Dagiti Espiritu Saanda a Nagbiag ken Natay Ditoy Daga

Adda dagiti espiritu! Iti di makita a lugar dagiti espiritu, addada agpadpada dagiti naimbag ken dakes nga espiritu. Tattaoda kadi a nagbiag ken natay ditoy daga?

Saan, saanda a kasta. No matay ti maysa a tao, saan a mapan iti lubong dagiti espiritu, kas ipagarup ti adu a tattao. Kasano nga ammotayo daytoy? Agsipud ta ti Biblia kunaenna a kasta. Ti Biblia ket libro ti kinapudno nga aggapu iti kakaisuna a pudno a Dios, a ti naganna ket Jehova. Pinarsua ni Jehova dagiti tattao; ammona ti mapasamak kadakuada no matayda.—Salmo 83:18; 2 Timoteo 3:16.

Ti Biblia kunaenna a ti Dios binukelna ni Adan, ti umuna a tao, “manipud iti tapuk ti daga.” (Genesis 2:7) Isut’ inkabil ti Dios idiay Paraiso, ti minuyongan ti Eden. No nagtulnog koma ni Adan iti linteg ni Jehova, saan koma a natay; sibibiag koma pay ditoy daga itatta. Ngem idi inggagara ni Adan a sinalungasing ti linteg ti Dios, kinuna ti Dios kenkuana: “Agsublikanto iti daga, ta isu ti nakabuklam. Ta tapukka ket iti tapuk agsublikanto.”—Genesis 3:19.

Aniat’ kaipapanan daytoy? Bueno, sadino ti ayan ni Adan sakbay a pinarsua ni Jehova manipud iti tapuk? Awan iti sadinoman. Saan a maysa a di naiyanak nga espiritu idiay langit. Isut’ awan. Gapuna idi a kinuna ni Jehova a ni Adan “agsublinto iti daga,” kayatna a sawen a matayto ni Adan. Saan a napan idiay lugar dagiti espiritu. Idiay ipapatay, nagbalin manen ni Adan nga awan biagna, naawan. Ti ipapatay ket kinaawan ti biag.

Ngem dagiti ngay dadduma a natnatayen? Naawanda kadi met? Sumungbat ti Biblia:

• “Isuda amin [agpadpada dagiti tattao ken an-animal] mapanda iti maymaysa a disso. Isuda amin aggapuda iti tapuk, ket isuda amin agsublida iti tapuk.”—Eclesiastes 3:20.

• “Dagiti natay . . . dida ammo ti aniaman.”—Eclesiastes 9:5.

• “Ti ayatda ken ti gurada ken ti apalda napukawen iti nabayag.”—Eclesiastes 9:6.

• “Awan ti aramid wenno gakat wenno pannakaammo wenno sirib idiay Sheol [ti tanem], a papanam.”—Eclesiastes 9:10.

• “[Ti tao] agpulang iti dagana; iti dayta met la nga aldaw dagiti pampanunotna mapukawda.”—Salmo 146:4.

Narigatyo aya nga awaten dagitoy a kasuratan? No kasta, panunotenyo daytoy: Iti adu a pamilia, ti lalaki mangged iti kuarta tapno masuportaranna ti sangakabbalayanna. No matay ti lalaki, masansan a ti pamiliana agsagaba iti rigat. No dadduma ti asawana ken dagiti annakna awananda pay ti umdas a kuarta a panggatang iti taraon. Nalabit dagiti kabusor ti lalaki abusarendanto ida. Ita saludsodanyo ti bagiyo: ‘No dayta a lalaki sibibiag idiay lubong dagiti espiritu, apay dina maitultuloy nga ipaayan ti pamiliana? Apay dina masalakniban ti pamiliana manipud dakes a tattao?’ Gapu ta dagiti kasuratan umisoda. Dayta a lalaki ket awanen ti biagna, saanen a makaaramid ti aniaman a banag.—Salmo 115:17.

Kaipapananna kadi daytoy a dagiti natay didanto pulos agbiag manen? Saan. Pagsasaritaantayto ti maipapan iti panagungar iti maud-udi. Ngem kaipapananna dayta a dagiti natay dida ammo no ania ti ar-aramidenyo. Saandakay makita, mangngeg, wenno makasao. Di kasapulan a kabutengyo ida. Saandakay matulongan, ket didakayo met madangran.—Eclesiastes 9:4; Isaias 26:14.