Ni Maria—Masikog Ngem Awanan Asawa

Uppat a bulanen a masikog ni Maria. Lagipem a bayat dagiti umuna a bulan ti panagsikogna, nakipagyan iti kabagianna a ni Elisabet iti katurturodan ti Judea nga adda iti abagatan. Ngem nakaawiden ni Maria iti ilina a Nazaret. Maammuanton dagiti tattao a masikog. Panunotem no kasano karigat ti kasasaadna!

Naitulagen a mayasawa ni Maria iti karpintero a kalugaranna nga agnagan Jose. Ammona a sigun iti Linteg ti Dios iti Israel, no makidenna iti sabali a lalaki ti babai a naitulagen iti maysa a lalaki, maubor agingga a matay. (Deuteronomio 22:23, 24) Gapuna, nupay saan met a nakikamalala ni Maria, mabalin a mariribukan no kasano nga ilawlawagna ken Jose ti panagsikogna ken no anianto ti mapasamak.

Tallo a bulan a saan a nagkitkita da Jose ken Maria, isu a masiguradotayo a magagaran ni Jose a makakita kenkuana. Inton agkitada, mabalin nga ibaga ni Maria ti kasasaadna. Ikagumaanna nga ilawlawag a nagsikog babaen iti nasantuan nga espiritu ti Dios. Nupay kasta, kas iti mapanunotmo, nagrigat nga awaten ken patien ni Jose dayta.

Ammo ni Jose a ni Maria ket nasingpet a babai ken nasayaat ti reputasionna. Kasta met, ay-ayatenna unay. Ngem uray no kasano ti panangilawlawag ni Maria, mabalin a panunoten ni Jose nga agsikog laeng ni Maria babaen iti sabali a lalaki. Saan a kayat ni Jose a maubor ni Maria wenno maibabain iti publiko, isu a pinanggepna a sililimed nga idiborsio. Idi kaaldawanda, maibilangen kas agassawa dagiti nagtulagen nga agkasar, ket masapul ti diborsio tapno mawaswas dayta.

Idi agangay, nakaturog ni Jose bayat a pampanunotenna no ania ti aramidenna. Nagparang kenkuana iti tagtagainep ti anghel ni Jehova. Kinunana: “Dika maamak a mangasawa ken Maria, ta nagsikog babaen ti nasantuan nga espiritu. Mangipasngayto iti maysa a lalaki, ket panaganamto iti Jesus, ta wayawayaannanto ti ilina kadagiti basolda.”—Mateo 1:20, 21.

Idi nakariing ni Jose, nagyaman ta nalawlawaganen ti problemana! Inaramidna a dagus ti imbaga ti anghel. Inyawidna ni Maria. Daytoy ti nagserbi kas seremonia ti kasar, a mangipakita iti publiko nga agassawan da Jose ken Maria. Nupay kasta, saan a nakidenna ni Jose ken Maria bayat a sikogna ni Jesus.

Sumagmamano a bulan kalpasanna, nagsagana a pumanaw idiay Nazaret da Jose ken Maria, a dandani idin agpasngay. Sadino ti papananda iti panawen a dandanin agpasngay ni Maria?