Kapitulo 13—Sangalubongan a Kinatalged iti Sidong ti “Prinsipe ti Kappia”
Ti “Prinsipe ti Kappia” Kumita kadagiti Adda iti Ruar ti Baro a Tulag
1. Apay a dagiti Judio itatta dida mailibak a ti Mosaico a tulag a naaramid kadagiti ammada ket nagpatinggan?
Dagiti natural a Judio itatta, dagidiay nainlasagan a kapuonan ni patriarka nga Abraham dida mailibak a ti daan a Mosaico a Linteg ti tulag ti sinandianen ti maysa a baro a nasaysayaat a tulag. Saanda a mabura manipud kadagiti manuskritoda iti Kasuratan a Hebreo dagiti sasao ti Dios idiay Jeremias 31:31: “‘Adtoy! dagiti al-aldaw dumtengda,’ kuna ni Jehova, ‘a mangaramidakto ti maysa a baro a tulag iti balay ti Israel ken iti balay ni Juda.’”
2. Kasano a ti salsaludsod a no siasinonto ti Manangibabaet ti baro a tulag naipakaammo iti kamaudiananna?
2 No asinonto ti mangibabaet dayta a baro a tulag ket saan nga impadto ni Jeremias. Ngem iti rabii ti Nisan 14, 33 K.P., idi nga inyawat ni Jesu-Kristo ti kopa ti arak iti Paskua kadagiti adalanna, impakitana nga isu dayta agbalinto a Manangibabaet. (Lucas 22:20) Idiay Hebreo 7:22 naibaga kadatayo nga isu ti “mangpatalged,” prenda, wenno garantia ti kasta a baro ken “nasaysayaat a tulag.”
3. Ania pay a sabali a saad ti tengtenglen ni Jesu-Kristo a maipaay iti Dios, ket dayta kadi ti babaen iti linea ti kapuonan?
3 Gaput’ datonna a maipaay iti baro a tulag, ni Jesus nagbalin a Nangato a Padi ni Jehova. Isut’ di nagbalin a kasta babaen iti kapuonan iti lasag a naggapu ken Aaron, ti immuna a nangato a padi ti Israel. Isu ti naikabil iti saad kas ti Nangato a Padi babaen iti sapata ti Kangatuan a Dios, ni Jehova, ti Manangaramid-Padi. Dagiti sasao ti Salmo 110:4 ti agaplikar ken ni Jesus: “Ni Jehova insapatana (ket dinto agbabawi): ‘Sika ti padi agingga iti panawen a di nakedngan kas galad ni Melquisedec!’”—Hebreo 7:20, 21.
4. (a) Ania a kita ti “Israel” ti nangaramidan ni Jehova iti naikari a baro a tulag, ken apay? (b) Dagidiay naiserrek iti baro a tulag agbalinda nga annak dagiti siasino a nagannak?
4 Malaksid ti bassit a natda, ti nasion ti Israel iti lasag linaksidda ni Jesu-Kristo kas ti Manangibabaet ti baro a tulag. Gapuna “ti balay ni Israel” a nangaramidan ti Dios ti naipadto a baro a tulag napaneknekan nga isu ti naespirituan nga Israel, “ti Israel ti Dios.” (Galacia 6:16) Dayta naespirituan nga Israel ti naipasngay idi aldaw ti Pentecostes, 33 K.P. Gaput’ dayta ti naespirituan, makapastrek dayta kas dagiti umilina kadagiti manamati a di Judio, wenno dagiti Gentil. (Aramid 15:14) Inawagan ni Pedro dayta kas “napili a kaputotan, ti naarian a kinapadi, nasantuan a nasion, ili a kukua ti Dios.” (1 Pedro 2:9) Daytoy a “nasantuan a nasion” ket buklen dagiti naespirituan nga annak ti Dakdakkel nga Abraham, ni Jehova, ti Manangaramid ken Manangtungpal iti Abrahamico a tulag. Gapuna, maigiddato iti dayta isuda met dagiti “annak” ti kasla-asawa a nailangitan nga organisasion ni Jehova, nga inladawan ni Sara, ti asawa ni Abraham. Di maliklikan, ti baro a tulag ti Dakdakkel nga Abraham nga inkuentana wenno linaglagipna a dayta nailangitan nga organisasion kas ti ina ti naikari a “bin-i,” nga inladawan ni Isaac.
Ti “Sabsabali a Karnero” Nairaman iti Maymaysa nga Arban
5. Ania ti kinasapulan ti baro a tulag ditoy daga?
5 Daytoy a baro a tulag kasapulanna dagiti aktibo a ministro ditoy daga ket dagiti kamkameng ti napulotan a natda nakapagserbida kas ti naan-anay a kualipikado a “ministro iti baro a tulag” nga isut’ nangsukat iti daanen a Mosaico a Linteg ti tulag. (2 Corinto 3:6) Isudat’ saan a dagiti kas klero a ministro iti uneg dagiti ginasgasut a narelihiusuan a sekta ti Kakristianuan, ti kadadakkelan a paset ti moderno-aldaw a Babilonia a Dakkel. Impangagda ti umaw-awag a bilin idiay Apocalipsis 18:4 ket rimmuarda manipud iti dayta sangalubongan nga imperio ti ulbod a relihion.
6. (a) Ti bilang dagiti ministro ti baro a tulag ti limitado iti mano? (b) Kasanotay nga ammo a ti Naimbag a Pastor iturongna ti atensionna kadagiti adda iti ruar ti baro a tulag?
6 Ti bilang dagiti ministro dayta baro a tulag ket saan a limitado iti 144,000. (Apocalipsis 7:1-8; 14:1-5) Gapuna sigurado nga umayto ti tiempo inton ti Naimbag a Pastor iturongna ti atensionna iti labes dagiti ministro ti baro a tulag. Nakitan nga antimano daytoy ti Primer Ministro ni Jehova ket tinukoyna dayta idi a kinunana, idiay Juan 10:16, nga isut’ addaan kadagiti “sabsabali a karnero,” a saanda a paset ti “bassit nga ipastoran” ti 144,000.—Lucas 12:32.
7. (a) Apay a dagiti kamkameng ti klase “sabsabali a karnero” saanda a ministro ti baro a tulag? (b) Kasano a ti natda dagidiay adda iti baro a tulag nagbalindan a bendision kadagiti pampamilia ken nasnasion iti daga?
7 Nupay ti “sabsabali a karnero” ket saanda a kameng ti “bassit nga ipastoran,” agbalinda met a ministro ti Dios, ngem saanda a ministro ti baro a tulag. Ket gapu ta dagidiay “sabsabali a karnero” ket agbalindanto a “maymaysa nga arban” a kadua dagidiay “ministro ti baro a tulag” ipamatmatna ti maysa a banag a naindaklan. Ania? Daytoy: Sakbay ti pannakaipadayagda iti nailangitan a Pagarian, ti natda ti personal a makitimpuyog kadagiti “sabsabali a karnero” ditoy daga. Iti kastoy a pamay-an ti natda ti naespirituan a bin-i ni Abraham mangrugidan nga agbalin a bendision kadagiti amin a pamilia ken nasnasion sakbay “ti gubat ti dakkel nga aldaw ti Dios a Mannakabalin-amin” inton Armagedon ken sakbay ti panangrugi ti Milenio.—Galacia 3:29; Apocalipsis 16:14, 16.
8. Kaano nga inturong ti Naimbag a Pastor ti atensionna kadagidiay adda iti ruar ti baro a tulag, ket ania nga umuna nga addang ti innala dagitoy a “sabsabali a karnero”?
8 Aktual a napaneknekan a kasta ti kasasaad, nangnangruna nanipud 1935. Nanipud idin, minilmilion kadagidiay “sabsabali a karnero” ti nakitimpuyogen kadagiti pinulpullo a ribo a kongregasion dagiti Saksi ni Jehova iti intero a globo ket indedikarda ti bagbagida iti dayta Kangatuan a Pastor, ni Jehova a Dios. Iti kasta napastrekda iti uneg ti “maymaysa nga arban” ti Naimbag a Pastor, ni Jesu-Kristo.
9. Ti kadi panangpalawa ti Manangibabaet ti Baro a tulag iti atensionna kaipapananna a ti ministerio ti baro a tulag nagpatinggan ditoy daga?
9 Ti kadi kinapudno a ti Manangibabaet ti baro a tulag ket, nanipud idin, palpalawaenna ti atensionna nga iraman met dagiti “sabsabali a karnero” kayatna a sawen a ti ministerio ti baro a tulag nagpatinggan idi 1935? Saan, ta adda pay ti natda kadagiti ministro ti baro a tulag ditoy daga, ket kaskasdi a masapul a leppasenda dayta a ministerio.
10. Asinoda itatta dagiti magunggonaanen manipud iti ministerio ti baro a tulag kas impaay dagiti walo a mannurat iti Kristiano a Griego a Kasuratan?
10 Itatta, agpadpada ti natda ti “bassit nga ipastoran” ken ti dumakdakkel a bilang dagiti “dakkel nga umariwekwek” dagiti “sabsabali a karnero” ti Naimbag a Pastor ti magunggunggonaandan manipud iti ministerio dagiti dadduma a napan nga immun-una ngem kadakuada, kas ken apostol Pablo. Iti panangitungpalna iti ministeriona iti baro a tulag a simamatalek agingga iti ipapatayna idiay Roma sakbay ti pannakadadael ti Jerusalem idi 70 K.P., napaltiingan ni Pablo a mangisurat kadagiti 14 kadagiti 27 a liblibro iti Kristiano a Griego a Kasuratan. Anian ti panagyaman ti napulotan a natda ken ti “dakkel a bunggoy” dagiti “sabsabali a karnero” a dagiti matalek a lallaki idi umuna a siglo, kas ken apostol Pablo ken dagiti pito a dadduma pay a mannurat ti Kristiano a Griego a Kasuratan, intungpalda ti ministerioda iti baro a tulag agingga iti ungto ti naindagaan a panagbiagda! Ket kadagiti tiempotayo, minilmilion kadagiti “sabsabali a karnero” ti addan a magunggonaan manipud iti ministerio ti baro a tulag, kas ipapaay ti napulotan a natda iti sidong ti Manangibabaet, a ni Jesu-Kristo. Itan inturongen ti “Prinsipe ti Kappia” ti atensionna kadagitoy ing-ingungoten a “sabsabali a karnero,” a ti bilangdan ti sipapardas a dumakdakkel.
11. (a) Kasano kabayagen a nagepekto ti baro a tulag, ket ania ti ipamatmat daytoy? (b) Ti natda kadagiti ministro ti baro a tulag agserserbida iti ania a kapasidad itatta?
11 Nupay kasta, mabalin nga ita maib-ibusen ti panawen! Ti baro a tulag ti nagepekton iti nasuroken a 1,953 a tawtawen, nasurok a 407 a tawtawen a nabaybayag ngem ti Mosaico a Linteg ti tulag a sinukatanna, ket ti bilang dagiti ministro ti baro a tulag ti bumasbassit metten bayat a dagiti miembrona ti aglabasdan manipud daga babaen ken patay. Ngem dagiti natda itatta kadagita a ministro agtultuloyda pay laeng nga agserserbi kas “ti matalek ken naannad nga adipen” a dinutokan ti Apo, a ni Jesu-Kristo, “kadagiti amin a sanikuana.”—Mateo 24:45-47.
Ti Panangidanon ti Imbitasion: “Umayka!”
12. Sigun iti Apocalipsis 22:17, ania nga imbitasion ti idandanonen ti klase “nobia,” ken kadagiti siasino?
12 Anian a nagayat ti serbisio nga ipapaay dagidiay ministro ti baro a tulag! Kas pangarigan, idiay Apocalipsis 22:17 mabasatayo: “Ket daydi espiritu ken daydi nobia kunada: ‘Umayka!’ Ket ti dumngeg kunaenna koma: ‘Umayka!’ Ket ti mawaw, umay koma; ket ti mayat awatenna ti danum ti biag nga awan baybayadna.” Ti klase “nobia,” agraman ti aktibo a puersa, wenno espiritu ni Jehova, ti mangidandanon iti dayta nga imbitasion kadagidiay adda iti ruar ti baro a tulag. Ti imbitasion ti naidanon, saan a kadagidiay adda a natay iti tanem a pakalaglagipan a mabendisionanto iti panagungar manipud kadagiti natay, no di ket kadagiti tattao nga adda a sibibiag itan, nga agpegpeggad iti pannakadadael inton Armagedon ngem addaanda ti lapayag a dumngeg.
13. (a) Nagbalin kadi a barengbareng ti imbitasion nga indanon ti klase “nobia”? Ilawlawagyo. (b) Dagidiay nangawaten ti imbitasion ti mangar-aramiden ti ania kas panagtulnog iti Apocalipsis 22:17? (c) Aniat’ mabalin a kaso maipapan iti panawen a natda iti panangidanon ti imbitasion?
13 Saan a barengbareng laeng ti pannakaidanon daytoy naayat nga imbitasion iti intero a lubong nangnangruna nanipud 1935. Nasurok a tallo a milion ti simmungbaten iti daytoy naasi nga awis nga umay ken uminum. Kas dagidiay manangapresiar a nakangngeg, situtulnog nga ibagbagada met kadagiti minilmilion a dadduma pay a mawawan a maipaay iti biag nga awan inggana iti maysa a paraiso a daga, “Umayka!” Ngem ti panawen a panangidanon iti daytoy naasi nga imbitasion kadagiti “sabsabali a karnero” ket limitado. Kalpasan ti nasurok ti kagudua a siglo a pannakaidandanonnan, ti natda a tiempo a maipaay iti dayta ti nakaab-ababa unay itan, bayat nga umad-adani ti gubat ti Dios inton Armagedon iti “daytoy a kaputotan” ti sangatauan.—Mateo 24:34.
14. Agpaay iti ania ti rebbeng a pangitedantayo iti panagyaman ken dayaw ken ni Jehova?
14 Gapuna, itan, pagyamanan ken Jehova nga isut’ nangipaay iti makabael a Manangibabaet a sibaballigi a mangiringringpas iti panggep dayta baro a tulag ti panangpataud kadagiti tattao, a 144,000 ti bilangda, a maipaay ti naganna! Dayaw met ken ni Jehova a ti Manangibabaetna kas Naimbag a Pastor ket mangiy-iyeg pay laeng ti umad-adu a milion dagiti “sabsabali a karnero” iti “maymaysa nga arban,” a nakastrekandan a maipaay kadagiti nasapa a gunggona nga agayus iti sangatauan manipud iti baro a tulag!