Kapitulo 47
Dagiti Lulua Nagbalin a Dakkel a Ragsak
IDI nakita ni Jairo ti babai a naagasan manipud iti panagpadarana, ti panagtalekna kadagiti namilagruan a pannakabalin ni Jesus awan duadua a dimmakkel. Iti nasapsapa a paset ti aldaw, kinalikaguman ni Jairo nga umay ni Jesus ket tulongan ti ay-ayatenna a 12-tawenna nga anakna a babai, a naidalit a dandanin matay. Ita, nupay kasta, ti pagbutbutngan unay ni Jairo napasamak. Bayat a makisasao pay laeng ni Jesus iti babai, sumagmamano a lallaki ti dimteng ket siuulimek nga imbagada ken ni Jairo: “Tay anakmo a babai natayen! Apay-apay alimutengem pay laeng ti mannursuro?”
Anian a makapakapsut dayta a damag! Panunotenyo laengen: Daytoy a tao, nga isut’ pakaipapaayan ti dakkel a panagraem iti ili, awanen a pulos ti gawayna itan idi maammuanna ti ipapatay ti anakna a babai. Ni Jesus, nupay kasta, naallingagna daydi sasawenda. Gapuna, timmaliaw ken ni Jairo, makaparegta a kinunana: “Dika agbuteng, mamatika laeng.”
Kinuyog ni Jesus ti maladingitan unay a lalaki a nagsubli iti pagtaenganna. Idi a makagtengda, naimatanganna dagiti agsangsangit ken agdungdung-aw iti napigsa. Naurnong ti adu a tattao, ket dandanogenda ti bagbagida gaput’ ladingitda. Idi simrek ni Jesus, sinaludsodna: “Apay-apay agdungdung-aw ken agsangsangitkayo? Ti ubing saan a natay, no di ket matmaturog.”
Idi nangngeganda daytoy, dagiti tattao mangrugida a nagkakatawa nga uy-uyongan ni Jesus agsipud ta ammoda a ti ubing a babai ket pudno a natayen. Ni Jesus, nupay kasta, kinunana nga isut’ matmaturog laeng. Babaen ti panangusarna kadagiti pannakabalin nga inted ti Dios kenkuana, ipakitana a mabalin a maisubli manipud ken patay dagiti tattao a kas iti kinalaka ti pannakariingda manipud iti nargaan a turog.
Ita pinaruar ni Jesus ti tunggal maysa malaksid ken ni Pedro, Santiago, Juan, ken ti ina ken ama ti natay nga ubing. Ket inkuyogna dagitoy a lima kenkuana ket napanda iti yan ti ubing. Ket idi nga iniggananna ti ima ti ubing, kinuna ni Jesus: “Talʹi·tha cuʹmi,” a no maipatarus, kayatna a sawen: “Balasang, kunak kenka, Tumakderka!” Ket dagdagus timmakder ti ubing ket nangrugi a magna! Dayta a buya ti ngangngani nakapukawan dagiti dadakkelna iti is-isipda gapu iti dakkel a ragsakda.
Kalpasan ti panangbilinna a maikkan ti ubing iti makanna, binilin ni Jesus ni Jairo ken ti asawana a dida ibagbaga iti asinoman ti adda a napasamak. Ngem agpapan pay kinuna ni Jesus, nagsaknap ti damag iti intero a disso. Daytoy ti maikadua a panagungar nga inaramid ni Jesus. Mateo 9:18-26; Marcos 5:35-43; Lucas 8:41-56.
▪ Ania a damag ti inawat ni Jairo, ket kasano iti panangparegta ni Jesus kenkuana?
▪ Ania ti kasasaad idi makagtengda idiay balay ni Jairo?
▪ Apay a kinuna ni Jesus a ti natay nga ubing ket matmaturog laeng?
▪ Asino dagiti lima a kadua ni Jesus a nakaimatang iti panagungar?