Kapitulo 10​—Sangalubongan a Kinatalged iti Sidong ti “Prinsipe ti Kappia”

Ti Sinapataan ti Dios Agpaay iti Sangatauan​—Asidegen!

1, 2. (a) Iti ania a pannakaawat a ti Dios nagsapata, ken apay? (b) Aniat’ kinuna ti Dios idiay Isaias 45:23? (c) Kadagiti ania a sasao ni mammadto nga Isaias ti rebbeng a mabalintayo nga anamongan?

AGSAPSAPATA aya ti Dios? Wen, ti Dios agsapata, ngem saan nga agus-usar iti dakes a sao, a bumtak iti pungtot ken maawanan iti panagteppel. Ti panagsapatana ket kanayon a tapno mapabileg ti ibagbagana kas iti panggepna. Daytat’ nangted iti kanayonan a pammatalged kadagidiay apektado. Gapuna, nasayaat no ti intero a sangatauan imdenganda dagiti sasaona idiay Isaias 45:23: “Kaniak met laeng nagsapataak​—rimmuar iti ngiwatko ti sao ti kinalinteg, ket saanto a maisubli​—a tunggal tumeng agrukbabto kaniak, ken tunggal dila agsapatanto.”

² Itatta, nasurok a 2,700 a tawtawen kalpasan dayta a padto, kumbinsidotayo aya a ti sasao ti mammadto idiay Isaias 45:24 ket pudno: “Ni Jehova laeng ti puon ti kinalinteg ken kinapigsa. Kenkuana met laeng mapanto dagiti tattao ken amin dagiti gumura kenkuana maibabaindanto”? No kasta, mabalintay met ti umanamong kadagiti sumaganad a sasao ni Isaias idiay Isa 45 bersikulo 25: “Ken ni Jehova ti pakapalinteganto amin a bin-i ti Israel ken pagloriaandanto.”

3, 4. (a) Apay a ti Isaias 45:25 dinatay koma pagpanunoten maipapan iti Republika ti Israel? (b) Adda aya aniaman pannakapaay ti kaitungpalan ti Isaias 45:23-25, ket apay a kasta ti sungbatyo?

³ No basbasaentayo ti Isaias 45:25, pampanunotentayto aya ti Republika ti Israel? Saan! Dagidiay nga Israelis ket saanda nga ipabpabiang ti panangparmekda iti Dios iti sagradoda a Hebreo a Kasuratan. Gapu pay iti biddut a pammadayaw dida pay kayat nga ibalikas ti naganna.

⁴ Babaen iti daytoy, irasrasontayo aya a ti Isaias 45:23-25 ket awan kaitungpalanna agingga itoy a tawen? Saan! Awan pannakapaay ti kaitungpalan ti padto iti panawen nga inkeddeng ni Jehova. Kenkuana, ti pannakapaay ti padtona ket maysa a banag nga imposible! Saan laeng a ti mismo a saona ti mapagpannurayan ken mapagtalkan no di ket ad-adda pay ta no agsapata ni Jehova iti dayta, inayonna ti karina, a mangpatalged kadagiti bambanag.

Ti Dios Imballaetna ti Maysa a Sapata

5. Kasano nga ilawlawag ti Hebreo 6:13-18 ti ibaballaet ti Dios iti maysa a sapata iti karina ken Abraham?

⁵ Maipapan iti daytoy, mabasatayo idiay Hebreo 6:13-18: “Ta idi nagkari ti Dios ken Abraham, gapu ta dina nabalin ti agsapata iti sabali a dakdakkel, nagsapata babaen ti kinaisuna met laeng, a kinunana: ‘Pudno a bendisionankanto a bendisionan, ket paaduenkanto a paaduen.’ Ket iti kasta kalpasan ti nabayag a panagan-anusna, nagun-odanna ti kari. Kadagiti tattao agsapatada babaen iti dakdakkel, ket no adda panagsusuppiat ti sapata isu ti mamaneknek a mangibanag kadakuada. Gapuna, idinto a kayat ti Dios nga ipakita a nalawlawag pay kadagiti agtawid iti kari, ti kinatibker ti panggepna, imballaetna ti maysa a sapata, tapno, gapu kadagiti dua a banag a di agbalbaliw isu a saan a mabalin a pagulbodan ti Dios, adda maysa a napigsa a pagbilgantayo, datayo a nagtalaw tapno agkamangtayo babaen ti panginanamaan a naikabil iti sanguanantayo.”

6. (a) Ania ti adda a pakatignayan ti panagsapata ti Dios iti bagina met laeng maipapan iti karina ken Abraham? (b) Kasano a ni Jehova mausarna ti “gayyemna”?

⁶ Kaaduanna, adda ti nagpigsa a pakatignayan a panangiyebkas iti panagsapata. Dayta ti nangnangruna a pudno no ti panagsapata ket iti bukod a pagayatan ti Dios, boluntario. Ti kasta a pakatignayan ti naipaay iti daytoy a kaso a sadiay naipadamag ni Jehova nga agsapsapata, wen, iti bagina met laeng. Ti nasapataan a kari nga inaramid ni Jehova ken ni Abraham, a “gayyemna,” ti mangapektar kadatay amin itatta. Ni Jehova inapresiarna idi a ni Abraham nagtignay apaman a naawis ket pinanawanna ti daga a nakaiyanakanna a mapan iti daga nga itedto ni Jehova kadagiti kapuonan ni Abraham a tagikuaenda. Mabalin a sitatalged nga aramiden ni Jehova ti nagan daytoy a “gayyem” a naindaklan ket mabalinna nga usaren a pakabendisionan dagiti dadduma. Mabalin a maikuna ni Jehova kenkuana: “Ket bendisionakto dagiti mamendision kenka, ket ti mangilunod kenka ilunodkonto, ket benditodanto kenka amin dagiti kaputotan iti daga.”​—Genesis 12:3; Isaias 41:8.

7. (a) Iti ania a milagro ti imparabur ti Dios ken Abraham idi a ti asawana ket 90 añosnan? (b) Kasano nga indemostra ni Abraham ti pammati ken panagtulnogna iti naisangsangayan a pamay-an?

⁷ Idi ni Sara nga asawa ni Abraham ket 90 añosnan, a nalabes unayen iti tawen a mabalinna a panaganak, simimilagro a pinaraburan ti Dios ni Sara iti panangisikogna ken panangyanakna ken ni Abraham iti anakna a dungdunguen, a ni Isaac, kas kanayonan iti nakaskasdaaw a karina ken Abraham. Pinaneknekan ni Abraham nga isu ti sisasagana ken situtulok a mangidaton uray pay iti daytoy nagpateg nga anakna kas maysa a natauan a daton kas panagtulnog iti bilin ni Jehova, a Diosna. Daytoy naisangsangayan a demostrasion iti pammatina ken panagtulnogna ti nangtignay unay ken ni Jehova a kinunana ken Abraham, a “gayyemna”:

8, 9. (a) Kasanot’ isusungbat ni Jehova iti daytoy a demostrasion ti pammati ken panagtulnog ni Abraham? (b) Iti siasino ti nangaramidan ti Dios iti bagina a responsable?

⁸ “‘Gapu kaniak met laeng sinapataak,’ kinuna ni Jehova, ‘a gapu ta inaramidmo daytoy ket dika inkedked ti anakmo, ti bugbugtong nga anakmo, iti panangbendision bendisionankanto ket iti pammaadu paaduekto ti putotmo kas kadagiti bitbituen ti langit ken kas iti darat nga adda iti igid ti baybay; ket ti putotmo kukuananto dagiti ruangan dagiti kabusorna. Ket iti putotmo mabendisionanto isuamin dagiti nasnasion ti daga agsipud ta tinungpalmo ti timekko.’”​—Genesis 22:15-18.

⁹ Ditoy ti damdamona a paset ti Biblia a ni Jehova naipadamag nga agsapsapata. Agsipud ta di makapagsapata iti maysa a nangatngato pay, isu ti nagsapata iti bagina met laeng, a tinalianna ti bagina iti dayta. Iti daytoy a pamay-an pinagbalinna ti bagina a responsable iti awan sabali no di met laeng iti bagina. Agpaay iti bukbukodna a pakaidayawan a tungpalen ti bukodna a deklarasion iti panggepna.

Agingga iti Ania ti Nakaitungpalannan?

10. Agarup kasano kabayagen nga inaramid ti Dios ti tulagna ken ni Abraham, ket ania a saludsod ngarud ti tumaud?

¹⁰ Simrek ni Abraham iti naikari a daga ti Canaan ngangngani 4,000 a tawtawen ti napalabasen. Gapuna nga itan, iti agingga iti ania a naitungpalen dayta a kari wenno tulag a naaramid idi 1943 K.K.P.?

11. (a) Aniat’ ipamatmat ti pannakimiembro ti Republika ti Israel iti NU, ket ania dagiti ibungana? (b) Mairukrukod aya dagiti kapuonan ni Abraham iti lasag kadagiti pagannurotan iti naikari a “bin-i”?

¹¹ Itatta, adda ita ti Republika ti Israel idiay Makintengnga a Daya. Iti kabukbukodanna a paginteresan, daytat’ maysa a kameng ti Naciones Unidas. Ireprepresentar ti NU ti panangilaksid iti Pagarian ni Jehova a Dios babaen iti naikari a “bin-i” ni Abraham ket gapu itoy madadaelto inton “gubat ti dakkel nga aldaw ti Dios a Mannakabalin-amin,” ti Armagedon. Tunggal kameng ti NU, agraman ti Republika ti Israel, ti matalipuposto. Nakalkaldaang, ta ti nainlasagan, natural a kapuonan ni Abraham ket saanda a mairukrukod kadagiti pagalagadan nga agbalin a ti naikari a Mesianiko a “bin-i” a pangbendisionanto ni Jehova a Dios iti amin a sangatauan.​—Apocalipsis 16:14-16.

12, 13. (a) Saan a kas ken amana a David, apay a ti “Prinsipe ti Kappia” dinto agturay nga agmaymaysa? (b) Rebbeng kadi pay nga aguray dagiti napulotan a Kristiano agingga iti pannakaipasdek ti “Pagarian idi 1914 tapno awaten dagiti naikari a bendision, ket kasanotay nga ammo?

¹² Kas nabatad a makita ti tunggal maysa, ti naikari a Mesias ket saan nga agturturay idiay Makintengnga a Daya, a naindagaan a Jerusalem a kaitungpalan ti tulag Abrahamiko. Saan a kas ken amana a David idi ugma, ti Mesias ken ti “Prinsipe ti Kappia” ket saan nga agturay nga agmaymaysa. Inkarina nga ikuyognanto met laeng iti panagturayna dagiti 12 a matalek nga apostolesna ken dagiti dadduma pay a naiyanak iti espiritu nga ad-adalanna, a ti bilangdanto ket 144,000. (Apocalipsis 7:1-8; 14:1-4) Adda pay ti natda kadagita nga ad-adalan ditoy daga. Aniat’ naaramidanen nga agpaay kadakuada iti panangiyadelantar iti kaitungpalan ti tulag Abrahamiko a sinapataan ti Dios? Ti maysa a nalatak a manamnama a kaduanto iti dayta a Pagarian, ni apostol Pablo, ti nagsurat idiay Galacia 3:8: “Ket ti Surat, sigud nga ipakpakitana a ti Dios palintegennanto dagiti tattao iti nasnasion gapu iti pammati, impakpakaunana ti naimbag a damag ken Abraham, a kunana: ‘Mabendisionanto kenka dagiti amin a nasion.’”

¹³ Dagiti Kristiano a napili manipud kadagiti nasnasion di kasapulan nga agurayda pay agingga iti pannakaipasdek ti Pagarian idi 1914 tapno awaten ti naikari a bendision, ta intuloy a kinuna ni apostol Pablo: “Gapuna dagiti mammati mabendisionanda a mairaman ken ni matalek nga Abraham.” (Galacia 3:9) Ni Pablo ket maysa a Kristiano ket isut’ mabembendisionan, gapuna kasta met amin dagiti dadduma a naiyanak iti espiritu a Kristiano idi kaaldawanna.a Kasta met itatta, ti natda a buklen dagiti naiyanak iti espiritu a Kristiano a nangsalimetmet iti pammati iti Mesias kas ti kangrunaan a “bin-i” ni Abraham a pakabendisionan ti sangatauan, ket laklak-amendan ti naikari a bendision.

14. (a) Kasano ti nangnangruna a pannakabendision dagiti napulotan a Kristiano sigun iti tulag Abrahamiko? (b) Iti ania a pamay-an a daytoy ti nangalangon ken ni Jehova?

¹⁴ Babaen ti panangidedikarda ti bagbagida ken ni Jehova ken ti panangisimbolo itoy a dedikasion babaen iti bautismo iti danum ken kalpasanna maiyanakda iti espiritu ti Dios tapno agbalinda a naespirituan, dagitoy a Kristiano nagbalindan a naespirituan nga annak ni Dakdakkel nga Abraham, ni Jehova a Dios. Nagbalinda met a makipagtawid a kadua ni Jesu-Kristo, ti Dakdakkel nga Isaac. (Roma 8:17) Pudno nga isuda ti naisangsangayan a nabendisionan gapu iti tulag Abrahamiko. Tungtungpalenen ni Jehova ti sinapataanna nga aramiden, gapuna al-alangonenna ti bagina kas agibagbaga ti kinapudno, Daydiay makabael a naan-anay a mangitungpal iti sidadayaw a sinapataanna nga aramiden gapu iti mismo a naganna.

15. Ania ti kinuna ni apostol Pablo a pagbalinan ti tunggal kameng iti natda kadagiti naiyanak iti espiritu a Kristiano?

¹⁵ Tunggal kameng ti natda dagiti naiyanak iti espiritu a Kristiano ket maysa a Judio iti naespirituan a kaipapananna. Kas kinuna ni apostol Pablo: “Ta saan a Judio ti naruar laeng a kina-Judio, ket di met kugit ti naruar laeng a pannakakugit iti lasag. Ngem ti Judio isu ti kina-Judio iti uneg, ket ti pannakakugit agtaud iti puso iti naespirituan, ket saan nga iti letra.”​—Roma 2:28, 29.

16. Dagiti naespirituan a Judio buklenda ti ania a klase a naipadto idiay Zacarias 8:23?

¹⁶ Iti daytoy “panungpalan toy sistema dagiti bambanag,” dagidiay naiyanak iti espiritu a Kristiano, a Judioda iti uneg nga addaan ti pannakakugit iti puspusoda, ti mangbukel iti klase Judio a naipadto idiay Zacarias 8:23, a sadiay adda a naisurat: “Kastoy ti kuna ni Jehova dagiti buybuyot, ‘Kadagidiay nga aldaw mapasamakto a sangapulo a lallaki a naggapuda kadagiti amin a pagsasao dagiti nasnasion kumpetdanto, wen, kumpetdanto iti pingir ti kawes daydiay Judio, a kunada: “Dakami kumuyogkaminto kenka, ta nangngegmi a ti Dios adda kadakayo a tattao.”’”

17. (a) Asinoda ti ireprepresentar dagiti “sangapulo a lallaki” a kayatda ti agdayaw ken ni Jehova a kadua dagiti agdama a natda ti naespirituan a Judio? (b) Babaen iti pannakitimpuyogda kadagiti naespirituan a Judio iti panagdayaw ken Jehova, ania ti tagtagiragsaken itan dagiti kamkameng ti “sabsabali a karnero”?

¹⁷ Daydiay “dakayo a tattao” a kayat a pakikuyogan dagidiay “sangapulo a lallaki” tapno agdayaw ken Jehova a Dios ket isu ita ti agdama a natda kadagidiay naespirituan a Judio, ti klase a mangbukbukel “ti matalek ken naannad nga adipen” iti Mateo 24:45-47. Yantangay ti bilang a sangapulo irepresentarna ti kinanaan-anay iti naindagaan a kita, dagiti “sangapulo a lallaki a naggapuda kadagiti amin a pagsasao iti nasnasion” ket itaktakderanna amin dagiti simboliko a karnero a naipadto idiay Mateo 25:32-46. Dagitoy isuda ti klase “sabsabali a karnero” a kinuna ni Jesus iyegnanto nga itimpuyog kadagiti kimmarnero a natda a mangbukel a kaduada ti “maymaysa nga arban” nga adda iti panangaywan a mismo “ti maymaysa a pastor.” (Juan 10:16) Iti daytoy a pamay-an maramanandanto dagiti bendision ti tulag Abrahamiko a babaen iti “bin-i” ti Dakdakkel nga Abraham, ni Jehova a Dios. Ngarud, nalawag, ti sinapataan ti Dios nga aramiden nga agpaay iti sangatauan ket asidegen!

[Dagiti Footnote]