Nagsurat ni Pablo Kadagiti Kongregasion

TI KAIPASPASDEK a kongregasion Kristiano addaan iti napateg nga akem iti pannakaitungpal ti panggep ni Jehova. Ngem nangrugi a dagus ti ibubusor kadagiti Kristiano idi umuna a siglo. Makapagtalinaedda ngata a natarnaw iti Dios iti laksid dagiti panangidadanes iti ruar ti kongregasion ken dagiti di madmadlaw a peggad iti uneg ti kongregasion? Ti Kristiano a Griego a Kasuratan ket naglaon iti 21 a surat a mangipaay kadagiti kasapulan a balakad ken pammaregta.

Ni apostol Pablo ti nangisurat iti 14 kadagita a surat​—manipud Roma agingga iti Hebreo. Dagitoy a surat ket naipanagan kadagiti nakaituronganda​—indibidual man wenno kameng ti partikular a kongregasion. Usigentayo ti sumagmamano a topiko kadagiti surat ni Pablo.

Balakad maipapan iti moralidad ken kababalin. Dagiti agar-aramid iti pannakikamalala, pannakiabig, ken dadduma a nadagsen a basol “saandanto a tawiden ti pagarian ti Dios.” (Galacia 5:19-21; 1 Corinto 6:9-11) Dagiti agdaydayaw iti Dios masapul nga agkaykaysada aniaman ti nasionalidadda. (Roma 2:11; Efeso 4:1-6) Rumbeng a siraragsak a tumulongda kadagiti agkasapulan a kapammatianda. (2 Corinto 9:7) “Agkararagkayo a di agressat,” kinuna ni Pablo. Kinapudnona, naiparegta kadagiti agdaydayaw nga agkararagda ken Jehova ket iyebkasda dagiti adda iti kaungganda. (1 Tesalonica 5:17; 2 Tesalonica 3:1; Filipos 4:6, 7) Tapno imdengan ti Dios dagiti kararagtayo, masapul a nabuyogan dayta iti pammati.​—Hebreo 11:6.

Ania ti makatulong kadagiti pamilia tapno rumang-ayda? Dagiti assawa a lallaki rumbeng nga ayatenda ti assawada kas iti bukodda a bagi. Dagiti assawa a babbai masapul nga addaanda iti nauneg a panagraem iti assawada. Masapul nga agtulnog dagiti annak kadagiti nagannakda, ta makaay-ayo daytoy iti Dios. Dagiti nagannak masapul a siaayat nga iwanwan ken sanayenda dagiti annakda babaen kadagiti nadiosan a prinsipio.​—Efeso 5:22–6:4; Colosas 3:18-21.

Nalawlawagan dagiti Kristiano maipapan iti panggep ti Dios. Adu a sagudayen ti Mosaiko a Linteg ti nangsaluad ken nangiwanwan kadagiti Israelita agingga a dumteng ti Kristo. (Galacia 3:24) Nupay kasta, saan a kasapulan nga alagaden dagiti Kristiano dayta a Linteg tapno makapagdayawda iti Dios. Iti suratna kadagiti Hebreo​—dagiti Kristiano a Judio​—adu ti inlawlawag ni Pablo mainaig iti kaipapanan ti Linteg ken no kasano a natungpal ken Kristo ti panggep ti Dios. Inlawlawag ni Pablo nga adda naimpadtuan a pateg ti nagduduma nga urnos iti sidong dayta a Linteg. Kas pagarigan, dagiti panangidaton kadagiti animal iladladawanda ti panangidaton ni Jesus iti biagna tapno pudpudno a mapakawan dagiti basol. (Hebreo 10:1-4) Babaen ti ipapatay ni Jesus, winaswas ti Dios dayta a tulag ti Linteg, tangay saanen a kasapulan dayta.​—Colosas 2:13-17; Hebreo 8:13.

Pannakaiwanwan iti umiso a pannakaorganisar ti kongregasion. Dagiti lallaki a sidadaan a mangibaklay kadagiti annongen iti kongregasion masapul a nangato ti pagalagadanda iti moral ken maragpatda dagiti nainkasuratan a kualipikasion. (1 Timoteo 3:1-10, 12, 13; Tito 1:5-9) Tapno makapagpipinnaregta dagiti agdaydayaw ken Jehova a Dios, nasken nga agtataripnongda. (Hebreo 10:24, 25) Nasken a makapabileg ken makaisuro dagiti gimong ti panagdayaw.​—1 Corinto 14:26, 31.

Idi insurat ni Pablo ti maikadua a suratna ken Timoteo, nakasublin ti apostol idiay Roma; naibalud ken ur-urayenna ti pannakabistana. Sumagmamano laeng dagiti nakaitured a sumarungkar kenkuana. Ammo ni Pablo nga asidegen ti ipapatayna. Kinunana: “Nakirupakak iti nasayaat a dangadang, tinarayko ti tarayen agingga iti pagpatinggaan, inalagadko ti pammati.” (2 Timoteo 4:7) Di nagbayag kalpasanna, mabalin a pinapatayda ni Pablo maigapu iti pammatina. Ngem dagiti surat ti apostol iwanwanwanna dagiti pudno nga agdaydayaw iti Dios agingga ita.

​—Naibasar iti Roma; 1 Corinto; 2 Corinto; Galacia; Efeso; Filipos; Colosas; 1 Tesalonica; 2 Tesalonica; 1 Timoteo; 2 Timoteo; Tito; Filemon; Hebreo.