Kapitulo 70
Panangagas iti Lalaki a Naiyanak a Bulsek
IDI a dagiti Judio padpadasenda nga uboren ni Jesus, saanna a pinanawan ti Jerusalem. Kamaudiananna, iti aldaw ti Panaginana, isu ken dagiti adalanna magmagnada iti siudad idi makakitada ti maysa a lalaki a bulsek manipud pannakaiyanakna. Insaludsod dagiti adalan ken Jesus: “Mannursuro, asino ti nakabasol, daytoy a tao wenno dagiti dadakkelna, iti kasta naiyanak a bulsek?”
Nalabit patien dagiti adalanna, kas kadagiti dadduma a mannursuro, a mabalin nga agbasol ti maysa a tao iti aanakan ni inana. Ngem simmungbat ni Jesus: “Saan a nagbasol uray daytoy a tao wenno uray dagiti dadakkelna, ngem tapno dagiti aramid ti Dios maiparangarangda kenkuana.” Ti kinabulsek ti lalaki ket saan a bunga ti espesipiko a biddut wenno basol a naaramidan ti lalaki wenno dagiti dadakkelna. Ti basol ti immuna a tao a ni Adan ti nangibunga iti panagbalin nga imperpekto dagiti amin a tattao, ket gapu itoy natnagda kadagiti depekto kas iti pannakaiyanak a bulsek. Daytoy a depekto iti lalaki itan ti nangited iti gundaway ken ni Jesus a mangiparangarang kadagiti ar-aramid ti Dios.
Impaganetget ni Jesus ti kinaganat ti panangaramid kadagitoy nga ar-aramid. “Rebbengtayo nga aramiden dagiti aramid ti nangibaon kaniak bayat ti aldaw,” kunana. “Ti rabii umay inton awan ti makabalin nga agaramid. Bayat ti kaaddak ditoy lubong, siak ti silaw ti lubong.” Iti di agbayagen ti ipapatay ni Jesus ti mangikabil kenkuana iti kinasipnget ti tanem a sadiay awanen ti maaramidanna. Kabayatanna, isu ti gubuayan iti lawag ti lubong.
Kalpasan ti panangisaona kadagitoy a bambanag, timmupra ni Jesus iti daga ket nangaramid ti pitak iti natupraan. Inkabilna daytoy iti mata daydi lalaki a bulsek ket kinunana: “Inka agdiram-oska idiay tangke ti Siloam.” Ti lalaki ket nagtulnog. Ket idi a napan, naisubli ti panagkitana! Anian ti panagragsakna idi isut’ nagsubli, ta isu ti nakakita a damdamo iti panagbiagna!
Dagiti kakaarruba ken dagiti dadduma a makaammo kenkuana nagsiddaawda. “Saan a daytoy aya daydiay agtugtugaw ken makilimlimos?” insaludsodda. “Isu daytoy,” insungbat dagiti dadduma. Ngem dagiti dadduma ket saanda a mamati: “Saan, no di ket umasping kenkuana.” Kaskasdi kinuna ti lalaki: “Siak.”
“Kasano ngarud, ti pannakalukat dagiti matam?” kayat a maammuan dagiti tattao.
“Ti tao a managan Jesus nangaramid ti pitak ket sinapsappuanna dagiti matak ket kinunana kaniak, ‘Inka idiay Siloam ket agdiram-oska.’ Napanak ngarud ket nagdiram-osak ket nakakitaak.”
“Adino ti ayan dayta a tao?” insaludsodda.
“Diak ammo,” insungbatna.
Ita dagiti tattao impanda daydi tao a bulsek idi kadagiti narelihiusuan a papangulo, dagiti Fariseo. Ket dagitoy ti nagsalsaludsod met no kasano ti pannakakitana. “Nangikabil ti pitak kadagiti matak, ket nagdiram-osak ket nakakitaak,” inlawlawag ti lalaki.
Sigurado, rebbeng a dagiti Fariseo agrag-oda koma iti naagasan a makilimlimos! Ngem imbes ketdi, linabananda ni Jesus. “Daytoy a tao saan a naggapu iti Dios,” kunada. Apay a kinunada daytoy? “Ta saanna a ngilinen ti aldaw a Panaginana.” Kaskasdi nagsiddaaw dagiti dadduma a Fariseo: “Kasano ti pannakabalin ti maysa a tao a managbasol a mangaramid kadagiti kakasta a pagilasinan?” Gapuna adda panagsusupadi kadakuada.
Gapuna, kinunada manen iti lalaki: “Ania ti kunaem kenkuana, idinto a linukatanna dagiti matam?”
“Isu ti maysa a mammadto,” insungbatna.
Ket dagiti Fariseo madida a patien daytoy. Kumbinsidoda a mabalin adda maysa a nalimed a panagtulag ni Jesus ken daytoy a lalaki a manguy-uyong kadagiti tattao. Gapuna tapno makedngan dayta a banag, inawaganda dagiti nagannak ti agpalpalimos tapno pagsaludsodanda ida. Juan 8:59; 9:1-18.
▪ Aniat’ responsable iti kinabulsek ti lalaki ken aniat’ saan a responsable?
▪ Ania ti rabii inton awanen ti tao a makapagaramid?
▪ Idi a naagasan ti lalaki, ania ti rikna dagidiay makaammo kenkuana?
▪ Kasano a nabingaybingay dagiti Fariseo iti pannakaagas ti lalaki?