Insalakan ti Dios Dagiti Annak ni Israel

ADU a tawen a nagnaed dagiti annak ni Israel iti Egipto, ket immaduda ken rimmang-ayda. Nupay kasta, nagturay ti baro a Faraon a di makaam-ammo ken Jose. Daytoy ket nauyong nga agturay nga agamak nga umadu dagiti Israelita, isu nga inadipenna ia ken imbilinna nga amin a kappasngay nga annak a lallaki ket mailemmes iti Karayan Nilo. Ngem sinalakniban ti maysa a natured nga ina ti anakna a lalaki, ket inlemmengna ti anakna iti basket iti nagbabaetan dagiti runo. Ti anak a babai ni Faraon nakitana ti ubing, pinanagananna iti Moises, ken pinadakkelna iti naarian a pamilia ti Egipto.

Idi agtawen ni Moises iti 40, nagpeggad ti biagna gapu ta indepensana ti adipen nga Israelita a parparigaten ti maysa nga Egipcio a mangimatmaton iti trabaho. Nagkamang ni Moises iti adayo a disso, ket nagbiag kas destiero. Idi agtawen ni Moises iti 80, imbilin ni Jehova kenkuana nga agsubli idiay Egipto ket ibagana ken Faraon a masapul a mawayawayaan ti ili ti Dios.

Di pulos immannugot ni Faraon. Gapuna, ti Dios dinidigrana ti Egipto babaen ti sangapulo a saplit. Iti kada idadatag ni Moises ken Faraon tapno ikkanna iti gundaway a makaliklik iti sumaganad a saplit, ni Faraon saanna a binigbig ni Moises ken ni Jehova a Dios. Kamaudianna, ti maikasangapulo a saplit pinapatayna ti amin nga inauna iti dayta a daga​—malaksid kadagiti pamilia a nangiwarsi iti dara ti naidaton a kordero kadagiti bautek ti ruanganda, kas panagtulnogda ken Jehova. Ti mangpapatay nga anghel ti Dios linabsanna dagiti balay dagita a pamilia. Kalpasanna, dayta a nakaskasdaaw a panangispal ket linaglagip dagiti Israelita babaen ti tinawen a rambak a maawagan iti Paskua.

Kalpasan ti pannakapapatay ti mismo nga inauna nga anakna, ni Faraon imbilinna ken Moises ken kadagiti Israelita a panawanda ti Egipto. Dagus nga inorganisarda ti rummuar iti Egipto. Ngem nagbaliw ti panunot ni Faraon. Kinamatna ida a kaduana ti adu a mannakigubat ken karuahe. Idi makagteng dagiti Israelita iti igid ti Nalabaga a Baybay, agparang nga awanen ti mabalinda a pagnaan. Ni Jehova binisngayna ti Nalabaga a Baybay, isu a nakaballasiw dagiti Israelita iti naatianan a lansad ti baybay iti nagbaetan dagiti pader a danum! Idi nagdardaras a simmaruno kadakuada dagiti Egipcio, ti Dios pinagsublina dagiti danum ket nalmes ni Faraon ken ti buyotna.

Idi agangay, bayat a nagpakarso dagiti Israelita iti sakaanan ti Bantay Sinai, nakitulag kadakuada ni Jehova. Babaen ken Moises kas mangibabaet, ti Dios inikkanna ti Israel kadagiti linteg a mangiwanwan ken mangsalaknib kadakuada iti dandani amin nga aspeto ti biag. Agingga a simamatalek nga agpaituray ti Israel ken Jehova a Dios, saanna a baybay-an ida ken pagbalinenna dayta a nasion a bendision iti sabsabali.

Nupay kasta, kaaduan kadagiti Israelita pinagladingitda ti Dios gapu iti kinaawan pammatida. Gapuna, pinagalla-alla ni Jehova dayta a kaputotan iti 40 a tawen idiay let-ang. Kalpasanna, dinutokan ni Moises ti nalinteg a lalaki a ni Josue a sumuno kenkuana. Kamaudiananna, nakasaganan ti Israel a sumrek iti daga nga inkari ti Dios ken Abraham.

​—Naibasar iti Exodo; Levitico; Numeros; Deuteronomio; Salmo 136:10-15; Aramid 7:17-36.