Kingdom News No. 35
Addanto Ngata Tiempo nga Agiinnayat Amin a Tattao?
Limmamiisen ti Ayat iti Kaarruba
MINILION a tattao ti nakaay-ay-ay ken nakapimpiman, nga awan pagkamanganda. Kinuna ti maysa a babai a nagretiron a negosiante: ‘Maysa a rabii nagtuktok iti ruanganko ti maysa a balo a kaarrubak ket kinunana a malmaldaangan. Simmungbatak a sidadayaw ngem imprangkak kenkuana nga okupadoak. Nagpadispensar iti panangsingana kaniak sa pimmanaw.’
Nakalkaldaang ta iti dayta a rabii, nagpakamatay ti balo. Kalpasan dayta, kinuna ti negosiante nga adda “napateg a leksion” a naadalna.
Masansan a makadidigra ti kinaawan ayat iti kaarruba. Kabayatan dagiti etniko a dangadang idiay Bosnia ken Herzegovina, dati a paset ti Yugoslavia, nasurok a maysa a milion ti napilit a nangpanaw kadagiti pagtaenganda ken linaklaksa ti napapatay. Pinapatay dagiti siasino? “Dagiti kaarrubami,” inyasug ti maysa a balasitang a napapanaw iti purokda. “Am-ammomi ida.”
Ginasut a ribu a tattao ti napapatay idiay Rwanda, a masansan a gapuanan dagiti mismo a kaarrubada. Agnanaed a “sangsangkamaysa dagiti Hutu ken Tutsi, agaassawada, a dida maseknan wenno awan bibiangda no asino ti Hutu ken no asino ti Tutsi,” impadamag ti The New York Times. “Idi kuan adda kellaat a napasamak,” sa “nangrugi ti panagpipinnatay.”
Umasping iti dayta, agpupulapol dagiti Judio ken Arabo idiay Israel, ngem adu ti aggiginnura. Kasta met laeng ti kasasaad iti adu a Katoliko ken Protestante idiay Ireland ken umad-adu a tattao iti sabsabali pay a pagilian. Ti nakaro a kinaawan ayat ita ditoy lubong saan pay idi a napasamak iti historia.
Apay a Limmamiis ti Ayat iti Kaarruba?
Sumungbat ti Namarsua kadatayo. Ti Saona, ti Biblia, awaganna ti tiempo a pagbibiagantayo iti “maudi nga al-aldaw.” Daytoy ti panawen a, sigun iti padto ti Biblia, dagiti tattao “awanan nainkasigudan a panagayat.” Maipanggep kadagitoy “napeggad a tiempo a narigat a pakilangenan,” a naawagan met iti Kasuratan a “ti panungpalan ti sistema ti bambanag,” impadto ni Jesu-Kristo a “lumamiisto ti ayat ti dakdakkel a bilang.”—2 Timoteo 3:1-5; Mateo 24:3, 12.
Gapuna, ti kinaawan ayat ita ket paset ti ebidensia nga agbibiagtayon iti maudi nga al-aldaw daytoy a lubong. Makaparagsak ta kaipapananna met a daytoy lubong dagiti nadangkes a tattao dandanin masukatan iti nalinteg a baro a lubong nga iturayan ti ayat.—Mateo 24:3-14; 2 Pedro 2:5; 3:7, 13.
Ngem pudno kadi nga adda pamatiantayo a posible ti kasta a panagbalbaliw—nga amin a tattao masursuroda ti agiinnayat ken sangsangkamaysa nga agnaedda a sitatalna?
Ayat iti Kaarruba—Maysa a Kinapudno
“Asino a pudpudno ti kaarrubak?” insaludsod ti maysa nga abogado idi umuna a siglo ken Jesus. Di pagduaduaan a ti namnamaenna a sungbat ni Jesus ket, ‘Dagiti padam a Judio.’ Ngem iti estoria maipapan iti naasi a Samaritano, impakita ni Jesus a kaarrubatay met dagiti tattao iti nagduduma a nasionalidad.—Lucas 10:29-37; Juan 4:7-9.
Impaganetget ni Jesus a, sumaganad iti panagayat iti Dios, rumbeng nga ayatentay ti kaarrubatayo. (Mateo 22:34-40) Ngem adda kadin grupo dagiti tattao a pudno a nangayat kadagiti kaarrubada? Naaramidan dayta dagidi nagkauna a Kristiano! Nagdindinamagda gapu iti ayatda kadagiti sabsabali.—Juan 13:34, 35.
Itatta ngay? Adda kadi mangal-alagad iti ayat a kas iti impakita ni Kristo? Kuna ti Encyclopedia Canadiana: “Ti trabaho dagiti Saksi ni Jehova ket pannakaisubli ken pannakaipasdek manen ti nagkauna a Kinakristiano nga inalagad ni Jesus ken dagiti adalanna . . . Agkakabsatda amin.”
Aniat’ kayat a sawen dayta? Kayatna a sawen a di itulok dagiti Saksi ni Jehova nga adda aniaman—a kas ti puli, nasionalidad, wenno etniko a naggapuanda—a rason tapno guraenda dagiti kaarrubada. Dida met pumatay, ta piguratibo a pinandaydan dagiti kampilanda a kas dingding ti arado ken dagiti pikada kas kumkumpay. (Isaias 2:4) Kinapudnona, agdindinamag dagiti Saksi iti kinaganetgetda a tumulong kadagiti kaarrubada.—Galacia 6:10.
Di pakasdaawan a kastoy ti nakuna ti maysa nga editorial ti Sacramento Union iti California: “Umdasen a kunaen a no ti intero a lubong annurotenda ti kredo dagiti Saksi ni Jehova awanen ti panagpipinnatay ken guranggura, ket agari ti ayat.” Kinuna pay ti maysa a mannurat iti magasin a Ring iti Hungary: “Maikunak a no dagiti Saksi ni Jehova laeng koma ti agbibiag ditoy daga, awan koman ti gubat, sa ti laeng trabahon dagiti polis ket mangkontrol iti trapiko ken mangipaay kadagiti pasaporte.”
Nupay kasta, pudno a kasapulan ti dakkel, sangalubongan a panagbalbaliw tapno makapagiinnayat amin a tattao. Kasano a mapasamak dayta a panagbalbaliw? (Pangngaasiyo ta kitaenyo ti makinlikud a panid.)
Inton Agiinnayat Amin a Tattao
Ipakita ti kararag nga insuro ni Jesu-Kristo nga asidegen ti makaklaat a panagbalbaliw. Iti nalatak a Sermonna iti Bantay, kastoy ti insuro ni Jesus nga ikararagtayo: “Umay koma ti pagariam. Maaramid koma ti pagayatam ditoy daga, kas sadi langit.”—Mateo 6:10, King James Version.
Ania ti Pagarian ti Dios? Pudpudno dayta a gobierno, daydiay agturay manipud langit. Dayta ti makagapu a naawagan iti “pagarian ti langlangit.” Ni Jesus, ti “Prinsipe ti Kappia,” insaaden ni Amana kas agturay iti dayta.—Mateo 10:7; Isaias 9:6, 7; Salmo 72:1-8.
Inton umay ti Pagarian ti Dios, anianto ti mapasamak iti daytoy napnuan-gura a lubong? Ti “pagarian,” “burakennanto ken ibusennanto” amin dagiti rinuker a gobierno daytoy a lubong. (Daniel 2:44) Ilawlawag ti Biblia: “Ti lubong aglabas . . . , ngem ti mangaramid iti pagayatan ti Dios agtalinaed iti agnanayon.”—1 Juan 2:17.
Maipapan iti baro a lubong ti Dios, kuna ti Biblia: “Ti sililinteg tawidennanto ti daga, ket agtaengto kenkuana nga agnanayon.” (Salmo 37:9-11, 29; Proverbio 2:21, 22) Anian a nagdayag a panawen dayta! “Awanton ni patay, awanto metten ti panagleddaang wenno panagsangit wenno ut-ot.” (Apocalipsis 21:4) Uray dagiti natay agungardanto, ket ti intero a daga mapagbalinto a literal a paraiso.—Isaias 11:6-9; 35:1, 2; Lucas 23:43; Aramid 24:15.
Tapno agbiagtayo iti baro a lubong ti Dios, masapul nga agiinnayattayo, a kas iti isursuro ti Dios nga aramidentayo. (1 Tesalonica 4:9) Kinuna ti maysa nga estudiante ti Biblia iti Dumaya: “Segseggaak ti tiempo inton, kas ikari ti Biblia, amin a tattao masursurodan ti agiinnayat.” Ket masiguradotayo a tungpalento ti Dios dagiti karina! “Insaok,” kunana, “aramidekto met ti pannakatungpalna.”—Isaias 46:11.
Ngem tapno matagiragsakyo dagiti bendision iti sidong ti Pagarian ti Dios, masapul a gumun-odkayo iti pannakaammo iti Biblia, kas ti ar-aramiden dagiti minilion a nasingpet panagpuspusoda a tattao iti sangalubongan. (Juan 17:3) Tulongannakayo ti 32-panid a broshur nga Ania ti Kalikaguman ti Dios Kadatayo? Mangalakay iti kopiayo babaen ti panangsuratyo iti kupon nga adda iti bangir a panid ken ipatulodyo iti direksion a kaasitgan iti pagtaenganyo.
□ Kayatko ti umawat iti broshur nga Ania ti Kalikaguman ti Dios Kadatayo?
□ Pangngaasiyo ta sarungkarandak para iti libre a panagadal iti Biblia iti pagtaengan.
[Picture Credit Line iti panid 2]
Sniper ken pumpon idiay Bosnia: Reuters/Corbis-Bettmann