Leksion 5
Ania ti Panggep ti Dios iti Daga?
Apay a pinarsua ni Jehova ti daga? (1, 2)
Apay a saan a paraiso ti daga ita? (3)
Anianto ti mapasamak kadagiti dakes a tattao? (4)
Iti masanguanan, anianto ti aramiden ni Jesus kadagiti masakit? kadagiti lallakay ken babbaket? kadagiti natay? (5, 6)
Tapno mairanud kadagiti bendision iti masanguanan, ania ti masapul nga aramidenyo? (7)
1. Pinarsua ni Jehova daytoy daga tapno matagiragsak dagiti tao ti agbiag nga agnanayon iti dayta. Kayatna a ti daga kanayon a pagnaedan dagiti nalinteg, naragsak a tattao. (Salmo 115:16; Isaias 45:18) Saan a madadael ti daga uray kaano; agtalinaed dayta iti agnanayon.—Salmo 104:5; Eclesiastes 1:4.
2. Sakbay nga inaramid ti Dios ti tao, nangpili iti bassit a paset ti daga ket pinagbalinna a napintas a paraiso. Inawaganna dayta iti minuyongan ti Eden. Insaadna sadiay ti immuna a lalaki ken babai, da Adan ken Eva. Pinanggep ti Dios a maaddaanda iti annak ket punnuenda ti intero a daga. In-inut a pagbalinenda a paraiso ti intero a daga.—Genesis 1:28; 2:8, 15.
3. Nagbasol da Adan ken Eva babaen ti sipapakinakem a pananglabsingda iti linteg ti Dios. Isu a pinagtalaw ida ni Jehova iti minuyongan ti Eden. Napukaw ti paraiso. (Genesis 3:1-6, 23) Ngem saan a linipatan ni Jehova ti panggepna iti daytoy a daga. Inkarina a pagbalinennanto a paraiso, a pagnaedanto nga agnanayon dagiti tao. Kasanona nga aramiden daytoy?—Salmo 37:29.
4. Sakbay nga agbalin a paraiso daytoy daga, masapul a maikkat nga umuna dagiti dakes a tattao. (Salmo 37:38) Mapasamakto daytoy inton Armagedon, ti gubat ti Dios a manggibus iti kinadakes. Kalpasanna, maibaludto ni Satanas iti 1,000 a tawen. Kaipapanan daytoy nga awanto ti matda a dakes a tattao a mangmulit iti daga. Ti laeng ili ti Dios ti makalasat.—Apocalipsis 16:14, 16; 20:1-3.
5. Kalpasanna, kas Ari iturayanto ni Jesu-Kristo daytoy a daga iti las-ud ti 1,000 a tawen. (Apocalipsis 20:6) In-inut nga ikkatennanto ti basol iti panunot ken bagitayo. Agbalintayto a perpekto a tattao kas kada Adan ken Eva idi sakbay a nagbasolda. Iti kasta awanton ti sakit, panaglakay, ken ipapatay. Mapaimbagto dagiti masakit a tattao, ket umubingto manen dagiti lallakay ken babbaket.—Job 33:25; Isaias 33:24; Apocalipsis 21:3, 4.
6. Bayat ti Sangaribu a Tawen a Panagturay ni Jesus, agtrabahonto dagiti matalek a tattao tapno pagbalinenda a paraiso ti intero a daga. (Lucas 23:43) Kasta met, riniwriw kadagiti natay ti mapagungarto ditoy daga. (Aramid 24:15) No aramidenda ti kalikaguman ti Dios kadakuada, agtultuloydanto nga agbiag ditoy daga iti agnanayon. No saan, madadaeldanto nga agnanayon.—Juan 5:28, 29; Apocalipsis 20:11-15.
7. Iti kasta agballiginto ti orihinal a panggep ti Dios iti daga. Kayatyo kadi ti mairanud kadagitoy a bendision iti masanguanan? No wen, masapul nga itultuloyyo nga adalen ti maipapan ken Jehova ken tungpalen dagiti ipaannurotna. Makatulong kadakayo a mangaramid iti dayta ti itatabuno kadagiti gimong iti lokal a Kingdom Hall dagiti Saksi ni Jehova.—Isaias 11:9; Hebreo 10:24, 25.
[Ladawan iti panid 10]
Ti napukaw a paraiso
[Dagiti Ladawan iti panid 11]
Kalpasan ti Armagedon, agbalinto a paraiso ti daga