Nakitulag ti Dios ken Abraham

AGARUP 350 a tawen ti naglabasen kalpasan ti Layus idi kaaldawan ni Noe, maysa a patriarka nga agnagan Abraham ti agnanaed iti narang-ay a siudad ti Ur, iti maawagan itan nga Iraq. Ni Abraham ket maysa a lalaki a naisangsangayan ti pammatina. Ngem ita, masubok ti pammatina.

Imbaga ni Jehova ken Abraham a panawanna ti pagilian a nakayanakanna ket mapan iti sabali a lugar, nga isu ti Canaan. Nagtulnog ni Abraham a di nagpangadua. Inkuyogna ti sangakabbalayanna, agraman ni Sara nga asawana ken ni Lot a kaanakanna, ket kalpasan ti naunday a panagdaliasatda, nagnaedda iti tolda idiay Canaan. Iti tulagna ken Abraham, inkari ni Jehova a mangpataudto iti dakkel a nasion manipud kenkuana, a mabendisionan ti amin a pamilia iti daga babaen kenkuana, ken tagikuaen ti kaputotanna ti daga ti Canaan.

Bimmaknang da Abraham ken Lot, naaddaanda iti nagadu a karnero ken pangen dagiti baka. Sipaparabur nga impalubos ni Abraham a ni Lot ti agpili iti kayatna a teritoria. Pinili ni Lot ti nadam-eg a distrito ti Karayan Jordan ket nagnaed iti asideg ti siudad ti Sodoma. Ngem imoral dagiti tattao iti Sodoma​—nakaro ti kinamanagbasolda maibusor ken Jehova.

Idi agangay, ni Jehova a Dios impatalgedna ken Abraham nga umadunto ti kaputotanna a kas kadagiti bituen iti langit. Namati ni Abraham iti dayta a kari. Ngem nagtalinaed a lupes ti dungdunguenna nga asawa a ni Sara. Kalpasanna, idi agtawenen ni Abraham iti 99 ken dandani agtawen ni Sara iti 90, imbaga ti Dios ken Abraham a maaddaanda iti anak a lalaki. Kas imbaga ti Dios, impasngay ni Sara ti anakna a ni Isaac. Naaddaan ni Abraham iti dadduma pay nga annak, ngem agtaud ken Isaac ti Manangisalakan a naikari idi idiay Eden.

Kabayatanna, nagnaed ti sangapamiliaan ni Lot iti Sodoma, ngem ni nalinteg a Lot saan a nagbalin a kas kadagiti imoral nga agindeg iti siudad. Idi inkeddeng ni Jehova a dusaenna ti Sodoma, nangibaon kadagiti anghel a mangpakdaar ken Lot maipapan iti umadani a pannakadadael. Dagiti anghel binilinda ni Lot ken ti pamiliana a panawanda a dagus ti Sodoma ken saanda a tumaliaw. Kalpasanna, pinagtudo ti Dios iti apuy ken asupre iti Sodoma ken iti asideg a nadangkes a siudad ti Gomorra, ket nadadael ti amin nga agindeg. Nakatalaw da Lot ken ti dua a babbalasangna. Ngem timmaliaw ti asawa ni Lot, a nalabit tartarigagayanna dagiti bambanag a nabatina. Gapu iti kinasukirna, napukaw ti biagna.

​—Naibasar iti Genesis 11:10–19:38.