Kapitulo 68
Kanayonan a Pannursuro iti Maikapito nga Aldaw
TI MAUDI nga aldaw ti Piesta dagiti Abong-abong, ti maikapito nga aldaw, ket kapeggesna pay laeng. Ni Jesus ti mangisursuro idiay paset ti templo a maaw-awagan “ti tesoreria.” Daytoy ti nalabit idiay disso a maaw-awagan Korte dagiti Babbai nga ayan dagiti lakasa a pangipisokan dagiti tattao ti kontribusionda.
Tunggal rabii bayat ti piesta, adda ti naisangsangayan a pabuya ti silaw iti daytoy a paset ti templo. Uppat a dadakkel a pagsilawan ti naikabil ditoy, tunggal maysa adda uppat a dadakkel a palanggana a napunno ti lana. Ti silaw manipud kadagitoy a pagsilawan, a mangpaspasged ti lana kadagiti 16 a palanggana, ket umdas ti kapigsana a manglawag iti aglawlaw iti kalalainganna a distansia iti rabii. Ti ibaga itatta ni Jesus ti mangipalagip kadagiti managdengngegna iti daytoy a pabuya. “Siak ti silaw ti lubong,” kuna ni Jesus. “Ti sumurot kaniak saanto a magna iti sipnget, no di ket addanto kenkuana ti silaw ti biag.”
Kimmontra dagiti Fariseo: “Sika saksiam ti bagim; ti pammaneknekmo saan a pudno.”
Kas sungbat kinuna ni Jesus: “Uray saksiak ti maipapan kaniak, pudno ti pangpaneknekko, ta ammok no adino ti naggapuak ken no adino ti papanak. Ngem dikay ammo no adino ti naggapuak ken no adino ti papanak.” Innayonna pay: “Siak ti mangpaneknek iti bagik ken paneknekannak ti Amak a nangibaon kaniak.”
“Adino ti ayan ti Amam?” kayat a maammuan dagiti Fariseo.
“Saandak nga ammo wenno ti Amak,” insungbat ni Jesus. “No ammodak koma, ammoyo met koma ni Amak.” Nupay kayat dagiti Fariseo a tiliwen ni Jesus, awan ti nangsagid kenkuana.
“Innakon,” kuna manen ni Jesus. “No adino ti papanak dikayo mabalin ti umay.”
Gapu itoy mangrugi nga agsiddaaw dagiti Judio: “Papatayennanto ngata ti bagina? Ta kunana, ‘No adino ti papanak, dikayo mabalin ti umay.’”
“Dakayo taga babakayo,” inlawlawag ni Jesus. “Siak taga ngatoak. Taga ditoy a lubong kayo; siak saanak a taga ditoy a lubong.” Kalpasanna innayonna: “Ta no dikayo patien a siak daydi, kadagiti basbasolyo mataykayto.”
Iti kinaagpaysona, ni Jesus tuktukoyenna ti panagbiagna sakbay ti panagtaona ken ti kasasaadna kas naikari a Mesias, wenno Kristo. Nupay kasta, insaludsodda, awan duadua a buyogen ti dakkel a pananglais: “Siasinoka?”
Gaput’ panangilaksidda, simmungbat ni Jesus: “Apay-apay a makisasaoak pay laeng kadakayo?” Kaskasdi intuloyna a kinuna: “Ti nangibaon kaniak ti napudno, ket dagiti nangngegko kenkuana dagitoy ti sawek iti lubong.” Intuloy ni Jesus: “Inton maibayogyon ti Anak ti tao, isunto ti pannakaammoyo a siak daydi ken awan ti aramidek a sisiak; no di ket kas iti insuro kaniak ni Ama dagitoy ti sawek. Ket ti nangibaon kaniak adda kaniak, saannak a binaybay-an a maymaysa, ta siak agnanayon nga aramidek dagiti makaay-ayo kenkuana.”
Idi nasao ni Jesus dagitoy a bambanag, adu ti namati kenkuana. Kadagitoy kinunana: “No agtalinaedkayo koma iti saok, pudno a dakayto ti adalak, ket maammuanyonto ti kinapudno, ket ti kinapudno luk-atannakayto.”
“Kaputotannakami ni Abraham,” insungbat dagiti bumusbusor kenkuana, “ket uray kaano awan ti nakatagabuanmi. Kasano ti panagkunam, ‘Maluk-atankayto’?”
Nupay dagiti Judio masansan nga addada idi iti sidong ti panangituray dagiti ganggannaet, saanda a binigbig ti asinoman a manangirurumen kas apoda. Madida a paawagan ad-adipen. Ngem intudo ni Jesus a ti kinapudnona isuda ti paad-adipen. Iti ania a pamay-an? “Pudno, pudno kunak kadakayo,” kinuna ni Jesus, “amin nga agaramid iti basol tagabu ti basol.”
Ti saanda a panangawat iti pannakaadipenda iti basol ti nangikabil kadagiti Judio iti napeggad a kasasaad. “Ti tagabu saan nga agtaeng iti balay nga agnanayon,” inlawlawag ni Jesus. “Ti anak agtaeng nga agnanayon.” Yantangay ti adipen ket awan dagiti kalinteganna nga agtawid, isut’ mabalin nga agpegpeggad iti pannakapapanaw iti aniaman a kanito. Ti laeng anak nga aktual a naiyanak wenno natagibi ti sangakabbalayan ti agtalinaed nga “agnanayon,” kayatna a sawen, aginggana nga isu ti sibibiag.
“No ngarud ti Anak luk-atannakayo,” intuloy ni Jesus, “pudno nga agwayawayakayto.” Gapuna, ti kinapudno nga isut’ mangwayawaya kadagiti tattao isu ti kinapudno maipapan iti Anak, ni Jesu-Kristo. Babaen laeng iti daton ti perpekto a natauan a biagna a ti maysa mawayawayaan manipud iti makapapatay a basol. Juan 8:12-36.
▪ Sadino ti nangisuruan ni Jesus iti maikapito nga aldaw? Aniat’ napasamak sadiay iti rabii, ket kasano ti pannakainaig daytoy iti pannursuro ni Jesus?
▪ Aniat’ kinuna ni Jesus maipapan ti namunganayanna, ket aniat’ ipanayag daytoy maipapan iti kinaisuna?
▪ Iti ania a pamay-an a maad-adipen dagiti Judio, ngem ania a kinapudno ti mangwayawaya kadakuada?