Laksidem ti Saan a Pudno a Relihion!

Di kayat ni Satanas ken dagiti demoniona nga agserbika iti Dios. Kayatda nga iyadayo ti amin a tao iti Dios no kabaelanda. Kasanoda nga ikagumaan nga aramiden daytoy? Ti maysa a pamay-an ket babaen ti saan a pudno a relihion. (2 Corinto 11:13-15) Saan a pudno ti maysa a relihion no dina isuro ti kinapudno manipud iti Biblia. Ti saan a pudno a relihion kaasping ti peke a kuarta​—mabalin a kasla pudno a kuarta, ngem awan balorna. Irubonaka iti adu a parikut.

Dagiti narelihiosuan a kinaulbod pulos a dida maay-ayo ni Jehova, ti Dios ti kinapudno. Idi adda ni Jesus ditoy daga, adda relihioso a grupo a nanggandat a mangpapatay kenkuana. Impagarupda nga umiso ti wagas ti panagdayawda. Kinunada: “Maymaysa ti Amami, ti Dios.” Immanamong ngata ni Jesus? Saan! Kinunana kadakuada: “Naggapukayo iti amayo a Diablo.” (Juan 8:41, 44) Itatta, pagarupen ti adu a tattao nga agdaydayawda iti Dios, ngem iti kinapudnona agserserbida ken Satanas ken kadagiti demoniona!​—1 Corinto 10:20.

No kasano a ti rinuker a kayo pataudenna ti dakes a bunga, ti saan a pudno a relihion pataudenna dagiti tattao a dakes ti aramidda. Napno ti lubong iti riribuk gapu kadagiti dakes nga ar-aramiden dagiti tattao. Adda imoralidad, panagdadangadang, panagtakaw, panangirurumen, panangpapatay, ken panangrames. Adu dagiti agaramid kadagitoy a dakes a bambanag ti addaan iti relihion, ngem ti relihionda dina tignayen ida nga agaramid iti naimbag. Saanda a magayyem ti Dios no saanda nga isardeng ti agaramid iti dakes.​—Mateo 7:17, 18.

Ti saan a pudno a relihion isurona dagiti tattao nga agkararag kadagiti idolo. Ibaga ti Dios a saantay nga agkararag kadagiti idolo. Nainkalintegan daytoy. Kayatmo kadi a pulos a dinaka kasarita ti maysa a tao no di laeng iti retratom? Pudno kadi a gayyemmo dayta a tao? Saan, saan a mabalin. Kayat ni Jehova a makisarita dagiti tattao kenkuana, saan nga iti rebulto wenno retrato nga awanan biag.​—Exodo 20:4, 5.

Isuro ti saan a pudno a relihion a saan a dakes ti pumatay kadagiti sabsabali no tiempo ti gubat. Kinuna ni Jesus a dagiti gagayyem ti Dios adda panagayatda iti maysa ken maysa. Saantay a patayen dagiti tattao nga ay-ayatentayo. (Juan 13:35) Dakes pay kadatayo ti pumatay kadagiti dakes a tattao. Idi napan arestuen dagiti kabusorna, saan nga impalubos ni Jesus a makilaban dagiti adalanna tapno masalakniban.​—Mateo 26:51, 52.

Isuro ti saan a pudno a relihion nga agsagaba dagiti nadangkes iti impierno nga apuy. Ngem, isuro ti Biblia a ti basol agturong iti ipapatay. (Roma 6:23) Ni Jehova ket Dios iti ayat. Ti naayat a Dios tutuokenna aya dagiti tattao iti agnanayon? Saan la ketdi! Idiay Paraiso, addanto laeng maymaysa a relihion, daydiay anamongan ni Jehova. (Apocalipsis 15:4) Awanton ti amin a relihion a naibatay iti kinaulbod ni Satanas.