Kapitulo 29
Panagaramid Kadagiti Naimbag iti Aldaw ti Panaginana
PRIMAVERA ti 31 K.P. Sumagmamano a bulan ti naglabasen nanipud nakisaon Jesus iti maysa a babai idiay bubon sadi Samaria idi agdaldaliasat manipud Judea nga agturong idiay Galilea.
Itan, kalpasan ti nasaknap a panangisursurona iti intero a Galilea, nagrubbuat manen ni Jesus nga agturong Judea, a sadiay mangaskasaba kadagiti sinagoga. No maidilig iti atension nga impaay ti Biblia iti ministeriona idiay Galilea, bassit ti salaysayenna kadagiti ar-aramid ni Jesus idiay Judea bayat daytoy nga ibibisitana ken bayat dagiti bulan a binusbosna ditoy kalpasan ti napalabas a Paskua. Kaawatan a ti ministeriona saan unay a paborable a naawat idiay Judea saan a kas iti pannakaawatna idiay Galilea.
Di nagbayag nagturongen ni Jesus idiay kangrunaan a siudad ti Judea, ti Jerusalem, a maipaay ti Paskua iti 31 K.P. Ditoy, iti asideg ti Ruangan dagiti Karnero ti siudad, adda tangke a managan Betesda, nga isut’ immayan dagiti adu a masaksakit, bulsek, ken pilay. Patienda a maagasan dagiti tattao babaen ti itatapugda kadagiti danum ti tangke inton dagitoy makiborda.
Daytat’ Aldaw ti Panaginana, ket nakakita ni Jesus ti maysa a lalaki idiay tangke a masaksakiten iti 38 a tawtawen. Gapu ta ammonan ti kabayag ti panagsaksakit ti lalaki, insaludsod ni Jesus: “Kayatmo ti mapaimbag?”
Simmungbat ken Jesus: “Apo, awan ti tao a mangipisok kaniak idiay tangke no makibor ti danum; ngem no mapmapanak pay laeng nakababan ti sabali nga umun-una ngem siak.”
Kuna ni Jesus kenkuana: “Tumakderka, bagkatem ta iddam ket magnaka.” Ket naigiddato a daydi tao napaimbag ket binagkatna ti iddana ket nagna!
Ngem idi makita dagiti Judio ti lalaki, kunada: “Aldaw ti Panaginana, ket di maipalubos kenka a bagkatem ti iddam.”
Ti lalaki simmungbat kadakuada: “Ti nangpaimbag kaniak kinunana kaniak, ‘Bagkatem ti iddam ket magnaka.’”
“Asino a tao ti nagkuna kenka, ‘Bagkatem ti iddam ket magnaka’?” insaludsodda. Immadayo ni Jesus ta adu unay dagiti tattao, ket daydiay napaimbag dina ammo ti nagan ni Jesus. Iti kamaudiananna, nupay kasta, nagsarak daydiay lalaki ken ni Jesus idiay templo, ket naammuanna no siasino daydiay nangpaimbag kenkuana.
Gapuna daydiay tao a napaimbag sinapulna dagiti Judio tapno ibagana kadakuada a ni Jesus ti nangpaimbag kenkuana. Idi maammuanda daytoy, napan dagiti Judio ken Jesus. Gapu iti ania a rason? Tapno maammuanda no babaen iti ania a maaramidanna dagitoy nakaskasdaaw a bambanag? Saan. No di ket tapno agsapulda ti pangpabasolanda kenkuana agsipud ta ar-aramidenna dagitoy naimbag a bambanag iti Aldaw ti Panaginana. Ket isuda pay ti nangrugi a mangidadanes kenkuana! Lucas 4:44; Juan 5:1-16.
▪ Kasano kabayagen manipud idi maudi nga isasarungkar ni Jesus idiay Judea?
▪ Apay a ti tangke a naawagan ti Betesda nalatak unay?
▪ Ania a milagro ti aramiden ni Jesus idiay tangke, ket aniat’ tignay dagiti Judio?