SEKSION 2
Napukaw a Paraiso
Maysa a rebelioso nga anghel ti nangallukoy iti umuna a lalaki ken babai, da Adan ken Eva, tapno saanda nga agpaituray iti Dios. Kas resulta, simrek ti basol ken ipapatay iti lubong
MABAYAG pay sakbay a pinarsua ti Dios ti tao, pinarsuana dagiti di makita nga espiritu a parsua—dagiti anghel. Idiay Eden, maysa a rebelioso nga anghel, a naawagan idi agangay iti Satanas a Diablo, ti nangikagumaan a mangallilaw ken Eva tapno mangan iti bunga ti kayo nga imparit ti Dios.
Babaen ti pananglimlimona kas serpiente wenno uleg, imparipirip ni Satanas nga adda ipapaidam ti Dios kadagiti agassawa. Imbaga ti anghel ken Eva a saanda a matay ken Adan no manganda iti naiparit a bunga. Iti kasta, ni Satanas inakusaranna ti Dios nga agul-ulbod kadagiti tattao nga annakna. Pinagparang ti Manangallilaw a makaay-ayo ti panagsukir iti Dios ken mangiturong iti naisangsangayan a pannakaammo ken wayawaya. Ngem kinaulbod amin dayta—kinapudnona, dayta ti damo a panagulbod ditoy daga. Ti talaga nga isyu ket maipapan iti kinasoberano ti Dios wenno ti katan-okan a panangituray—no adda kalintegan ti Dios a mangituray, no nalinteg ti wagas ti panangiturayna, ken no pagimbagan dayta dagiti iturayanna.
Pinati ni Eva ti kinaulbod nga imbaga ni Satanas. Tinarigagayanna ti bunga, sa nangan iti paset dayta. Kalpasanna, inikkanna ni lakayna ket nangan met. Iti kasta, nagbasolda. Agparang a bassit la a banag dayta, ngem maysa dayta nga iyaalsa. Babaen ti sipapakinakem a panangsukirda iti bilin ti Dios, saan a nagpaituray da Adan ken Eva iti Namarsua a nangted kadakuada iti isuamin a kasapulanda, agraman iti perpekto a biag.
Ti bin-i “dunorennakanto iti ulo ket dunoremto iti mukod.”—Genesis 3:15
Ti Dios sinentensiaanna dagiti rebelde. Impadtona ti iyaay ti naikari a Bin-i, wenno Manangisalakan, a mangdadael ken Satanas, daydiay iladladawan ti serpiente. Impalubos ti Dios nga agbiag pay da Adan ken Eva iti sumagmamano a panawen, a mangipakita iti asina kadagiti agbalinto a kaputotanda. Dagitoy nga annak maaddaanda iti pakaibatayan ti namnama gapu ta Daydiay imbaon ti Dios pukawennanto dagiti nakalkaldaang a resulta ti iyaalsa idiay Eden. Bayat ti pannakaisurat ti Biblia, in-inut a naipalgak no kasano a matungpal ti panggep ti Dios mainaig iti daytoy umayto a Manangisalakan ken no asino Daydiay naibaon.
Ti Dios pinaruarna da Adan ken Eva manipud iti Paraiso. Masapulen nga ikarigatanda ti agtrabaho tapno agbiagda iti ruar ti minuyongan ti Eden. Kalpasanna, nagsikog ni Eva ket impasngayna ni Cain, ti inauna nga anakda. Naaddaanda pay iti dadduma nga annak a lallaki ken babbai, a pakairamanan da Abel ken Set nga inapo ni Noe.
—Naibasar iti Genesis kapitulo 3 agingga iti 5; Apocalipsis 12:9.