No Kasanot’ Panangmatmat Dagiti Saksi ni Jehova iti Edukasion
Kas iti amin a nagannak, maseknan dagiti Saksi ni Jehova iti masakbayan dagiti annakda. Isut’ gapuna a dakkel ti panangipategda iti edukasion. “Ti edukasion rebbeng a tulonganna dagiti tattao nga agbalin a naserbi a kamkameng ti kagimongan. Rebbeng a tulonganna met ida a mangipateg iti natawidda a kultura ken maaddaan iti ad-adda a makapnek a panagbiag.”
KAS ipamatmat dagitoy a sasao a naadaw iti The World Book Encyclopedia, ti maysa kadagiti kangrunaan a panggep ti panagadal isu ti panangsanay kadagiti ubbing iti inaldaw a panagbiag, a pakairamanan ti panangtulong kadakuada a mangasikaso kadagiti kasapulan ti maysa a pamilia iti masanguanan. Patien dagiti Saksi ni Jehova a maysa daytoy a sagrado a pagrebbengan. Kuna ti Biblia a mismo: “Pudno unay no ti asinoman dina taraonan dagidiay bukodna, ken nangnangruna kadagidiay kameng ti sangakabbalayanna, pinaglikudanna ti pammati ket isu dakdakes ngem ti tao nga awanan pammati.” (1 Timoteo 5:8) Dagiti tawen a mabusbos idiay eskuelaan isaganana dagiti annak kadagiti pagrebbengan iti biag a maipabaklayto kadakuada. Gapuna, patien dagiti Saksi a ti edukasion ket rumbeng nga ipateg unay.
“Ti edukasion rebbeng a tulonganna dagiti tattao nga agbalin a naserbi a kamkameng ti kagimongan. Rebbeng a tulonganna met ida a mangipateg iti natawidda a kultura ken maaddaan iti ad-adda a makapnek a panagbiag.”—The World Book Encyclopedia
Ikagkagumaan dagiti Saksi ti agbiag a mayannurot iti bilin ti Biblia nga: “Aniaman nga aramidenyo, ipapusoyo a kasla maipaay iti Apo a saan a kadagiti tattao.” (Colosas 3:23, Today’s English Version) Agaplikar daytoy a prinsipio iti amin a paset ti inaldaw a panagbiag, a pakairamanan ti eskuelaan. Gapuna, parparegtaen dagiti Saksi ti annakda a saetanda ti agadal ken ipasnekda nga aramiden dagiti annongenda idiay eskuelaan.
“Aniaman nga aramidenyo, ipapusoyo a kasla maipaay iti Apo.”—Colosas 3:23, Today’s English Version
Isursuro met ti Biblia ti panagpasakup kadagiti linteg ti daga a pagnanaedan ti maysa. Isu a no inkapilitan ti panageskuela agingga iti naikeddeng nga edad, agtulnog dagiti Saksi ni Jehova iti daytoy a linteg.—Roma 13:1-7.
Napateg ti paset dagiti makagunggona a paglinglingayan, musika, pagesman, pisikal nga ehersisio, ken isasarungkar kadagiti libraria ken museo iti natimbeng nga edukasion
Nupay dina tagibassiten ti kinapateg ti panagsanay para iti inaldaw a panagbiag, ipakita ti Biblia a saan a daytoy ti kakaisuna wenno kangrunaan a kalat ti edukasion. Ti naballigi nga edukasion rumbeng a patanorenna met kadagiti ubbing ti rag-o ti panagbiag ken tulonganna ida nga agbalin a natimbeng a kamkameng ti kagimongan. Gapuna, ibilang dagiti Saksi ni Jehova a nagpateg ti panangpili kadagiti aktibidad iti ruar ti pagadalan. Patienda a napateg ti paset dagiti makagunggona a paglinglingayan, musika, pagesman, pisikal nga ehersisio, isasarungkar kadagiti libraria ken museo, ken dadduma pay, iti natimbeng nga edukasion. Kanayonanna, isuroda dagiti annakda a mangraem kadagiti nataengan ken mangsapul kadagiti gundaway a mapagserbianda ida.
Ti Ngay Kanayonan nga Edukasion?
Gapu iti baro a teknolohia, kanayon nga agbaliwbaliw dagiti gundaway iti trabaho. Kas resultana, adu nga agtutubo ti mapilitan nga agtrabaho kadagiti tay-ak wenno aramid a saanda a sinursuro. Tangay kasta ti kasasaad, ad-adda a napateg kadakuada ti kababalinda iti trabaho ken personal a panagsanay, nangruna ti abilidadda a makibagay iti nadumaduma a kasasaad. Gapuna, nasaysayaat no agbalin dagiti estudiante nga adulto nga addaan, sigun iti Renaissance essayist a ni Montaigne, ‘iti nasayaat-pannakasukogna nga ulo imbes a namnamsek nga ulo.’
Dagiti agtutubo a kurang ti kualipikasionna ti masansan nga apektaran ti kinaawan panggedan, agpadpada kadagiti nabaknang ken napanglaw a dagdaga. Gapuna, no kiddawen ti trabaho ti panagsanay kas nayon ti kabassitan nga ipaannurot ti linteg, adda kadagiti nagannak a mangiwanwan iti annakda nga agdesision maipapan iti kanayonan nga edukasion, a tingitingenda agpadpada ti mainanama a gunggona ken dagiti sakripisio a kakuyog dagiti kasta a kanayonan a panagadal.
Nupay kasta, mabalin nga umanamongkayo a saan laeng a basta material a kinarang-ay ti ramanen ti naballigi a panagbiag. Kadagiti kallabes a tiempo, napukawan iti namnama dagiti lallaki ken babbai a nairarem iti karerada iti intero a panagbiagda idi naawananda iti trabaho. Insakripisio dagiti dadduma a nagannak ti biag ti pamiliada ken ti panawen nga impaayda koma kadagiti annakda, a naliwayanda a tulongan ida nga agmataengan, gapu ta ti laeng sekular a trabaho ti pakakumikomanda.
Nalawag, rumbeng nga ikonsiderar ti natimbeng nga edukasion a saan laeng a material a kinarang-ay ti kasapulan tapno agbalintayo a pudpudno a naragsak. Kinuna ni Jesu-Kristo: “Adda a naisurat: ‘Saan laeng a tinapay ti pagbiag ti tao, no di ket ti tunggal sao nga aggapu iti ngiwat ti Dios.’” (Mateo 4:4, New International Version) Kas Kristiano, bigbigen dagiti Saksi ni Jehova ti kinapateg ti panangpatanor kadagiti moral ken naespirituan a galad ken kasta met ti panangisagana iti bagbagida a mangasikaso kadagiti material a kasapulanda.