Entusiasmo

TUMULONG ti entusiasmo a mangbiag iti maysa a palawag. Nupay nasken a napnuan impormasion ti material, ti ad-adda a nabiag, entusiastiko a panagpalawag ti mangtengngel iti atension dagiti agdengdengngeg. Aniaman ti kulturam wenno personalidadmo, mapatanormo ti entusiasmo.

Agsaoka nga Addaan Rikna. Idi kinasaona ti babai a taga Samaria, kinuna ni Jesus a dagidiay agdaydayaw ken ni Jehova masapul nga agdayawda a “buyogen ti espiritu ken kinapudno.” (Juan 4:24) Ti panagdayawda ket masapul a gutugoten ti manangipateg a puso ken maitunos iti kinapudno a masarakan iti Sao ti Dios. No ti maysa a tao ket addaan iti kasta a nauneg a panangipateg, maiparangarang dayta iti wagas ti panagsaona. Sigagagar a makisarita kadagiti sabali maipapan kadagiti naayat a probision ni Jehova. Dagiti ekspresion ti rupana, ti panagkompasna, ken ti timekna iparangarangda ti pudpudno a riknana.

Apay ngarud a ti pumapalawag a mangay-ayat ken Jehova ken patienna ti sasawenna ket mabalin nga awanan entusiasmo inton agpalawag? Saan nga umdas nga isaganana laeng ti ibagana. Masapul a biagenna ti ibagbagana, nga iramanna ti emosionna iti dayta. Kas pagarigan, isu ket nadutokan a mangipalawag maipapan iti subbot a daton ni Jesu-Kristo. Inton ipalawagna, masapul a ti panunotna ket napno, saan laeng a kadagiti detalye, no di ket buyogen ti apresasion iti kayulogan ti daton ni Jesus, agpada para iti bagina ken kadagiti agdengdengngeg kenkuana. Nasken a lagipenna ti panagyamanna ken ni Jehova a Dios agraman ken ni Kristo Jesus gapu iti daytoy nakaskasdaaw a probision. Nasken a panunotenna ti engrande a namnama ti biag a naluktan agpaay iti sangatauan​—agnanayon a kinaragsak iti perpekto a salun-at iti naisubli a naindagaan a paraiso! Gapuna, nasken nga umukuok dayta iti pusona.

Maipapan iti eskriba a ni Esdras, a maysa a mannursuro iti Israel, kuna ti Biblia nga “insaganana ti pusona nga umuman iti linteg ni Jehova ken mangaramid iti dayta ken mangisuro idiay Israel.” (Esd. 7:10) No kasta met ti aramidentayo​—saan laeng nga impormasion ti isaganatayo, no di pay ket ti pusotayo​—​agsaotayto manipud iti puso. Ti kasta a naimpusuan a panangyebkas iti kinapudno dakkel ti maaramidanna kadagidiay kasarsaritatayo a mangpatanor iti pudpudno a panagayatda iti kinapudno.

Panunotem Dagiti Agdengdengngeg. Ti sabali pay a napateg a banag iti panangiparangarang iti entusiasmo isu ti panamatim a kasapulan a mangngeg dagiti agdengdengngeg kenka ti kayatmo nga ibaga. Kaipapanan daytoy a bayat nga isagsaganam ti pasetmo, saanka laeng nga agurnong kadagiti napateg a material, no di pay ket agkararagka ken Jehova tapno iwanwannaka a mangusar iti dayta a pakagunggonaan dagidiay palawagam. (Sal. 32:8; Mat. 7:7, 8) Analisarem no apay a nasken a denggenda ti impormasion, kasanoda a magunggonaan iti dayta, ken no kasanom nga iparang iti wagas nga apresiarenda ti pategna.

Isaganam ti materialmo agingga nga adda banag a masarakam a makapagagar. Saan a masapul a kabbaro dayta, ngem ti panangidatagmo iti dayta a topiko ket mabalin a nagpaiduma. No makaisaganaka iti pudpudno a makatulong kadagiti agdengdengngeg a mangpabileg iti relasionda ken Jehova, mangapresiar kadagiti probisionna, mangsaranget a sibaballigi kadagiti pakarigatan iti biag iti daytoy daan a sistema, wenno mamagbalin kadakuada nga epektibo iti ministerioda, iti kasta addada rasonmo nga agbalin nga entusiastiko iti palawagmo.

Ania ngay no ti pasetmo ket panagbasa iti publiko? Tapno entusiastiko a maaramidmo dayta, saan laeng nga umiso a panangibasa kadagiti sasao ken maitutop a pananggrupo kadagita ti kiddawenna. Adalem ti material. No agbasaka iti paset ti Biblia, agsukimatka maipapan iti dayta. Siguraduem a maawatam ti kangrunaan a kaipapananna. Usigem no kasano a magunggonaanka ken dagiti agdengdengngeg kenka, kalpasanna, ibasam a buyogen ti tarigagay a maipaawat dayta kadagiti dumdumngeg kenka.

Agsagsaganaka kadi para iti tay-ak ti ministerio? Repasuem ti suheto nga isalaysaymo ken dagiti kasuratan a kayatmo nga usaren. Amirisem met ti adda iti panunot dagiti tattao. Ania ti kaudian a damdamag? Ania dagiti problema a mapaspasaranda? No sidadaanka a mangipakita kadagiti tattao a ti Sao ti Dios ket naglaon kadagiti solusion dagiti mismo a problemada, sigagagarka a mangaramid iti dayta, ket maiparangarang a natural ti entusiasmom.

Ipakitam ti Entusiasmo Babaen ti Nabiag a Panagpalawag. Nabatad a maiparangarang ti entusiasmo no nabiag ti panagpalawagmo. Agminar koma daytoy iti ekspresion ti rupam. Kombinsidoka koma, saan a dogmatiko.

Nasken ti kinatimbeng. Adda dagidiay agannayas nga aggagar iti uray ania a banag. Nalabit masapul a matulonganda a mangtarus a no bombastiko wenno emosional unay ti maysa a tao, isunto a mismo ti mapampanunot dagiti agdengdengngeg imbes a ti mensahena. Iti kasumbangirna, masapul a maparegta dagidiay managbabain a mangyebkas iti rikriknada.

Makaakar ti entusiasmo. No nasayaat ti pannakikinnitam kadagiti agdengdengngeg ken entusiastikoka iti ipalpalawagmo, mariknada dayta nga entusiasmo. Nabiag ti panagpalpalawag ni Apolos, ket nadeskribir a kas nalaing a pumapalawag. No nasgedka iti espiritu ti Dios, ti nabiag a panagpalawagmo gutugotenna nga agtignay dagidiay umim-imdeng kenka.​—Ara. 18:24, 25; Roma 12:11.

Ti Entusiasmo a Mayanatup iti Material. Annadam a mautoyan dagiti agdengdengngeg iti kinaentusiastikom ti intero a palawagmo. Iyaleng-alengdanton ti aniaman a patigmaan a kayatmo a pagtignayanda. Ipaganetget daytoy a masapul nga isaganam ti material a mangipalubos kenka a mangbaliwbaliw iti estilo ti panagpalawag. Dimo usaren ti estilo a mangipalnaad iti kinaawan pannakaseknan. No naannad ti panangpilim iti materialmo, sisasaetkanto nga aginteres iti dayta. Ngem siempre, adda dagiti punto nga agkasapulan iti ad-adda nga entusiasmo iti ipalawagmo ngem dagiti dadduma, ket masapul a nasigo ti pannakailaga dagitoy iti intero a palawagmo.

Rumbeng nga ad-adda a maidatag dagiti kangrunaan a punto a buyogen ti entusiasmo. Masapul nga agin-inut nga agturong ti palawagmo kadagiti pantok ken tampokna. Tangay dagitoy ti pannakatampok ti palawagmo, masansan dagita ti punto a nairanta a manggutugot kadagiti agdengdengngeg kenka. No nakombinsirmo dagiti agdengdengngeg, masapul a magutugotda, nga ipakita kadakuada ti pagimbagan ti panangyaplikar kadagiti naisalaysay. Makatulong ti entusiasmom a mangdanon iti puso dagiti umim-imdeng kenka. Saan koma a mapilpilit ti nabiag a panagpalawag. Adda koma makagapu iti dayta, ket ti materialmo isut’ mangipaay iti entusiasmom.