Nakalibasda Manipud iti Dakes nga Agturay

Riniing ni Jose ni Maria ta adda nasken nga ibagana. Kalkalpas laeng a nagparang kenkuana ti anghel ni Jehova babaen ti tagtagainep ket kinunana: “Bumangonka, alaem ti ubing ken ti asawam ket mapankayo idiay Egipto, ken agyankayo sadiay agingga nga ibagak a pumanawkayo, ta sapulento ni Herodes ti ubing tapno papatayenna.”—Mateo 2:13.

Dagus a pimmanaw da Jose, Maria, ken ti anakda iti rabii. Apagisu unay dayta a tiempo ta naammuan ni Herodes nga isu ket sinikapan dagiti astrologo. Imbagana kadakuada nga agsublida tapno agipadamagda kenkuana. Imbes nga aramidenda dayta, nagawidda iti pagilianda. Kasta unay ti pungtot ni Herodes. Gapu ta kayatna latta a papatayen ni Jesus, imbilinna a mapapatay ti amin nga ubbing a lallaki idiay Betlehem ken iti aglawlawna nga agtawen iti dua ken nababbaba. Imbatayna dayta a panagkuenta sigun iti naammuanna kadagiti astrologo a naggapu iti Daya.

Nakadakdakes dayta a panangpapatay kadagiti ubbing! Saantayo nga ammo no mano nga ubbing ti napapatay, ngem ipakita ti nakaro a panagsangit ken panagdung-aw dagiti agladladingit nga inna a natungpal ti impadto ti propeta ti Dios a ni Jeremias.—Jeremias 31:15.

Iti dayta a tiempo, addan ni Jose ken ti pamiliana idiay Egipto, ket nagtalinaedda sadiay. Maysa a rabii, nagparang manen ken Jose ti anghel ni Jehova babaen ti tagtagainep. Kinuna ti anghel: “Bumangonka, alaem ti ubing ken ti asawam ket mapankayo idiay Israel, ta natayen dagidiay mayat a mangpapatay iti ubing.” (Mateo 2:20) Gapuna, natalgeden ti rikna ni Jose a mabalindan ti agawid iti ilida. Iti dayta a pasamak, adda manen padto ti Biblia a natungpal—maayaban manipud Egipto ti Anak ti Dios.—Oseas 11:1.

Agparang a kayat ni Jose nga agtalinaeden ti pamiliana idiay Judea, a mabalin nga iti asideg ti ili ti Betlehem, ti lugar a nagyananda sakbay a napanda idiay Egipto. Ngem naammuanna a ti dakes nga anak ni Herodes a ni Arkelao ti agdama nga ari ti Judea. Pinakdaaran manen ti Dios ni Jose babaen ti tagtagainep. Isu a nagdaliasat manen ni Jose ken ti pamiliana. Nagpaamiananda ken nagyanda iti siudad ti Nazaret, idiay Galilea, nga adayo iti Jerusalem a sentro ti panagdayaw dagiti Judio. Ditoy a dimmakkel ni Jesus. Gapuna, sabali manen a padto ti natungpal: “Maawaganto iti Nazareno.”—Mateo 2:23.