Nainsiriban a Panangusar iti Kuarta

Masapultay amin ti kuarta tapno maipaay ti kasapulan ti pamiliatayo. (Proverbio 30:8) Kinapudnona, “ti kuarta agpaay a salaknib.” (Eclesiastes 7:12) Mabalin a narigat a pagsaritaan dagiti agassawa ti maipapan iti kuarta. Ngem diyo koma ipalubos a dayta ti mangdadael iti relasionyo nga agassawa. (Efeso 4:32) Masapul nga agtalekkayo iti maysa ken maysa ken pagsaritaanyo no ania ti pangusaranyo iti kuartayo.

1 PLANUEN A NAIMBAG

TI KUNA TI BIBLIA: “Asino kadakayo a kayatna ti mangbangon iti torre ti saan nga agtugaw nga umuna ket pattapattaenna ti magastos, tapno kitaenna no adda umanay a pangleppasna iti dayta?” (Lucas 14:28) Nasken a planuenyo a naimbag ti pangusaranyo iti kuartayo. (Amos 3:3) Ammuenyo no ania ti kasapulanyo a gatangen ken no mano ti kabaelanyo a gastuen. (Proverbio 31:16) Saan a masapul a gatangem ti maysa a banag gapu ta adda kuarta a panggatangmo. Liklikam ti umutang. Gastuem laeng ti adda a kuartam.—Proverbio 21:5; 22:7.

NO ANIA TI MAARAMIDAM:

• No adda sobra a kuartayo iti ngudo ti bulan, pagsaritaanyo no pangigatanganyo iti dayta

• No kurang ti kuartayo, kissayan ti paggastuanyo. Kas pagarigan, nasayaat no aglutokayo laengen imbes a mangankayo iti ruar

2 AGBALIN A NAPUDNO KEN REALISTIKO

TI KUNA TI BIBLIA: “Mangaramidkami iti napudno a sagana, saan laeng nga iti imatang ni Jehova, no di ket kasta met iti imatang dagiti tattao.” (2 Corinto 8:21) Ammo koma ti asawam no mano ti sueldom ken magastom.

Pagsaritaanyo nga agassawa no adda dakkel a paggastuanyo. (Proverbio 13:10) Mataginayon a natalna ti relasionyo nga agassawa no pagsaritaanyo ti maipapan iti kuarta. Ibilangmo ti sueldom a saanmo a bukod a kuarta no di ket kuarta ti pamilia.—1 Timoteo 5:8.

NO ANIA TI MAARAMIDAM:

• Pagtulaganyo ti mabalinyo a gastuen a saanyon a masapul nga ibaga iti maysa ken maysa

• Diyo urayen a tumaud ti problema sakbay a pagsaritaanyo ti maipapan iti kuarta