Ti Libro a Kasasaknapan ti Pannakaiwarasna iti Lubong
“Ti Biblia ti kaaduan a mabasbasa a libro iti historia. . . . Ad-adu a kopia ti Biblia ti naiwarasen ngem iti aniaman a libro. Naipatarus metten ti Biblia iti ad-adu a daras, ken iti ad-adu a lenguahe, ngem iti aniaman a libro.”—“The World Book Encyclopedia.”1
ITI dadduma a banag, kaaduan a libro umaspingda kadagiti tattao. Lumtuadda, agdinamagda, ket—malaksid iti sumagmamano a klasika—dumaan ken pumusayda. Masansan nga agserbi dagiti libraria a pagitaneman kadagiti di mabilang a liblibro a lausen, di mabasbasa ken bale, natayen.
Nupay kasta, naidumduma ti Biblia uray kadagiti klasikal a libro. Nupay 3,500 a tawenen ti naglabas idi nairugi a naisurat, kaskasdi a sibibiag pay la unay. Isu pay laeng ti libro a kasasaknapan ti pannakaiwarasna ditoy daga.a Tunggal tawen, agarup 60 a milion a kopia ti kompleto a Biblia wenno pasetna ti maiwarwaras. Ti immuna nga edision a naimaldit iti makina a pagimprenta ket naaramid iti imprenta ti Aleman nga imbentor a ni Johannes Gutenberg idi agarup 1455. Manipud idi mapattapatta nga adda uppat a bilion a Biblia (kompleto wenno pasetna) ti naimalditen. Awan sabali a libro, relihioso man wenno saan, a makakamat iti kasta a kaadu.
Ti Biblia ti kasasaknapan met ti pannakaipatarusna a libro iti historia. Naipatarusen iti nasurok a 2,100 a lenguahe ken dialekto ti kompleto a Biblia wenno pasetna.b Mabasa ti nasurok a 90 a porsiento kadagiti pamilia ti tao ti paset ti Biblia iti bukodda a pagsasao.2 No kasta dinaliasaten daytoy a libro ti pagbedngan dagiti nasion ken pinarmekna dagiti lapped a namagsisina kadagiti rasa ken tribu.
Nalabit ti estadistika saanna nga ipaay ti umdas a rason tapno usigenyo ti Biblia. Nupay kasta, ti dagup ti naiwaras ken kaadu ti nakaipatarusanna nakaskasdaaw, a paneknekanda a ti Biblia magustuan ti sangalubongan. Ngarud maikari a sukimatenyo ti libro a kaaduan pannakaisaknapna ken pannakaipatarusna iti intero a pakasaritaan ti tao.
[Footnotes]
a Maipagarup a ti sumaruno a kasasaknapan ti pannakaiwarasna a publikasion isu ti nalabaga ti akkubna a bokleta a Quotations From the Works of Mao Tse-tung, a mapattapatta a 800 a milion a kopia ti nailakon wenno naiwaras.
b Ti estadistika ti bilang dagiti lenguahe naibatayda kadagiti numero nga impablaak ti United Bible Societies.
[Ladawan iti panid 6]
Ti Gutenberg Bible, iti Latin, ti kaunaan a kompleto a libro a naimaldit iti makina a pagimprenta