Nalasatan ti Sangatauan Daydi Layus

BAYAT nga immadu ti tattao, nagbiit a simmaknap ti basol ken kinadakes ditoy daga. Maysa a propeta nga agnagan iti Enoc ti namakdaar nga addanto aldaw a ti Dios dadaelenna ti nadangkes. Kaskasdi, nagraira ti dakes ket kimmaro pay. Nagrebelde ti dadduma nga anghel maibusor ken Jehova idi pinanawanda ti naituding a lugarda idiay langit, nagbalinda a tao ditoy daga, ken siaagum a nangalada kadagiti babbai kas assawada. Dagita a di nakaisigudan a panagtipon nangpataud kadagiti mestiso nga annak​—dagiti naranggas a higante a naawagan Nefilim, a nangpakaro iti kinaranggas ken pammapatay ditoy lubong. Naladingitan unay ti Dios a makakita iti pannakadadael ti parsuana ditoy daga.

Kalpasan ti ipapatay ni Enoc, maysa a tao ti nagbiag a naiduma iti nadangkes a lubong. Noe ti naganna. Inkagumaanna ken ti pamiliana ti nagaramid iti naimbag iti imatang ti Dios. Idi inkeddeng ti Dios a dadaelen ti dakes a tattao iti daydi a lubong, kayatna a salakniban ni Noe ken dagiti animal ditoy daga. Isu a binilinna ni Noe a mangaramid iti daong​—maysa a dakkel a rektanggulo a barko. Iti dayta nga agkamang ni Noe ken ti pamiliana, agraman ti adu a kita dagiti animal, tapno maitalimengda iti dumteng a sangalubongan a layus. Nagtungpal ni Noe iti Dios. Bayat ti agarup 40 wenno 50 a tawen a panangaramidna iti daong, maysa met ni Noe a “manangaskasaba iti kinalinteg.” (2 Pedro 2:5) Pinakdaaranna dagiti tattao maipapan iti mapasamak a Layus, ngem dida inkankano. Dimteng ti kanito a masapul a sumreken ni Noe ken ti pamiliana iti daong agraman dagiti animal. Rinikpan ti Dios ti ridaw ti daong. Kalpasanna, nagtudo.

Nagtudo iti nakapigpigsa iti 40 nga aldaw ken 40 a rabii agingga a natinep ti daga. Nalmes dagiti nadangkes. Sumagmamano a bulan kalpasanna, bayat nga immes-es ti danum, naisadsad ti daong iti maysa a bantay. Idi mabalinen a rummuar dagiti nakalugan iti daong, nakabusbosdan iti makatawen iti uneg dayta. Kas panagyaman, nagdaton ni Noe. Impasigurado ti Dios ken Noe ken iti pamiliana a dinanton pulos pukawen ti amin a biag iti rabaw ti daga babaen ti layus. Inusar ni Jehova ti bullalayaw kas makita a pammatalged, a mangipalagip iti dayta a makaliwliwa a kari.

Kalpasan ti Layus, nangted ti Dios kadagiti baro a bilin. Impalubosna a mangan dagiti tattao iti karne. Nupay kasta, imparitna ti pannangan iti dara. Imbilinna pay kadagiti kaputotan ni Noe nga agnaedda iti nadumaduma a paset ti daga, ngem adda dagiti simmukir. Iti panangidaulo ti liderda a ni Nimrod, nagkaykaysa dagiti tattao a mangibangon iti dakkel a torre iti siudad ti Babel, a naawagan idi agangay iti Babilonia. Panggepda a sukiren ti bilin ti Dios a panagwarasda iti intero a daga. Ngem ti Dios linapdanna dagiti rebelde babaen ti panangriribukna iti maymaysa a lenguaheda ket nagsaoda iti nagduduma a lenguahe. Gapu ta didan agkikinnaawatan, binaybay-andan ti agibangon ket nagsisinada.

​—Naibasar iti Genesis kapitulo 6 agingga iti 11; Judas 14, 15.