Nagkaykaysa a Panagkakabsat

ITI agarup 1,500 a tawen, ti nasion ti Israel ti imbilang ni Jehova a Dios kas ili a mangaw-awit iti naganna. Kalpasanna, “inawat [ni Jehova] dagiti tattao kadagiti nasion iti umuna a gundaway tapno mangpili iti ili a maipaay iti naganna.” (Ara. 15:14) Dagiti tattao a maipaay iti nagan ni Jehova ket agbalin a saksina, nagkaykaysada iti isip ken aramid sadinoman ti pagnanaedanda ditoy daga. Daytoy a panagkaykaysa ti maysa nga ili maipaay iti nagan ti Dios ket kaitungpalan ti imbilin ni Jesus kadagiti pasurotna: “Inkayo ngarud kadagiti tattao iti amin a nasion ket pagbalinenyo ida nga adalak, ken bautisaranyo ida iti nagan ti Ama ken iti nagan ti Anak ken iti nagan ti nasantuan nga espiritu, ken isuroyo a tungpalenda ti amin nga imbilinko kadakayo.”​—Mat. 28:19, 20.

² Idi indedikarmo ti biagmo ken Jehova ken nagpabautisarka, nagbalinkan nga adalan ni Jesu-Kristo. Pasetka ti nagkaykaysa ken sangalubongan a panagkakabsat dagiti Kristiano, a di mangipalubos a madadael ti panagkaykaysada gapu iti panagduduma ti nasion, tribu, ken kasasaad ti biag. (Sal. 133:1) Kas resultana, ipatpateg ken raraemem dagiti Kristiano a kakabsatmo iti kongregasion. Mabalin a dimo kayat idi a kalangen ida gapu ta sabali ti puli, nasion, ken edukasion a naragpatda. Addaanka iti singgalut iti nainkabsatan nga ayat a nalaglagda ngem iti aniaman a relasion, iti man kagimongan, relihion, wenno pamilia.​—Mar. 10:29, 30; Col. 3:14; 1 Ped. 1:22.

PANANGBALBALIW ITI PANAGPAMPANUNOT

³ No marigatan ti dadduma a mangikkat iti panangidumduma gapu iti puli, politika, kasasaad iti kagimongan, wenno dadduma pay a nariinganda a panangidumduma, mabalin a panunotenda dagiti nagkauna a Judio a Kristiano. Masapul idi a liklikandan ti panangidumduma dagiti Judio kadagiti tattao iti amin a nasion gapu iti relihion. Laglagipem nga idi nabilin ni Pedro a mapan iti pagtaengan ti Romano a senturion a ni Cornelio, siaanus nga insagana ni Jehova ni Pedro para iti dayta nga annongen.​—Ara., kap. 10.

⁴ Iti maysa a sirmata, nabilin ni Pedro a mangparti ken mangan kadagiti animal nga ibilang dagiti Judio a narugit. Idi nagkedked ni Pedro, kinuna kenkuana ti timek manipud langit: “Isardengmon nga ibaga a maiparit a kanen ti bambanag a dinalusan ti Dios.” (Ara. 10:15) Kasapulan pay a bumallaet ti Dios tapno maisagana ti panunot ni Pedro para iti annongen a maited kenkuana, ti isasarungkar iti maysa a tao manipud iti nasnasion. Ngem idi nagtungpal iti bilin ni Jehova, kinuna ni Pedro kadagiti naguummong: “Ammoyo nga iparit ti linteg a makilangen wenno umasideg ti maysa a Judio iti tao a sabali ti pulina, ngem impakita kaniak ti Dios nga awan koma ti tao nga ibilangko a narugit. Isu a saanak a nagduadua nga immay idi pinaayabannak.” (Ara. 10:28, 29) Kalpasanna, nakita ni Pedro ti pammaneknek nga inanamongan ni Jehova ni Cornelio ken ti sangakabbalayanna.

⁵ Kas maysa a Fariseo a nangato ti adalna, masapul nga agpakumbaba ni Saulo a taga-Tarso ken makilangen kadagiti tattao nga ibilbilangna idi a saan a nasayaat a kakadua. Masapul pay idi nga umawat iti bilin kadakuada. (Ara. 4:13; Gal. 1:13-20; Fil. 3:4-11) Panunotentay laengen dagiti panagbalbaliw iti panagpampanunot nga inaramid dagiti tattao a kas kada Sergio Paulo, Dionisio, Damaris, Filemon, Onesimo, ken dadduma pay idi inawatda ti naimbag a damag ken nagbalin nga adalan ni Jesu-Kristo.​—Ara. 13:6-12; 17:22, 33, 34; Flm. 8-20.

PANANGTAGINAYON ITI INTERNASIONAL A PANAGKAYKAYSATAYO

⁶ Awan duadua a ti ayat dagiti kakabsat iti kongregasion natulongannaka nga umadani ken Jehova ken iti organisasionna. Napaliiwmo ti nalawag a tanda ti ayat ken panagkaykaysa a pagilasinan kadagiti pudno nga adalan ni Jesu-Kristo, kas iti kinunana: “Mangtedak iti baro a bilin, nga ayatenyo ti maysa ken maysa; no kasano ti panangayatko kadakayo, kasta met ti panagiinnayatyo. Maammuanto ti amin a dakayo dagiti adalak​—no agiinnayatkayo.” (Juan 13:34, 35) Ngem ad-adda pay nga inapresiarmo ni Jehova ken ti organisasionna idi nabigbigmo a ti ayat iti kongregasion ket pakakitaan laeng iti ayat nga adda iti sangalubongan a panagkakabsat. Makitkitam ti kaitungpalan ti padto ti Biblia maipapan iti pannakaurnong dagiti tattao kadagitoy maudi nga al-aldaw tapno agdayaw ken Jehova nga addaan talna ken panagkaykaysa.​—Mik. 4:1-5.

⁷ Gapu iti adu a banag a pakaigapuan ita ti panagsisina, siasino ti makapanunot a posible nga agkaykaysa dagiti tattao iti “amin a nasion, tribu, puli, ken lengguahe”? (Apoc. 7:9) Usigem ti nagdudumaan dagiti tattao a nagtaud iti kagimongan a narang-ay ti teknolohiana ken dagiti mangan-annurot kadagiti nagkauna a kaugalian ti tribu. Kitaem dagiti narelihiosuan a panagririri dagiti tattao nga agpapada ti puli ken nasionda. Gapu ta maitantandudo ti nasionalismo, ad-adda itan a nabingaybingay dagiti tattao iti politika. Ken no usigem ti nagdudumaan ti panagbiag dagiti tattao ken ti dadduma pay a pakaigapuan ti panagsisina, maysa a milagro a makapagkaykaysa dagiti tattao iti amin a nasion, lengguahe, grupo, ken kasasaad a saan a madadael ti talna ken ayatda iti maysa ken maysa. Ti laeng Dios a Mannakabalin-amin ti makaaramid iti dayta.​—Zac. 4:6.

⁸ Ngem pudno nga adda ti kasta a panagkaykaysa. Idi nagbalinkan a dedikado ken bautisado a Saksi ni Jehova, pasetkan iti nagkaykaysa nga ilina. Yantangay mabembenepisiaranka iti dayta a panagkaykaysa, addaanka iti responsabilidad a tumulong a mangtaginayon iti dayta. Maaramidan daytoy babaen ti panangtungpal iti sasao ni apostol Pablo iti Galacia 6:10: “Bayat nga adda gundawaytayo, agaramidtayo koma iti naimbag iti amin, ngem nangnangruna kadagiti kapammatiantayo.” Tungtungpalentayo met daytoy a balakad: “Dikay agaramid iti aniaman gapu iti riri wenno kinapangas, no di ket agpakumbabakayo, nga ibilangyo a nangatngato ti sabsabali ngem dakayo, a sapulenyo dagiti pagimbagan ti dadduma, saan la a dagiti bukodyo a pagimbagan.” (Fil. 2:3, 4) No la ket ta sanayentayo ti bagitayo a mangmatmat kadagiti kakabsattayo a kas iti panangmatmat ni Jehova kadakuada ket ditay matmatan ida sigun iti langada, matagiragsaktayo ti natalna ken naragsak a relasion kadakuada.​—Efe. 4:23, 24.

PANNAKASEKNAN ITI MAYSA KEN MAYSA

⁹ Kas iti panangyilustrar kadatayo ni apostol Pablo, ti kongregasion ket saan a nabingbingay no di ket maseknanda iti maysa ken maysa. (1 Cor. 12:14-26) Mabalin nga adayotayo kadagiti dadduma a kakabsat iti sabali a paset ti lubong, ngem maseknantayo latta iti pagimbaganda. No maidadanes ti dadduma a kakabsattayo, maladingitantayo unay para kadakuada. No agkasapulan iti tulong ti dadduma wenno agsagsagabada gapu iti didigra wenno gubat wenno riribuk iti pagilianda, magagaran ti dadduma a mangbirok kadagiti pamay-an tapno makaipaayda iti naespirituan ken material a tulong.​—2 Cor. 1:8-11.

¹⁰ Rumbeng nga inaldaw nga ikararagantayo dagiti kakabsattayo. Mabalin nga adda dagiti masulisog nga agaramid iti dakes. Mabalin met nga ammo ti kaaduan ti rigat a sagsagabaen ti dadduma. Adda met dagiti busbusoren dagiti katrabahuan ken kapamiliada a saan a Saksi a saan nga ammo ti dadduma. (Mat. 10:35, 36; 1 Tes. 2:14) Maseknantayo iti mapaspasaranda gapu ta pasetnatayo iti sangalubongan a panagkakabsat. (1 Ped. 5:9) Dadduma kadatayo ti mangikagkagumaan nga agserbi ken Jehova, a mangidadaulo iti kongregasion ken iti trabaho a panangasaba. Adda met dagiti nadutokan a mangiwanwan iti sangalubongan a trabaho. Masapul nga ikararagantayo ida. No aramidentayo dayta, maipakitatayo ti ayat ken pannakaseknantayo, uray no saantayo a personal a makatulong kadakuada.​—Efe. 1:16; 1 Tes. 1:2, 3; 5:25.

¹¹ Gapu kadagiti riribuk ditoy daga kadagitoy maudi nga al-aldaw, masapul a nakasagana ti ili ni Jehova a tumulong iti maysa ken maysa. No dadduma, masapul ti nasaknap a panangsaranay ken panangted iti adu a material a tulong no adda didigra, kas kadagiti ginggined ken layus. Nagsayaat ti inyulidan dagiti Kristiano idi umuna a siglo maipapan iti panangtulong. Gapu ta silalagipda iti balakad ni Jesus, dagiti adalan iti Antioquia siraragsak a nangtedda kadagiti material a sagut kadagiti kakabsat idiay Judea. (Ara. 11:27-30; 20:35) Idi agangay, pinaregta ni apostol Pablo dagiti taga-Corinto a suportaranda ti panangsaranay a naaramid iti organisado a pamay-an. (2 Cor. 9:1-15) Ita, no agsagaba dagiti kakabsattayo gapu kadagiti narigat a kasasaad ket agkasapulanda iti material a tulong, agtignay a dagus ti organisasion ken dagiti indibidual a Kristiano tapno mangtedda iti tulong.

NAILASIN A MANGARAMID ITI PAGAYATAN NI JEHOVA

¹² Ti nagkaykaysa ken sangalubongan a panagkakabsattayo ket organisado a mangaramid iti pagayatan ni Jehova. Ita, pagayatanna a maikasaba ti naimbag a damag maipapan iti Pagarian iti intero a daga maipaay a pangsaksi iti amin a nasion. (Mat. 24:14) Bayat nga itungtungpaltayo dayta, kayat ni Jehova nga agbiagtayo a maitunos kadagiti nangato a pagalagadanna iti moral. (1 Ped. 1:14-16) Situtuloktayo koma nga agpasakup iti maysa ken maysa ken agtrabaho para iti pannakaisaknap ti naimbag a damag. (Efe. 5:21) Saan a panawen ita nga iyun-unatayo ti personal a pagimbagantayo, no di ket iyun-unatayo ti Pagarian ti Dios. (Mat. 6:33) No sipapanunottayo iti daytoy ken agtrabahotayo a sangsangkamaysa maipaay iti naimbag a damag, naragsaktayo ken makariknatayo iti pannakapnek ita ken mangyeg iti agnanayon a bendision.

¹³ Kas Saksi ni Jehova, talaga a naidumdumatayo. Nailasintayo manipud iti sangatauan kas nadalus nga ili ken naregta nga agserserbi iti Diostayo. (Tito 2:14) Naidumatayo gapu iti panagdayawtayo ken Jehova. Saantay laeng nga agtrabtrabaho a sangsangkamaysa kas agkakabsat iti intero a daga no di ket us-usarentayo pay ti maymaysa a lengguahe ti kinapudno ken agbibiagtayo maitunos iti kinapudno a sasawentayo. Impadto daytoy ni Jehova babaen ken propeta Sofonias: “Suktakto ti lengguahe dagiti tattao iti nasin-aw a lengguahe, tapno umawagda amin iti nagan ni Jehova, ket agserbida kaniak iti abagan-abaga.”​—Sof. 3:9.

¹⁴ Kalpasanna, pinaltiingan ni Jehova ni Sofonias a mangiladawan iti sangalubongan a panagkakabsat a mapaspasamak ita: “Saanton nga agaramid iti kinakillo dagidiay nabatbati iti Israel; saandanton nga agsao iti kinaulbod, wenno mangallilaw ti dilada; mangandanto ken agiddada, ket awanto ti pagbutnganda.” (Sof. 3:13) Makapagtrabahotayo a sangsangkamaysa gapu ta naawatantayo ti kinapudno iti Sao ni Jehova ken binalbaliwantayo ti panagpampanunottayo ken agbibiagtayo a maitunos kadagiti pagalagadanna. Ti maar-aramidantayo ket kasla imposible no iti panangmatmat dagiti tattao. Wen, kas ili ti Dios, talaga a naidumdumatayo nga ili a mangipapaay iti dayaw kenkuana iti intero a daga.​—Mik. 2:12.