Nasayaat nga Ulidan—Ti Sulamita
Ti balasang a Sulamita ammona a saan a rumbeng nga agpaibuyog iti emosion no maipapan iti romantiko nga ayat. “Pinagsapatakayo,” kinunana kadagiti kakaduana, “a saanyo a padasen a riingen wenno gutugoten ti ayat kaniak agingga nga agduyos.” Ammo ti Sulamita a ti emosion alisto la a makontrolna ti panunot. Kas pagarigan, nabigbigna nga isu ket mabalin a durogan dagiti sabsabali a mangaklon iti ayat ti maysa a tao a saan a maitutop kenkuana. Uray ti mismo a riknana mabalinna a kullaapan ti natimbeng a panagpampanunotna. Gapuna, ti Sulamita ket nagtalinaed a kas “pader.”—Kanta ni Solomon 8:4, 10.
Natimbeng kadi ti panangmatmatmo iti ayat kas iti panangmatmat ti Sulamita? Kabaelam kadi ti agpaiwanwan iti panunotmo imbes a basta surotem ti kayat ti pusom? (Proverbio 2:10, 11) No dadduma, mabalin nga adda dagidiay mangimpluensia kenka a makirelasion uray dika pay nakasagana. Nalabit nga uray sika a mismo magagaranka metten a makirelasion. Kas pagarigan, no makakitaka iti agnobio nga agin-inniggem iti ima bayat a magmagnada, agragutka kadi a maaddaan met iti kaayan-ayat? Makirelasionka kadi iti saanmo a kapammatian? Natimbeng ti panagpampanunot ti balasang a Sulamita no maipapan iti romantiko nga ayat. Maaramidmo met dayta!