Kapitulo 95
Dagiti Leksion iti Diborsio ken Ayat iti Annak
NI Jesus ken dagiti adalanna addada iti dalanda nga agturong idiay Jerusalem tapno tabunuan ti Paskua iti 33 K.P. Ballasiwenda ti Karayan Jordan ket alaenda ti ruta a lumasat iti distrito ti Perea. Sumagmamano a lawas a nasapsapa, ni Jesus ket adda idiay Perea, ngem idin isut’ naayaban idiay Judea agsipud ta masakit ni Lazaro a gayyemna. Bayat ti kaaddana idi idiay Perea, nakisao ni Jesus kadagiti Fariseo maipapan iti diborsio, ket ita imbangonda manen dayta a banag.
Kadagiti Fariseo adda dagiti nadumaduma a kapanunotan maipapan iti diborsio. Kinuna ni Moises a ti maysa a babai mabalin a maidiborsio gapu iti “maysa nga aramid a di maitutop.” Patien dagiti dadduma a daytoy tuktukoyenna laeng ti di kinadalus. Ngem dadduma ibilangda a ti “maysa nga aramid a di maitutop” iramanna ti nalag-an a basbasol. Gapuna, tapno suotenda ni Jesus, insaludsod dagiti Fariseo: “Maipalubos kadi iti lalaki nga isinana ti asawana iti amin a gapu?” Agtalekda nga aniaman a sawen ni Jesus pataudenna ti pannakisuppiatna kadagiti Fariseo nga addaan naidumduma a panangmatmat.
Tinaming ni Jesus ti saludsod a sisisigo, a saanna nga inusar dagiti natauan nga opinion, no di ket nagturong iti orihinal nga urnos ti panagasawa. “Dikay pay aya nabasa,” insaludsodna, “a ti namarsua manipud iti damo inaramidna ida a lalaki ken babai ket kinunana, ‘Gapu itoy ti lalaki panawannanto ti ama ken inana ket makitiponto iti asawana, ket isuda a dua maymaysadanto a lasag’? Iti kasta saandan a dua, no di maymaysa a lasag. Gapuna ti pinagtipon ti Dios a maymaysa saan koma a pagsinaen ti tao.”
Impakita ni Jesus, a ti orihinal a panggep ti Dios, ket isut’ panagmaymaysa dagiti agasawa, a saandanto nga agdiborsio. No pudno a kasta, simmungbat dagiti Fariseo, “apay, ngarud, nga imbilin ni Moises ti panangted ti surat ti pannakisina ket sa pagtalawen?”
“Gapu iti tangken dagiti puspusoyo impalubos ni Moises kadakayo a pagtalawenyo dagiti assawayo,” insungbat ni Jesus, “ngem idi damo saan a kasta.” Wen, idi imbangon ti Dios ti pudno a pagalagadan maipaay iti panagasawa idiay hardin ti Eden, awan inaramidna a probision para iti diborsio.
Ni Jesus intuloyna a kinuna kadagiti Fariseo: “Ket siak kunak kadakayo a siasinoman a mangtalawto iti asawana a babai no saan a maipuon iti pannakiabig [Griego, por·neiʹa], ket makiasawa iti sabali makabasol iti pannakiabig.” Impakitana ngarud a ti por·neiʹa, a daytat’ nakaro a seksual nga imoralidad, ket isu laeng ti inanamongan ti Dios a pakaibatayan ti diborsio.
Iti pannakabigbig a ti panagasawa ket masapul a manayon a panagkaykaysa a ti pannakiabig laeng ti pakaibasaran ti diborsio, natignay dagiti adalan nga agkuna: “No kastoy ti kasasaad ti lalaki iti asawana, nasaysayaat ti saan a mangasawa.” Awan panagduadua a ti maysa nga agpalplano a mangasawa masapul a siseserioso a panunotenna ti kinapermanente ti singgalut ti panagasawa!
Intuloy ni Jesus ti nagsao maipapan iti kinawaywayas. Inlawlawagna a sumagmamano ti naiyanak nga eunuko, a dida mabalin ti agasawa gapu ta awan seksual a pannakapatanorda. Dadduma ti pinagbalin dagiti tattao nga eunuko, a siuulpitda a nabaldado iti seksual. Kamaudiananna, dadduma laplappedanda ti tarigagay nga agasawa ken mangtagiragsak iti seksual a relasion tapno ad-adda a maipaayda a naan-anay ti bagbagida kadagiti banag a mainaig iti Pagarian ti langit. “Ti makabalin nga umawat itoy [kinawaywayas] awatenna koma,” inkonklusion ni Jesus.
Idin dagiti tattao inyegda dagiti babassit nga annakda ken Jesus. Dagiti adalan, nupay kasta, inungtanda dagiti ubbing ket pinadasda a pagtalawen ida, awan duadua a kayatda a salakniban ni Jesus manipud iti di nasken a pannakariribuk. Ngem kinuna ni Jesus: “Bay-anyo dagiti ubbing a babassit nga umay kaniak; ket dikay pawilan ida, ta dagiti kakastoy kukuada ti pagarian ti langit. Pudno kunak kadakayo, Ti saan nga umawat iti pagarian ti Dios a kasla maysa nga ubing, dinto sumrek kenkuana.”
Anian a nagsayaat a leksion ti impaay ditoy ni Jesus! Tapno awaten ti Pagarian ti Dios, masapul a tuladentayo ti kinapakumbaba ken kinaalisto a pannakaisuro dagiti babassit nga ubbing. Ngem ti ehemplo ni Jesus iyilustrarna met no kasanot’ kinapateg, nangnangruna para kadagiti nagannak, ti panangbusbusda iti panawen para iti annakda. Idin impakita ni Jesus ti panagayatna kadagiti ubbing babaen iti panangarakupna ken panangbendisionna kadakuada. Mateo 19:1-15; Deuteronomio 24:1; Lucas 16:18; Marcos 10:1-16; Lucas 18:15-17.
▪ Ania dagiti nadumaduma a panangmatmat dagiti Fariseo iti diborsio, ket iti kasta kasanot’ panangsuotda ken Jesus?
▪ Kasanot’ panangtaming ni Jesus iti panangsuot dagiti Fariseo kenkuana, ket aniat’ intedna kas kakaisuna a pakaibatayan ti diborsio?
▪ Apay a kinuna dagiti adalan ni Jesus a nasaysayaat ti saan a mangasawa, ket ania a rekomendasion ti impaay ni Jesus?
▪ Aniat’ isuro kadatayo ni Jesus iti pannakilangenna kadagiti babassit nga ubbing?