Kapitulo 49
Maysa Pay a Panangaskasaba Sadi Galilea
KALPASAN ti agarup dua a tawen a nasaknap a panangaskasaba, mangrugi kadin ni Jesus nga aginana? Maisupadi iti dayta, pinasaknapna ti panangaskasabana babaen iti panangrugina manen iti maysa pay a panagdaliasat, ti maikatlo idiay Galilea. Sinarungkaranna amin dagiti siudad ken purpurok iti teritoria, a nangisursuro kadagiti sinagoga ken inkaskasabana ti naimbag a damag ti Pagarian. Ti nakitana iti daytoy a panagdaliasat ti nangkumbinsir kenkuana nga ad-adda iti pannakasapul a palawaen ti panangaskasabana.
Sadinoman a napanan ni Jesus, nakitana dagiti adu a tattao nga agkasapulan iti naespirituan a panangagas ken liwliwa. Kasda la kadagiti karnero nga awanan ti pastor, a naliday ken nawarawarada, ket isut’ maasian kadakuada. Kunana kadagiti adalanna: “Pudno a ti anien adu, ngem bassit dagiti agani. Dawatenyo, ngarud, iti Apo ti anien tapno mangibaon koma kadagiti agani iti paganianna.”
Adda plano ni Jesus iti panagtignay. Inawaganna ti 12 nga apostolesna, a pinilina a ngangnganin makatawen sakbayna. Biningaybingayna ida iti sag-tunggal paris, a nangaramid ti innem a bunggoy dagiti manangaskasaba, ket binilinna ida. Inlawlawagna: “Dikay mapan iti dalan dagiti nasnasion, ket dikay sumrek iti siudad dagiti taga Samaria; no di ket, mapankayo nga umuna kadagiti karnero a napukaw iti balay ti Israel. Ket no mapankayo, mangaskasabakayo, a kunkunayo, ‘Ti pagarian ti langit dimtengen.’”
Daytoy a Pagarian nga ikaskasabada isu daydiay insuro ni Jesus a kararagenda iti modelo a kararag. Ti Pagarian ket asidegen iti kaipapanan a ti dinutokan ti Dios nga Ari, ni Jesu-Kristo, ket addan. Tapno maipasdek dagiti kredensial wenno pakabigbigan dagiti adalanna kas dagiti pannakabagi dayta napigpigsa ngem tao a gobierno, inikkan ni Jesus ida ti pannakabalin a mangagas ti masakit ken mangpagungar pay kadagiti natay. Binilinna nga aramidenda dagitoy nga awan baybayadna.
Sumaganad imbagana kadagiti adalanna a dida agar-aramid iti aniaman a material a panagsagana iti panagdaliasatda a panangasaba. “Dikay agbalon ti balitok uray pirak uray cobre kadagiti barikesyo, uray supot a maisagana iti dalan, uray dua a pagan-anay, uray sapatos wenno uray sarukod; ta ti mangmangged maikari iti taraonna.” Dagidiay mangapresiar ti mensahe agtignaydanto ket tumulongdanto iti taraon ken iti mapagdagusan. Kas kinuna ni Jesus: “Ket uray sadino a siudad ken purok a serkanyonto, birukenyo a nalaing idiay no asino ti maikari, ket agdaguskayo idiay agingga ti pumanawkayo.”
Kalpasanna nangted ti bilbilin ni Jesus no kasanot’ iyaasideg kadagiti bumalay nga addaan ti mensahe ti Pagarian. “Ket no sumrekkayo iti balay,” insurona, “agkablaawkayo; ket no ti balay maikari, ipaayyo koma kenkuana ti talnayo; ngem no saan a maikari, ti talnayo iyawidyo. Ket uray siasino a saan nga umawatto kadakayo ken saan a dumngeg kadagiti saoyo, no pumampanawkayon iti daydiay a balay wenno siudad pampagenyo ti tapuk dagiti saksakayo.”
Iti siudad a mangilaksid iti mensaheda, impalgak ni Jesus a pudno a nakaronto ti pannakaukomna. Inlawlawagna: “Pudno kunak kadakayo, Nalaglag-anto ti daga ti Sodoma ken Gomorra iti Aldaw ti Pannakaukom ngem iti daydiay a siudad.” Mateo 9:35–10:15; Marcos 6:6-12; Lucas 9:1-5.
▪ Kaanot’ panangrugi ni Jesus iti maikatlo a panangaskasaba a panagdaliasatna iti Galilea, ket aniat’ nangumbinsiran dayta kenkuana?
▪ Idi imbaonna dagiti 12 nga apostolesna a mangaskasaba, ania a bilbilin ti intedna kadakuada?
▪ Apay nga umiso ti panangisuro dagiti adalanna a ti Pagarian dimtengen?