Ti Sekreto a Kayattayo a Maammuan

Adda kadin sekreto a naibaga kenka?—a Ibaga ti Biblia ti maysa a “sagrado a palimed” wenno sekreto. Sagrado dayta ta naggapu iti Dios ken saan nga ammo dagiti tattao. Kayat met a maammuan dayta dagiti anghel. Kayatmo kadi met a maammuan dayta?—

Idi un-unana, pinarsua ti Dios ti umuna a lalaki ken babai. Adan ken Eva ti naganda. Inikkan ida ti Dios iti napintas a pagyanan a naawagan iti hardin ti Eden. No nagtulnogda iti Dios, naaramidda koma a paraiso ti intero a daga. Kaduada koma ti annakda a nagyan iti Paraiso iti agnanayon. Ammom kadi no ania ti inaramid da Adan ken Eva?—

Saan a paraiso ti paggigianantayo ita gapu ta nagsukirda iti Dios. Ngem imbaga ti Dios nga aramidenna a napintas a lugar ti intero a daga. Kayat met ti Dios nga agbiagtayo iti agnanayon ken naragsaktayo. Kasano nga aramiden ti Dios dayta? Nabayag a saan nga ammo dayta dagiti tattao. Sekreto idi dayta.

Idi immay ni Jesus ditoy daga, adu pay ti insurona maipapan iti dayta a sekreto. Maipapan dayta iti Pagarian ti Dios. Imbagana kadagiti tattao nga ikararagda nga umay ti Pagarian. Ngamin, dayta ti usaren ti Dios tapno aramidenna a napintas a paraiso ti intero a daga.

Kayatmo kadi a maammuan dayta a sekreto?— Laglagipem a dagiti laeng agtulnog ken Jehova ti agbiag iti Paraiso. Adu ti estoria ti Biblia maipapan kadagiti lallaki ken babbai a nagtulnog ken Jehova. Kayatmo kadi a maam-ammo ida?— Adalenta ti maipapan kadakuada ken no kasano a matuladta ida.