Leksion 14
No Kasanot’ Pannakaorganisar Dagiti Saksi ni Jehova
Kaano a nangrugi ti moderno-aldaw a pakasaritaan dagiti Saksi ni Jehova? (1)
Kasanot’ pannakaikondukta dagiti gimong dagiti Saksi ni Jehova? (2)
Kasanot’ pannakapataud ti kuarta a magasto? (3)
Siasino ti mangidadaulo iti tunggal kongregasion? (4)
Aniada a daddadakkel a panagtataripnong ti maang-angay iti tinawen? (5)
Ania a trabaho ti maar-aramid iti hedkuarterda ken kadagiti sanga nga opisina? (6)
1. Nangrugi idi dekada 1870 ti moderno-aldaw a pakasaritaan dagiti Saksi ni Jehova. Idi damo, naawaganda iti Estudiante ti Biblia. Ngem idi 1931 inawatda ti Nainkasuratan a nagan a Saksi ni Jehova. (Isaias 43:10) Manipud iti bassit a pangrugian dimmakkel ti organisasion a buklen itan ti minilion a Saksi, nga okupado a mangaskasaba iti nasurok a 230 a daga.
2. Mamitlo iti kada lawas nga aggigimong ti kaaduan a kongregasion dagiti Saksi ni Jehova. Maawiskayo a tumabuno iti aniaman kadagitoy. (Hebreo 10:24, 25) Ti Biblia ti pakaibatayan ti maisursuro. Maluktan ken maserraan iti kararag dagiti gimong. Makanta met dagiti naimpusuan a “naespirituan a kankanta” iti kaaduan a gimong. (Efeso 5:18, 19) Libre ti tumabuno, ken awan maaramid a panagkolekta.—Mateo 10:8.
3. Ang-angayen ti kaaduan a kongregasion dagiti gimong iti Kingdom Hall. Simple dagitoy a pasdek a binangon dagiti boluntario a Saksi. Awan makitayo nga imahen, krusipiho, wenno bambanag a kas kadagitoy iti Kingdom Hall. Aggapu kadagiti boluntario a donasion ti kuarta a magasto. Kadagidiay mayat nga agdonar, adda kahon a pagipisokan iti kontribusion.—2 Corinto 9:7.
4. Iti tunggal kongregasion, adda dagiti panglakayen, wenno manangaywan. Isuda ti mangidaulo iti panangisuro iti kongregasion. (1 Timoteo 3:1-7; 5:17) Tultulongan ida dagiti ministerial nga adipen. (1 Timoteo 3:8-10, 12, 13) Saan a natantan-ok dagitoy a lallaki ngem kadagiti dadduma iti kongregasion. (2 Corinto 1:24) Saanda a naikkan kadagiti naisangsangayan a titulo. (Mateo 23:8-10) Saan a naiduma ti panagkawkawesda kadagiti sabsabali. Saanda met a matangdanan iti trabahoda. Sitatallugod nga as-asikasuen dagiti panglakayen ti naespirituan a kasapulan ti kongregasion. Mangliwliwa ken mangiwanwanda no narigat ti kasasaad.—Santiago 5:14-16; 1 Pedro 5:2, 3.
5. Tinawen met a mangang-angay dagiti Saksi ni Jehova iti dadakkel nga asamblea wenno kombension. Kadagitoy a tiempo agtataripnong ti adu a kongregasion maipaay iti naisangsangayan a programa a panangisuro iti Biblia. Regular a paset ti programa iti tunggal asamblea wenno kombension ti pannakabautisar dagiti baro nga adalan.—Mateo 3:13-17; 28:19, 20.
6. Adda idiay New York ti sangalubongan a hedkuarter dagiti Saksi ni Jehova. Adda sadiay ti Bagi a Manarawidwid, maysa a kangrunaan a grupo dagiti adda padasna a panglakayen a mangay-aywan iti sangalubongan a kongregasion. Adda met nasurok a 100 a sanga nga opisina iti intero a lubong. Kadagitoy a lugar, tumultulong dagiti boluntario a mangimaldit ken mangipatulod kadagiti literatura ti Biblia. Maipapaay met ti panangiwanwan iti pannakaorganisar ti trabaho a panangasaba. Apay a diyo iplano ti sumarungkar iti sanga nga opisina a kaasitgan kadakayo?