Kapitulo 31
Panagala ti Dawa iti Aldaw ti Panaginana
DI NAGBAYAG pinanawan ni Jesus ken dagiti adalanna ti Jerusalem tapno agsublida idiay Galilea. Primavera idi, ket kadagiti taltalon addan dagiti dawa. Mabisin dagiti adalan. Gapuna nangalada kadagiti dawa ket nanganda. Ngem agsipud ta Aldaw ti Panaginana idi, nadlaw dagiti dadduma ti ar-aramidda.
Sinapsapul dagiti relihiuso a papangulo idiay Jerusalem ti panangpapatayda ken Jesus gapu iti impatoda a pannakasalungasing ti Aldaw ti Panaginana. Itan impabasol dagiti Fariseo. “Kitaem! Dagiti adalam aramidenda ti saan a maipalubos nga aramiden iti aldaw ti panaginana,” impabasolda.
Kuna dagiti Fariseo a ti panagala ti dawa ken pananglidlid iti dayta iti im-imada tapno kanenda ket panagani ken panagirik. Ngem ti istrikto a panangipatarusda no ania ti trabaho pagbalinenna a makapadagsen ti Aldaw ti Panaginana, idinto a daytat’ nairanta a mangparagsak, panawen ti naespirituan a pannakapabileg. Gapuna simmungbat ni Jesus babaen kadagiti Nainkasuratan a pangarigan a mangipakita a di pulos pinanggep ni Jehova a Dios ti kasta nga istrikto unay a panangiyaplikar iti lintegna iti Panaginana.
Kuna ni Jesus nga idi mabisin ni David ken dagiti buyotna, nagsardengda iti maysa a tabernakulo ket nanganda kadagiti tinapay a naidaton. Dagidiay a tinapay naikkatdan iti sanguanan ni Jehova ket nasuktandan kadagiti baro, ken gagangay a dagitat’ naireserba a kanen ti papadi. Kaskasdi, iti sidong dagita a kasasaad, saan a nakondenar ni David ken ti buybuyotna iti pannanganda kadagita.
Iti sabali pay a pangarigan, kuna ni Jesus: “Dikay aya nabasa iti Linteg a kadagiti aldaw a panaginana dagiti saserdote iti templo saanda a ngilinen ti aldaw a panaginana ket dida nakabasol?” Wen, uray pay iti Aldaw ti Panaginana dagiti papadi nagpartida ken nagaramidda kadagiti dadduma a trabaho idiay templo iti panangisagana kadagiti datdaton nga animal! “Ngem siak kunak kadakayo,” kuna ni Jesus, “a ditoy adda maysa a dakdakkel ngem iti templo.”
Iti panangbagbagana kadagiti Fariseo, intuloy ni Jesus: “Ngem no naammuanyo koma no ania ti kayatna a sawen daytoy, ‘Asi ti kalikagumak, ket saan a daton,’ saanyo koma a dusaen dagiti awan basolna.” Kalpasanna isut’ nagpatingga: “Ta ti Anak ti tao isu ti Apo iti aldaw a panaginana.” Aniat’ kayat a sawen ni Jesus iti dayta? Tuktukoyen ni Jesus ti natalna a panagturaynanto iti Pagarian iti sangaribo a tawen.
Iti 6,000 a tawtawenen, ti sangatauan agsagsagaban iti makapadagsen a pannakaadipen iti sidong ni Satanas a Diablo, a ti kinaranggas ken gubat gagangaydan a bambanag iti inaldaw. Iti kasumbangirna, ti naindaklan nga Aldaw ti Panaginana a panagturay ni Kristo isuntot’ panawen a panaginana manipud amin kadagita a panagsagsagaba ken pannakairurumen. Mateo 12:1-8; Levitico 24:5-9; 1 Samuel 21:1-6; Numeros 28:9; Oseas 6:6.
▪ Ania a pammabasol ti naaramid maibusor kadagiti adalan ni Jesus, ket kasanot’ panangsungbat ni Jesus iti dayta?
▪ Ania a pagkurangan dagiti Fariseo ti impabigbig ni Jesus?
▪ Iti ania a pamay-an a ni Jesus isu ti “Apo iti aldaw a panaginana”?