Konklusion

SAAN a panggep daytoy a broshur a salaysayen amin a narelihiusuan a pammati dagiti Saksi ni Jehova. Ngem ketdi, inkagumaanmi nga ilawlawag ti sumagmamano kadagiti prinsipio a patpatien dagiti Saksi ken ipakita a silalawag ti kita ti impluensia ti pamilia a mangapektar kadagiti estudianteyo no dagiti nagannak wenno ti maysa kadakuada ket Saksi.

Dakkel ti panangipateg dagiti Saksi ni Jehova iti naespirituan nga irarang-ay dagiti annakda. Ket agtalekda a makatulong daytoy iti irarang-ay dagiti annakda iti dadduma pay a banag. Dagiti patpatienda ken prinsipio a sursurotenda ikkanna ti biagda iti kaipapanan ken tumultulong kadakuada a mangtaming kadagiti inaldaw a parikutda. Mainayon pay, dagidiay a pammati ken prinsipio rumbeng a tignayenna ida a mangikagumaan nga agbalin a napasnek nga estudiante ken nasayaat nga umili bayat ti panagbiagda.

Ikagkagumaan dagiti Saksi ti agbalin a realistiko maipapan iti biag, isu a dakkel ti panangipategda iti edukasion. Gapuna, tarigagayanda ti makitinnulong kadakayo iti amin a kabaelanda. Iti biangda, iti pagtaenganda ken iti lugar a pagdaydayawanda iti intero a lubong, itultuloyda a paregtaen dagiti annakda a mangtungpal iti akemda iti daytoy nabunga a panagtitinnulong.