Intultuloy nga Inaramid ni Samuel ti Umiso

Ubing pay ni Samuel idi nagyan ken nagserbi iti tabernakulo. Idiay tabernakulo ti papanan dagiti tattao tapno agdayawda ken Jehova. Ammom kadi no apay nga adda ni Samuel iti tabernakulo? Ammuenta nga umuna ti maipapan ken Anna a nanangna.

Nabayagen nga awanan iti anak ni Anna uray kayatna koma ti maaddaan. Isu a nagkararag ken nagpakpakaasi ken Jehova. Inkarina a no maaddaan iti anak, ipannanto iti tabernakulo tapno agyan ken agserbi sadiay. Sinungbatan ni Jehova ti kararag ni Anna ket naaddaan iti anak. Pinanagananna iti Samuel. Kas inkari ni Anna, idi agtawenen ni Samuel iti tallo wenno uppat, impanna iti tabernakulo tapno agserbi iti Dios.

Ni Eli ti agserserbi idi kas nangato a padi idiay tabernakulo. Agserserbi met idi idiay ti dua nga annakna. Laglagipem a ti tabernakulo ket balay a pagdaydayawan iti Dios. Masapul a naimbag ti aramiden dagiti agserserbi idiay tabernakulo. Ngem nagdakes ti ar-aramiden dagiti annak ni Eli. Makitkita dayta ni Samuel. Nagaramid kadi met ni Samuel iti dakes kas kadagiti annak ni Eli?— Saan, no di ket intultuloyna nga inaramid ti umiso, kas iti insuro da tatang ken nanangna.

Ania koma ti inaramid ni Eli kadagiti dua nga annakna?— Dinusana koma ida ken dina idan pinalubosan nga agserbi iti balay ti Dios. Ngem saan nga inaramid dayta ni Eli, isu a nakaunget ni Jehova kenkuana ken kadagiti annakna. Imbaga ni Jehova a dusaenna ida.

Maysa a rabii, bayat a matmaturog ni Samuel, adda nangngegna nga umaw-awag kenkuana: ‘Samuel!’ Nagtaray ken Eli, ngem imbaga ni Eli: ‘Saanka nga inayaban.’ Namindua pay a napasamak dayta. Ngem iti maikatlo a gundaway, imbaga ni Eli ken Samuel a no adda manen umawag kenkuana, kastoy ti ibagana: ‘Pangngaasim, Apo Jehova, agsaoka ta dumdumngegak.’ Kasta ngarud ti inaramid ni Samuel. Idin kinuna ni Jehova ken Samuel: ‘Ibagam ken Eli a dusaek ti pamiliana gapu kadagiti dakes nga inaramidda.’ Nalaka ngata ken Samuel nga ibaga dayta ken Eli?— Saan. Ngem uray mabuteng ni Samuel, inaramidna latta ti imbaga ni Jehova. Natungpal ti imbaga ni Jehova. Napapatay ti dua nga annak ni Eli, ken natay met ni Eli.

Nasayaat a tuladentayo ni Samuel. Inaramidna ti umiso uray nakitana ti dakes nga ar-aramiden ti dadduma. Sika ngay? Tuladem kadi ni Samuel ket itultuloymo nga aramiden ti umiso? No aramidem dayta, maparagsakmo ni Jehova ken da tatang ken nanangmo.