Panangipakita iti Interes Kadagiti Sabsabali

NO IRANUDTAYO kadagiti tattao dagiti kinapudno a linaon ti Biblia, masapul a saantay a basta mangted iti impormasion. Masapul a gutugotentayo ti pusoda. Ti maysa a pamay-an tapno maaramidtayo daytoy isu ti panangipakita iti napasnek a personal nga interes kadagiti umim-imdeng kadatayo. Adda nadumaduma a wagas a panangipakita iti kasta nga interes.

Ikonsiderarmo ti Panangmatmat Dagiti Agdengdengngeg Kenka. Inkonsiderar idi ni apostol Pablo ti kasasaad ken mentalidad dagiti agim-imdeng kenkuana. Inlawlawagna: “Kadagiti Judio nagbalinak a kas maysa a Judio, tapno magun-odko dagiti Judio; kadagidiay adda iti sidong ti linteg nagbalinak a kas adda iti sidong ti linteg, nupay awanak a mismo iti sidong ti linteg, tapno magun-odko dagidiay adda iti sidong ti linteg. Kadagidiay awanan linteg nagbalinak a kas awanan linteg, nupay saanak nga awanan linteg iti Dios no di ket adda iti sidong ti linteg ken Kristo, tapno magun-odko dagidiay awanan linteg. Kadagidiay nakapuy nagbalinak a nakapuy, tapno magun-odko dagiti nakapuy. Nagbalinak nga amin a bambanag iti amin a kita ti tattao, tapno iti amin a pamay-an maisalakanko ti sumagmamano. Ngem aramidek ti amin a bambanag maipagapu iti naimbag a damag, tapno agbalinak a manangiranud iti dayta iti sabsabali.” (1 Cor. 9:20-23) Kasano nga ‘agbalintayo nga amin a bambanag iti amin a kita ti tattao’ itatta?

No adda gundawaymo a mangpaliiw kadagiti sabsabali, uray apagbiit laeng, sakbay a kasaritam ida, mabalin a madlawmo no ania dagiti paginteresan ken kasasaadda. Maibagam aya no ania ti panggedanda? Adda aya pakakitaan no ania dagiti narelihiosuan a patpatienda? Adda aya pangripiripan iti kasasaad ti pamiliada? Maibatay iti napaliiwmo, mabalinmo aya nga ibagay ti presentasionmo tapno ad-adda a makaallukoy kadagiti kasarsaritam?

Tapno makaallukoy ti presentasionmo, masapul a panunotem a nasaksakbay no kasanom nga asitgan dagiti tattao iti teritoriayo. Iti dadduma a lugar, ramanen daytoy dagiti residente a ganggannaet. No adda dagiti kasta a tattao iti teritoriayo, adda aya napadasmon nga epektibo a wagas ti panangasaba kadakuada? Yantangay pagayatan ti Dios nga “amin a kita ti tattao ken dumtengda iti umiso a pannakaammo iti kinapudno,” pagbalinem a kalat nga idatag ti mensahe ti Pagarian iti wagas a makaallukoy kadagiti amin a makasaritam.​—1 Tim. 2:4.

Umimdengka a Naimbag. Nupay kabaelan ni Jehova nga ammuen ti amin a kayatna nga ammuen, isu ket umimdeng kadagiti dadduma. Iti maysa a sirmata a dimteng ken ni propeta Mikaias, parparegtaen ni Jehova dagiti anghel a mangyebkas kadagiti kapanunotanda maipapan iti pannakataming ti maysa a parikut. Kalpasanna, impalubos ti Dios nga aramiden ti maysa nga anghel ti insingasingna. (1 Ar. 22:19-22) Idi inyebkas ni Abraham ti pannakaseknanna maipapan iti pannakaukom ti Sodoma, siaayat nga impangag ni Jehova. (Gen. 18:23-33) Iti ministeriotayo, kasanotay a matulad ti ulidan ni Jehova no maipapan iti panagimdeng?

Paregtaem dagiti sabsabali a mangyebkas iti adda iti panunotda. Agsaludsodka iti maitutop, ket ikkam ida iti gundaway a sumungbat. Umimdengka a nalaing. Nawayada nga agsao no sipapasnek nga umimdengka. No ti sungbatda ket iyanninawna dagiti paginteresanda, sitataktika nga agsaludsodka pay. Ikagumaam nga am-ammuen a nalaing ida, ngem saan koma a ti la adda a maisalsaludsodmo. Komendaram dagiti kapanunotanda no la ket ta maaramidmo a sipapasnek dayta. Uray no saanmo nga anamongan ti kapanunotanda, siaayat ng ikabilangam ti imbagada.​—Col. 4:6.

Ngem masapul nga agannadtayo di la ket ta ti panaginterestayo kadakuada ket lumbes iti maitutop. Ti pannakaseknantayo kadakuada dinatay ikkan iti wayawaya a makibiang iti kabibiagda. (1 Ped. 4:15) Masapul nga agannadtayo di la ket ta sabali ti pangipagarupan ti maysa a ditay kasekso iti ipakpakitatayo a naayat a pannakaseknan. Yantangay ti makuna a maitutop a panaginteres kadagiti sabsabali ket saan nga agpapada iti nagduduma a pagilian, uray iti nagduduma a tattao, masapul ti panagannad.​—Luc. 6:31.

Ti panagsagana ket makatulong iti napasnek a panagimdeng. No ti mensahetayo ket nalawag iti isiptayo, tulongannatay dayta nga agrelaks ken dumngeg a natural kadagiti dadduma. Iti kasta, saanda nga alusiisen ket mabalin nga ad-adda a kayatda ti makisarita kadatayo.

Maipakitatayo ti panagraem kadagiti dadduma no umimdengtayo kadakuada. (Roma 12:10) Dayta ti mangipakita a napateg kadatayo dagiti kapanunotan ken rikriknada. Mabalin pay ketdi a matignayda nga ad-adda nga umimdeng iti ibagbagatayo. Ngarud, adda naimbag a rason a balakadannatayo ti Sao ti Dios a “nasiglat[tayo koma] no iti panagdengngeg, nainayad no iti panagsao.”​—Sant. 1:19.

Tulongam Dagiti Dadduma a Rumang-ay. No maseknantayo kadagiti dadduma, sipapanunottayo kadagidiay mangipakita iti interes ken sarungkarantayo manen ida tapno iranud dagiti kinapudno a masarakan iti Biblia a maitutop unay iti kasasaadda. No panggepmo a sarungkaran ida, tandaanam ti naammuam maipapan kadakuada iti naudi nga isasarungkarmo. Mangisaganaka iti impormasion maipapan iti banag a pakaseknanda. Itampokmo ti praktikal a pateg ti material, a tulongam ida a mangamiris no kasano a magunggonaanda iti maad-adalda.​—Isa. 48:17.

No ipanayag ti kasarsaritam ti maysa a kasasaad wenno parikut a mangburburibor kenkuana, matmatam daytoy a kas naisangsangayan a gundaway a mangiranud iti naimbag a damag kenkuana. Tuladem ti ulidan ni Jesus, a sidadaan a nangliwliwa kadagidiay adda pakarigatanda. (Mar. 6:31-34) Annadam ti mangted iti nadarasudos a solusion wenno parawpaw a balakad di la ket ta ipapanda a saanka a pudpudno a maseknan. Imbes ketdi, ipakitam ti empatia. (1 Ped. 3:8) Kalpasanna, agsukimatka kadagiti publikasion a naibasar iti Biblia, ket iranudmo ti makapabileg nga impormasion a tumulong kadakuada a mangtaming iti kasasaad. Siempre, ti naayat a pannakaseknan iti kasarsaritam ti manglapped kenka a mangipalgak kadagiti kompidensial a banag nga inyumanna kenka, malaksid no adda nasayaat a rason tapno aramidem ti kasta.​—Prov. 25:9.

Nangnangruna a maseknantayo koma kadagidiay iyad-adalantayo iti Biblia. Sipapasnek a panunotem dagiti kasapulan ti tunggal iyad-adalam, ket iti panagsaganam para iti panagadalyo, sipapanunotka koma kadagita a kasapulan. Isaludsodmo iti bagim, ‘Ania ti masapul a sumaruno nga aramidenna tapno agtultuloy a rumang-ay iti naespirituan?’ Siaayat a tulongam ti iyad-adalam a mangapresiar iti kuna ti Biblia ken dagiti publikasion “ti matalek ken masirib nga adipen” maipapan iti maysa a banag. (Mat. 24:45) Iti dadduma a kasasaad, mabalin a saan nga umdas ti basta panangilawlawag. Masapul nga ipakitam iti iyad-adalam no kasano nga iyaplikar ti maysa a prinsipio ti Biblia, a duakayo a mangaramid iti maysa a banag a mangidemostra iti aplikasionna.​—Juan 13:1-15.

Masapul ti kinatimbeng ken panagannad no tulongam dagiti sabsabali a mangitunos iti biagda kadagiti pagalagadan ni Jehova. Nagduduma dagiti nalikudan ken abilidad ti tattao, ken saan nga agpapada ti kapartak ti irarang-ayda. Nainkalintegan koma ti namnamaem kadakuada. (Fil. 4:5) Saanmo ida a pilpiliten a mangbalbaliw iti biagda. Bay-am a ti Sao ti Dios ken ti espirituna ti mangtignay kadakuada. Kayat ni Jehova nga agserbi dagiti tattao kenkuana buyogen ti situtulok a puso, saan a mapilpilit. (Sal. 110:3) Liklikam nga iyebkas dagiti bukodmo a kapanunotan maipapan kadagiti personal a pangngeddeng a sangsanguenda, ket uray pay no damagenda ti opinionmo, annadam a dika agdesision para kadakuada.​—Gal. 6:5.

Mangtedka iti Praktikal a Tulong. Nupay ti pagimbagan dagiti tattao iti naespirituan ti kangrunaan a pakaseknan idi ni Jesus, inkabilanganna met dagiti dadduma a kasapulanda. (Mat. 15:32) Uray no awan ti kasano a sanikuatayo, adda dagiti praktikal a wagas a makatulongtayo.

Ti pannakaseknan kadagiti sabsabali tignayennatayo nga agbalin a nakonsiderasion. Kas pagarigan, no saan a komportable ti kasarsaritam gapu ta dakes ti panniempo, umakarkayo iti nasaysayaat a lugar, wenno saan, iyurnosmo nga ituloyyonto ti agsarita iti sabali a gundaway. No naiparna a saan a kombiniente kenkuana ti oras ti isasarungkarmo, ibagam a baliwamto ti sumarungkar. No masakit wenno adda iti ospital ti kaarrubam wenno ti maysa nga interesado, ipakitam a maseknanka babaen ti panangipatulodmo iti kard wenno ababa a surat wenno sarungkaram. No maitutop, mabalinmo met nga ipaayan iti makan wenno agaramid iti dadduma pay a banag nga agpaay iti pagimbaganna.

Bayat a rumangrang-ay dagiti iyad-adalam iti Biblia, mabalin a mariknada a kasla adda kurang iti biagda gapu ta saanda unayen a makalangen dagiti dati a kakaduada. Gayyemem ida. Iwayaam ti makitungtong kadakuada kalpasan ti panagadalyo iti Biblia ken iti dadduma pay a gundaway. Paregtaem ida a makitimpuyog kadagiti nasayaat a kakadua. (Prov. 13:20) Tulongam ida a tumabuno kadagiti Nakristianuan a gimong. Katugawmo ida kadagiti kasta a taripnong ket tumulongka a mangaywan kadagiti annakda tapno magunggonaanda a naan-anay iti programa.

Ipakitam ti Naimpusuan nga Interes. Ti panaginteres kadagiti tattao ket saan a maysa a pamay-an a masapul nga adalen a naimbag, no di ket maysa a kualidad ti puso. Adu dagiti wagas a maipakita ti kinapasnek ti pannakaseknantayo kadagiti dadduma. Maipakita dayta iti iyiimdengtayo ken iti sawentayo. Maiparangarang dayta iti kinaimbag ken konsiderasion nga ipakitatayo kadagiti tattao. Uray no awan ti ibagbaga wenno ar-aramidentayo, agminar dayta iti kababalin ken ekspresion ti rupatayo. No pudpudno a maseknantayo kadagiti dadduma, sigurado a madlawda dayta.

Ti kangrunaan a makagapu nga ipakitatayo ti napasnek nga interes kadagiti dadduma isu daytoy: No aramidentayo dayta, tultuladentayo ti ayat ken asi ti nailangitan nga Amatayo. Tumulong daytoy tapno maallukoy dagiti umim-imdeng kadatayo ken ni Jehova ken iti mensahe nga intedna nga isaknaptayo. Gapuna, bayat nga iranudmo ti naimbag a damag, itultuloymo a kitaen ‘saan a ti personal a panaginteres iti laeng bukodmo a bambanag, no di ket kasta met ti personal a panaginteres iti bambanag ti sabsabali.’​—Fil. 2:4.