammatiyo, mabalinyo a sanguen ida a mismo, nga agkararagkayo ken Jehova nga ikkannakayo ti sirib a mangusar kadagitoy a mangidayaw kenkuana. Ti rigat a mapadasanyo mangpataud iti panagibtur; panagibtur gapu ta ti panagayatyo ken Jehova sapulenna ti pananganamongna. “Naragsak ti tao a makaitured iti pannakasulisog, ta inton masuoten awatennanto ti balangat ti biag, nga inkari ni Jehova kadagiti agayat kenkuana.”—Santiago 1:2-4, 12; Roma 5:3, 4.
16. Ania koma a kalat ti gun-odentayo?
16 Saan laeng nga umdas ti mangrugi iti panagserbi ken ni Jehova wenno agibtur iti apagbiit. Addatayo iti maysa a salisal, ket ti premio maipaay kadagidiay a makalasat iti pagpatinggaan a linea. Naragsak amin dagidiay a mangikagkagumaan iti bagbagida a ti matada ti sititibker a nakasentro iti premio inton daytoy daan a sistema marbeken iti pannakadadaelna! Anian a nagdayag a namnama ti agur-uray kadakuada!—Hebreo 12:1-3; Mateo 24:13.