Dagiti Pamay-anda a Mangiranud iti Naimbag a Damag
NAIBILIN kadagiti Kristiano nga ‘agaramidda iti ad-adalan kadagiti tattao iti amin a nasion,’ ngem dina kayat a sawen a piliten wenno puersaenda a pasuroten ti dadduma. Ti annongen idi ni Jesus ket “mangibaga iti naimbag a damag kadagidiay naemma,” “mangpatapat iti nasnaayan ti pusona,” “mangliwliwa kadagidiay amin nga agledleddaang.” (Mateo 28:19; Isaias 61:1, 2; Lucas 4:18, 19) Ikagkagumaan dagiti Saksi ni Jehova nga aramiden daytoy babaen ti panangiwaragawagda iti naimbag a damag manipud iti Biblia. Kas ken propeta Ezequiel idi ugma, padpadasen dagiti Saksi ni Jehova a sapulen dagidiay “agsensennaay ken umas-asug gapu iti amin a nakarimrimon a bambanag a maar-aramid.”—Ezequiel 9:4.
Ti pagaammo unayen a pamay-anda a mangbirok kadagidiay marirriribukan kadagiti agdama a kasasaad ket isu ti panagbalaybalay. Iti kasta, positibo a pagregreggetanda a danonen ti publiko, a kas iti inaramid ni Jesus idi “napan nagbambaniaga iti siniudansiudad ken iti pinuronpurok, nga ikaskasabana ken idekdeklarana ti naimbag a damag ti pagarian ti Dios.” Kasta met ti inaramid dagidi immuna nga adalanna. (Lucas 8:1; 9:1-6; 10:1-9) Ita, aginggat’ mabalin, ikagkagumaan dagiti Saksi ni Jehova ti sumarungkar iti kada pagtaengan iti adu a daras iti makatawen, nga ipampamuspusanda a makasao ti bumalay iti sumagmamano a minuto maipapan kadagiti lokal wenno sangalubongan a paginteresan wenno pakaseknan. Dakamatenda ti maysa wenno dua a kasuratan a mapagsaritaan, ket no interesado ti bumalay, iyurnos ti Saksi ti isasarungkarna iti kombeniente nga oras para iti kanayonan a panagsasarita. Adda dagiti magun-odan a Biblia ken literatura a mangilawlawag iti Biblia, ket no tarigagayan ti bumalay, maikondukta nga awan bayadna ti panagadal iti Biblia iti pagtaengan. Minilion kadagitoy makagunggona a panagadal iti Biblia ti regular a maikonkondukta kadagiti indibidual ken pampamilia iti intero a lubong.
Ti maysa pay a pamay-an a panangipakaammo iti sabsabali iti “naimbag a damag ti pagarian” ket babaen kadagiti gimong a maang-angay kadagiti lokal a Kingdom Hall. Linawas nga aggigimong sadiay dagiti Saksi. Ti maysa a gimong isu ti palawag publiko a ti topiko ket mainaig iti agdama a paginteresan, a sarunuen ti panagadal iti maysa a tema wenno padto ti Biblia, a mausar ti magasin a Pagwanawanan a kas pagadalan. Ti sabali pay a gimong isu ti eskuelaan a pakasanayan dagiti Saksi nga agbalin a nasaysayaat a manangiwaragawag iti naimbag a damag, a sarunuen ti paset a naipamaysa a panangusig iti trabaho a panangasaba iti lokal a teritoria. Kasta met, agtataripnong dagiti Saksi kadagiti pribado a pagtaengan maminsan iti makalawas, iti babassit a grupo, tapno agadalda iti Biblia.
Amin dagitoy a gimong ket silulukat iti publiko. Awan a pulos ti maar-aramid a panagkolekta. Makagunggona iti isuamin dagita a gimong. Kuna ti Biblia: “Rebbeng a kitaentayo no kasano ti kasayaatan a panangtignay ti tunggal maysa kadatayo iti sabsabali iti ayat ken aktibo a kinaimbag, a ditay adaywan dagiti gimongtayo, a kas ar-aramiden ti dadduma, no di ket agpipinnaregtatayo, nangnangruna ta makitayo nga umas-asidegen ti Aldaw.” Nasken ti pribado a panagadal ken panagsukimat, ngem makagutugot ti pannakitaripnong iti sabsabali: “No kasano a ti landok patademenna ti landok, kasta ti panangpatadem ti maysa a tao iti saririt ti sabali.”—Hebreo 10:24, 25; Proverbio 27:17, The New English Bible.
Agar-aramat met dagiti Saksi kadagiti pangiruangan iti panagsasarita maipapan iti naimbag a damag no masabetda ti sabsabali a tattao iti inaldaw a panagbiagda. Nalabit sumagmamano laeng a sasao a pannakipatang iti kaarruba wenno iti kaluganan iti bus wenno eroplano, at-atiddog a pannakitungtong iti gayyem wenno kabagian, wenno pannakisarita iti katrabahuan bayat ti panangaldaw. Kastoy ti kaaduan nga inaramid ni Jesus a panangasaba idi adda ditoy daga—bayat a magmagna iti igid ti baybay, agtugtugaw iti bakras ti turod, makipangpangan iti balay ti maysa a tao, dumardar-ay iti kasar, wenno agdaldaliasat a nakalugan iti pagkalap a barangay idiay Baybay ti Galilea. Nangisursuro kadagiti sinagoga ken iti templo idiay Jerusalem. Sadinoman ti ayanna, adda latta gundawayna nga agsao maipapan iti Pagarian ti Dios. Pagregreggetan met dagiti Saksi ni Jehova a suroten dagiti addangna iti daytoy a banag.—1 Pedro 2:21.
PANANGASABA BABAEN TI ULIDAN
Awan serserbi kenka dagitoy a pamay-an ti panangipakaammo iti naimbag a damag no daydiay mangipakpakaammo ket saanna nga iyap-aplikar iti bagina dagiti isursurona. Panaginsisingpet ti panangisao iti maysa a banag ket sabali met ti aramiden, ket ti narelihiosuan a kinamanaginsisingpet ti nangbugaw iti minilion a tattao manipud iti Biblia. Di umiso a mapabasol ti Biblia. Addaan idi dagiti eskriba ken Fariseo iti Hebreo a Kasuratan, ngem kinondenar ida ni Jesus a kas managinsisingpet. Nagsao maipapan iti panagbasbasada iti Linteg ni Moises, sana innayon a kinuna kadagiti adalanna: “Amin a bambanag nga ibagada kadakayo, aramiden ken tungpalenyo, ngem dikay aramiden maitunos iti ar-aramidda, ta sawenda ngem saanda nga aramiden.” (Mateo 23:3) Ad-adda a makakombinsir ti mapagulidanan ken nasayaat a panagbiag ti maysa a Kristiano ngem ti panagsermon iti adu nga oras. Naipatuldo daytoy kadagiti Kristiano nga assawa a babbai nga addaan iti di manamati nga assawa: “Mabalin a magun-od ida nga awan ti sao babaen iti kababalin dagiti assawada a babbai, agsipud ta nasaksianda ti nadalus a kababalinyo.”—1 Pedro 3:1, 2.
Ngarud, ikagkagumaan dagiti Saksi ni Jehova nga ipakaammo ti naimbag a damag iti sabsabali babaen iti kastoy met laeng a pamay-an: babaen ti panagbalinda a mapagulidanan iti Nakristianuan a kababalin nga ipakpakaammoda iti sabsabali. Ikagkagumaanda nga ‘aramiden kadagiti tattao ti kayatda nga aramiden met kadakuada dagiti dadduma.’ (Mateo 7:12) Ikagkagumaanda ti agbalin a kasta iti isuamin a tattao, saan laeng a kadagiti padada a Saksi, gagayyem, kakaarruba, wenno kakabagian. Yantangay imperpektoda, saan a kanayon a 100 porsiento nga agballigida. Ngem tartarigagayan ti pusoda nga aramiden ti naimbag iti amin a tattao saan laeng a babaen ti panangipakaammo kadakuada iti naimbag a damag ti Pagarian, no di ket uray pay iti panangtulong kadakuada aginggat’ mabalin.—Santiago 2:14-17.
[Ladawan iti panid 19]
Hawaii
[Ladawan iti panid 19]
Venezuela
[Ladawan iti panid 19]
Yugoslavia
[Dagiti Ladawan iti panid 20]
Dagiti Kingdom Hall, a praktikal ti pannakadisenioda, ket lugar a pagaadalan iti Biblia
[Dagiti Ladawan iti panid 21]
Iti panagbiag ti pamiliada ken iti pannakisaritada iti sabsabali, sipapasnek nga ikagkagumaan dagiti Saksi nga aramiden ti bambanag nga itantandudoda