Nagkiddaw Dagiti Israelita iti Ari

KALPASAN ni Samson, nagserbi ni Samuel kas propeta ken ukom iti Israel. Dagiti Israelita sangkaibagada kenkuana a kayatda ti maaddaan iti ari kas iti dadduma a nasion. Nupay makapasair ken Jehova dayta, binilinna ni Samuel a patganna ti kiddawda. Pinili ti Dios ti napakumbaba a lalaki a ni Saul nga agbalin nga ari. Ngem idi agangay, ni Ari Saul nagbalin a natangsit ken nasukir. Gapuna, ni Jehova binilinna ni Samuel a mangdutok iti sabali nga ari​—maysa nga agtutubo nga agnagan iti David. Ngem naglabas pay ti adu a tawen sakbay a nagari ni David.

Idi agtutubo pay ni David, sinarungkaranna ti kakabsatna a kameng ti buyot ni Saul. Ti intero a buyot pagbutbutnganda ti mannakigubat a higante nga agnagan iti Goliat, a mangum-umsi kadakuada ken iti Diosda. Gapu iti rurod ni David, inawatna ti karit ti higante a pannakirupak kenkuana. Babaen laeng ti maysa a pallatibong ken sumagmamano a bato, ti agtutubo sinangona ti kabusor, nga agtayag iti dandani tallo a metro. Gapu iti pananglais kenkuana ni Goliat, kinuna ni David a nabilbileg ti igamna gapu ta isu ket makidangadang iti nagan ni Jehova a Dios! Pinapatay ni David ni Goliat babaen ti maysa laeng a bato sana pinugotan babaen ti mismo a kampilan ti higante. Timmalaw ti buyot dagiti Filisteo gapu iti butengda.

Idi damo, naragsakan ni Saul gapu iti kinatured ni David, isu a dinutokanna a mangidaulo iti buyotna. Ngem idi agsasarunon ti balligi ni David, napalalon ti imon ni Saul. Nagtalaw ni David tapno maispal ket nagbiag kas pugante iti adu a tawen. Kaskasdi, nagtalinaed a nasungdo iti ari a mangikagkagumaan a mangpapatay kenkuana, ta sipapanunot a ni Jehova a Dios ti nangdutok ken Ari Saul. Idi agangay, natay ni Saul iti paggugubatan. Di nagbayag, nagari ni David kas inkari ni Jehova.

Kas ari, tinartarigagayan ni David ti mangibangon iti maysa a templo para ken Jehova. Ngem kinuna ni Jehova ken David a maysanto kadagiti annakna​—ni Solomon—​ti mangaramid iti dayta. Nupay kasta, ti Dios ginunggonaanna ni David babaen ti maysa a makapainteres a tulag iti nagbaetanda: Agtaud iti kaputotan ni David ti awan kapadana a dinastia dagiti ari. Dayta a kaputotan ti pagtaudanto ti Manangisalakan wenno Bin-i a naikari idiay Eden. Isunto dayta ti Mesias, a kaipapananna “Daydiay Napulotan,” a dinutokan ti Dios. Inkari ni Jehova a ti Mesias ti agbalinto nga Agturay iti agnanayon a gobierno wenno Pagarian.

Kasta unay ti panagyaman ni David isu a nagurnong iti adu a materiales ken agkakangina a metal para iti pannakaibangon ti templo. Nangputar met iti adu a naipaltiing a salmo. Idi dandanin matay, binigbig ni David: “Ti espiritu ni Jehova ti nagsao babaen kaniak, ket ti saona adda idi iti dilak.”​—2 Samuel 23:2.

​—Naibasar iti 1 Samuel; 2 Samuel; 1 Cronicas; Isaias 9:7; Mateo 21:9; Lucas 1:32; Juan 7:42.