Agtalinaed a Nasinged iti Organisasion ni Jehova

INSURAT ni adalan a Santiago: “Umasidegkayo iti Dios, ket umasidegto kadakayo.” (Sant. 4:8) Nupay imperpektotayo, saan a nakatantan-ok wenno nakaad-adayo unay ni Jehova tapno dina mangngeg dagiti kararagtayo. (Ara. 17:27) Kasanotayo nga umadani iti Dios? Maaramidtayo dayta no pasingedentayo ti relasiontayo ken Jehova agraman ti napasnek a kararag. (Sal. 39:12) Sumingedtayo met iti Dios no regular nga adalentayo ti Biblia. Iti kasta, maam-ammotayo ni Jehova a Dios, dagiti panggepna, ken ti pagayatanna para kadatayo. (2 Tim. 3:16, 17) Kas resultana, masursurotayo nga ayaten ni Jehova ken maaddaantayo iti umiso a panagbuteng a mangpagura kenkuana.​—Sal. 25:14.

² Ngem posible laeng ti makisinninged ken Jehova babaen ti Anakna, ni Jesus. (Juan 17:3; Roma 5:10) Awan ti asinoman a makaited kadatayo iti nasaysayaat a pannakatarus iti panunot ni Jehova malaksid ken Jesus. Am-ammona unay ti Amana isu a naikunana: “Awan ti makaam-ammo iti Anak no di ti Ama, awan met ti makaam-ammo iti Ama no di ti Anak ken ti asinoman a kayat ti Anak a pangipakaammuan.” (Luc. 10:22) Isu a no adalentayo dagiti Ebanghelio tapno maammuantayo ti kapanunotan ken rikrikna ni Jesus, arigna ad-adalentayo ti kapanunotan ken rikrikna ni Jehova. Makatulong dayta tapno agbalintayo a nasinged iti Diostayo.

³ Babaen ti panangidaulo ti Anak ti Dios, sumingedtayo ken Jehova no agtalinaedtayo iti makitkita a paset ti organisasionna a tumultulong kadatayo nga agsursuro no kasano nga aramiden ti pagayatan ti Dios. Kas naipadto iti Mateo 24:45-47, ti Apo a ni Jesu-Kristo dinutokanna ti “matalek ken masirib nga adipen,” a mangipaay iti ‘taraon iti umiso a tiempo’ para iti sangakabbalayan ti pammati. Ita, ipapaayannatayo ti matalek nga adipen iti nawadwad a naespirituan a taraon. Babaen iti daytoy nga adipen, balakadannatayo ni Jehova nga inaldaw a basaentayo ti Saona, regular a tabunuan dagiti Nakristianuan a gimongtayo, ken maaddaan iti makagunggona a pannakiraman iti panangikasaba iti “naimbag a damag maipapan iti Pagarian.” (Mat. 24:14; 28:19, 20; Jos. 1:8; Sal. 1:1-3) Ditay koma pulos matmatan ti matalek nga adipen a kas iti panangmatmat ti tao. Masapul nga ikagumaantayo ti agtalinaed a nasinged iti makitkita a paset ti organisasion ni Jehova ken sumurottayo iti panangiwanwanna. Iti kasta, ad-adda a sumingedtayo iti Diostayo a ni Jehova, a mangpabileg ken mangsalaknib kadatayo iti laksid dagiti pakasuotan.

NO APAY A KUMARKARO DAGITI PAKASUOTAN

⁴ Mabalin a nabayagkan iti kinapudno. Sigurado ngarud nga ammomon no ania ti kaipapanan ti panangibtur kadagiti pakasuotan mainaig iti kinatarnaw. Uray no nabiit pay a naammuam ti maipapan ken Jehova ken nabiit pay a nakitimpuyogka iti ilina, ammom a busbusoren ni Satanas a Diablo ti asinoman nga agpaspasakup iti kinasoberano ni Jehova. (2 Tim. 3:12) Gapuna, bassit man wenno adun ti inibturam a pakasuotan, dika koma agbuteng wenno maupay. Inkari ni Jehova a tulongannaka ken gunggonaannaka babaen ti panangisalakanna kenka ken panangtedna iti biag iti masanguanan.​—Heb. 13:5, 6; Apoc. 2:10.

⁵ Bayat ti nabatbati nga aldaw iti sistema ni Satanas, mabalin a makapasartayo amin kadagiti pakasuotan. Sipud pay nangrugi nga agturay ti Pagarian ti Dios idi 1914, saanen a makapan ni Satanas idiay langit nga ayan ni Jehova. Naitapuak ditoy daga agraman dagiti dakes nga anghelna. Ti rumigrigat a kasasaad ditoy daga, agraman ti kumarkaro a pannakaidadanes dagiti adipen ni Jehova, ket resulta ti pungtot ni Satanas ken pammaneknek nga agbibiagtayon iti maudi nga al-aldaw ti dakes a panangiturayna iti sangatauan.​—Apoc. 12:1-12.

⁶ Makapungtot unay ni Satanas gapu iti naipababa a saadna ken ammona nga ababan ti tiempona. Ar-aramiden ni Satanas ken dagiti demoniona ti amin a kabaelanda tapno mapasardeng ti panangikasaba iti Pagarian ken madadaelna ti panagkaykaysa ti ili ni Jehova. Gapuna, masapul a makigubattayo iti naespirituan a kasla “makilablabantayo saan a maibusor iti dara ken lasag, no di ket maibusor kadagiti gobierno, maibusor kadagiti autoridad, maibusor kadagiti agturay iti lubong daytoy a kinasipnget, maibusor kadagiti dakes nga espiritu a puersa kadagiti nailangitan a disso.” Tapno agballigitayo iti dasig ni Jehova, ditay koma sumardeng a makilaban no di ket nakasuot koma a kanayon ti naespirituan a kabaltayo. Masapul nga ‘agtakdertayo a sititibker maibusor kadagiti nasikap nga aramid’ ti Diablo. (Efe. 6:10-17) Nasken ngarud nga agibturtayo.

SURSURUEN TI AGIBTUR

⁷ Ti panagibtur ket “ti abilidad a mangandur iti narigat a kasasaad.” Iti naespirituan a panangmatmat, ti panagibtur ket tumukoy iti kinatured nga agaramid iti umiso iti laksid ti rigat, ibubusor, pannakaidadanes, wenno dadduma pay a banag a nairanta a mangdadael iti kinamatalektayo iti Dios. Masapul a sursuruen dagiti Kristiano ti agibtur. Agkasapulan daytoy iti panawen. Bayat a rumangrang-aytayo iti naespirituan, ad-adda met a makapagibturtayo. No ibturantayo dagiti babassit a pakasuotan ti pammatitayo iti rugrugi pay laeng ti panagbalintayo a Kristiano, nabilbilegtayo a mangibtur kadagiti dumteng a narigrigat a pakasuotan. (Luc. 16:10) Ditay koma urayenen a dumteng dagiti narigat a pakasuotan, no di ket ita pay laeng, ikagumaantayo koman a pabilgen ti pammatitayo. Sakbay a dumteng ti pakasuotan, adda koman naaramidtayo a desision. Idi tinukoyna a nasken a sursuruen ti agibtur agraman ti dadduma pay a nadiosan a kualidad, insurat ni apostol Pedro: “Ikagumaanyo nga inayon iti pammatiyo ti kinaimbag, iti kinaimbagyo ti pannakaammo, iti pannakaammoyo ti panagteppel, iti panagteppelyo ti panagibtur, iti panagibturyo ti debosion iti Dios, iti debosionyo iti Dios ti nainkabsatan nga ayat, iti nainkabsatan nga ayatyo ti ayat.”​—2 Ped. 1:5-7; 1 Tim. 6:11.

⁸ Impaganetget ni Santiago a nasken a sursuruentayo ti agibtur. Kunana iti suratna: “Kakabsatko, agragsakkayo no maipasangokayo iti nadumaduma a pakasuotan, ta ammoyo a no aramidenyo daytoy, ti nasubok a pammatiyo pataudenna ti panagibtur. Ngem bay-anyo nga itungpal ti panagibtur ti panggepna, tapno agbalinkayo a naan-anay ken awan pakababalawanna iti amin a banag, nga awan ti aniaman a pagkuranganyo.” (Sant. 1:2-4) Kuna ni Santiago a rumbeng a maragsakan dagiti Kristiano no dumteng dagiti pakasuotan ken masapul a sanguenda dagita gapu ta matulongandatayo nga agibtur. Kasta kadi ti panangmatmatmo kadagiti pakasuotan? Kalpasanna, impakita ni Santiago a dakkel ti maaramidan ti panagibtur tapno sumayaat ti personalidadtayo kas Kristiano ken agbalintayo a makaay-ayo iti Dios. Wen, ad-adda a makapagibturtayo iti inaldaw bayat a maipaspasangotayo kadagiti pakasuotan. Inton agangay, ti panagibtur pataudenna ti dadduma pay a nagsasayaat a kualidad a kasapulantayo.

⁹ Ti panagibturtayo ket makaay-ayo ken Jehova; daytoy ti mangtignay kenkuana a manggunggona kadatayo iti agnanayon a biag. Kinuna pay ni Santiago: “Naragsak ti tao nga agtultuloy nga agibtur iti pakasuotan, ta no maaprobaran awatennanto ti korona ti biag, nga inkari ni Jehova kadagidiay agtultuloy nga agayat Kenkuana.” (Sant. 1:12) Wen, agibturtayo gapu ta nakadepende iti dayta ti biagtayo. No ditay agibtur, ditay makapagtalinaed iti kinapudno. No agpaimpluensiatayo iti lubong, mapilitantayo nga agsubli iti lubong. No ditay agibtur, saan nga agtalinaed kadatayo ti espiritu ni Jehova, kas resultana, ditay maipakita ti bungana iti biagtayo.

¹⁰ Tapno agtultuloy a makapagibturtayo kadagitoy narigat a tiempo, masapul nga umiso ti panangmatmattayo kadagiti rigat a mapasarantayo kas Kristiano. Laglagipem ti insurat ni Santiago: “Agragsakkayo.” Mabalin a saan a nalaka nga aramiden dayta gapu ta posible a marigatantayo iti pisikal wenno mental. Ngem laglagipem a ti biagtayo iti masanguanan ti nakataya. Makatulong kadatayo ti kapadasan dagiti apostol no kasano a makapagrag-otayo bayat a maipaspasangotayo iti pakarigatan. Masarakan dayta a salaysay iti libro nga Aramid. Kastoy ti mabasatayo: “Pinaayabanda dagiti apostol, sinapsaplitda ida, sa imbilinda nga isardengdan ti agsao maipapan iti nagan ni Jesus. Kalpasanna, pinalubosanda idan. Iti kasta, pimmanawda iti sanguanan ti Sanhedrin, a maragragsakan gapu ta naibilangda a maikari a maibabain maigapu iti naganna.” (Ara. 5:40, 41) Natarusan dagiti apostol a ti panagsagabada ket pammaneknek a nagtulnogda iti bilin ni Jesus ken an-anamongan ida ni Jehova. Kalpasan ti sumagmamano a tawen, idi insurat ni Pedro ti umuna a naipaltiing a suratna, dinakamatna a nagpateg ti kasta a panagsagaba maigapu iti kinalinteg.​—1 Ped. 4:12-16.

¹¹ Ti sabali pay a kapadasan ket maipapan kada Pablo ken Silas. Bayat nga itungtungpalda ti trabahoda kas misionero idiay Filipos, naaresto ken napabasolda a rirriribukenda kano ti siudad ken ipakpakaammoda dagiti kostumbre a maikontra iti linteg. Kas resultana, nakabkabil ken naibaludda. Ibaga kadatayo ti salaysay ti Biblia a bayat nga addada iti pagbaludan ken di pay naagasan ti sugatda, “idi agarup tengnga ti rabiin, nagkarkararag da Pablo ken Silas ken indaydayawda ti Dios babaen ti kanta, ket dengdenggen ida dagiti balud.” (Ara. 16:16-25) Ti panagsagaba da Pablo ken Silas maigapu ken Kristo ket saan laeng a pammaneknek ti kinamatalekda iti Dios ken kadagiti tattao no di ket kanayonan pay a pangsaksi kadagiti mayat a dumngeg iti naimbag a damag. Nairaman ti biag ti sabsabali. Iti dayta met la a rabii, dimngeg ti agbambantay iti pagbaludan ken ti sangakabbalayanna ket nagbalinda nga adalan. (Ara. 16:26-34) Nagtalek da Pablo ken Silas iti pannakabalin ni Jehova ken iti situtulok a panangtulongna kadakuada kadagiti pakarigatan. Saanda a napaay gapu ta tinulongan ida ni Jehova.

¹² Ipapaay met ita ni Jehova ti amin a kasapulantayo tapno bumilegtayo iti tiempo ti rigat. Kayatna a makapagibturtayo. Impaayna kadatayo ti naipaltiing a Saona a tumulong kadatayo a maaddaan iti umiso a pannakaammo maipapan iti panggepna. Iti kasta, bumileg ti pammatitayo. Addaantayo iti gundaway a makitimpuyog kadagiti kapammatiantayo ken mangipaay iti sagrado a panagserbi. Addaantayo met iti pribilehio a mangtaginayon iti nasinged a relasion ken Jehova babaen ti kararag. Dengdenggenna dagiti ebkas ti panagdayawtayo ken ti naimpusuan a panagdawattayo iti tulong tapno agtalinaedtayo a nadalus iti imatangna. (Fil. 4:13) Bumilegtayo met no utobentayo ti namnamatayo iti masanguanan.​—Mat. 24:13; Heb. 6:18; Apoc. 21:1-4.

PANANGIBTUR ITI NADUMADUMA A PAKASUOTAN

¹³ Dagiti pakasuotan a mapaspasarantayo ita ket kas met laeng kadagiti napasaran dagiti nagkauna nga adalan ni Jesu-Kristo. Iti moderno a panawen, nakapasar dagiti Saksi ni Jehova iti berbal ken pisikal a panangabuso dagiti bumusbusor gapu iti di umiso nga impormasion. Kas idi kaaldawan dagiti apostol, kaaduan nga ibubusor ket insungsong dagiti panatiko iti relihion, a dagiti ulbod a sursuro ken aramidda ket naibutaktak iti Sao ti Dios. (Ara. 17:5-9, 13) No dadduma, maprotektaran ti ili ni Jehova babaen ti panagkiddawda a mabigbig ti legal a kalinteganda a patalgedan dagiti napolitikaan a gobierno. (Ara. 22:25; 25:11) Ngem no dadduma, dagiti opisial a mismo ti mangiparit iti trabahotayo, nga ikagumaanda a pasardengen ti Nakristianuan a ministeriotayo. (Sal. 2:1-3) Kadagita a kasasaad, situtured a tultuladentayo ti ulidan dagiti matalek nga apostol a nangibaga: “Masapul nga agtulnogkami iti Dios kas agturay imbes a kadagiti tattao.”​—Ara. 5:29.

¹⁴ Bayat a maitantandudo ti nasionalismo iti intero a lubong, kumarkaro met ti rigat nga ibturan dagiti manangaskasaba iti naimbag a damag agingga a mapilitanda payen a mangisardeng iti inted ti Dios a ministerioda. Ad-adda nga apresiaren dagiti adipen ti Dios ti pakdaar a masarakan iti Apocalipsis 14:9-12 maipapan iti panagdayaw iti “narungsot nga animal ken iti estatuana.” Mabigbigtayo a napateg ti sasao ni Juan: “Kasapulan nga agibtur dagiti nasantuan, dagiti agtungtungpal kadagiti bilin ti Dios ken mangtultulad iti pammati ni Jesus.”

¹⁵ No dumteng dagiti pakasuotan gapu iti gubat, rebolusion, wenno direkta a panangidadanes ken panangiparit dagiti agtuturay iti trabahotayo, mabalin a saankayon a nawaya a mangaramid iti Nakristianuan a panagdayawyo. Mabalin a saankayon a makapaggigimong kas maysa a kongregasion. Nalabit awanen ti komunikasionyo iti sanga nga opisina. Mabalin a maisardeng ti panagbisita dagiti manangaywan iti sirkito. Mabalin nga awanen ti sumangpet a publikasion. Ania ti aramidem no mapasamak ti aniaman kadagitoy?

¹⁶ Ti sungbat ket aramidem ti amin a kabaelam sigun iti agdama a kasasaadmo. Itultuloymo latta ti personal nga agadal. Masansan a makapagtataripnong dagiti babassit a grupo tapno agadalda kadagiti pagtaengan. Dagiti publikasion a napagadalanen ken ti Biblia ket mabalin nga usaren kadagiti gimong. Dika agbuteng wenno agdanag. Kaaduanna, iti saan nga agbayag maipamuspusan ti Bagi a Manarawidwid ti makikomunikar kadagiti responsable a kakabsat.

¹⁷ Ngem uray no naisinaka kadagiti Kristiano a kakabsatmo, laglagipem a saanka a naisina ken Jehova ken iti Anakna a ni Jesu-Kristo. Nabileg latta ti namnamam. Mangngeg pay laeng ni Jehova dagiti kararagmo, ken mapabilegnaka babaen ti espirituna. Agpaiwanwanka kenkuana. Laglagipem a maysaka nga adipen ni Jehova ken adalan ni Jesu-Kristo. Gapuna, gundawayam ti mangasaba. Bendisionan ni Jehova ti panagreggetmo, ket inton agangay, mabalin a makikaduanto ti dadduma kenka iti pudno a panagdayaw.​—Ara. 4:13-31; 5:27-42; Fil. 1:27-30; 4:6, 7; 2 Tim. 4:16-18.

¹⁸ Ngem no agpeggad ti biagmo, kas kadagiti apostol ken dadduma pay, agtalekka iti “Dios a mangpagungar kadagiti natay.” (2 Cor. 1:8-10) Ti pammatim iti namnama a panagungar tulongannaka a mangibtur uray iti kakaruan nga ibubusor. (Luc. 21:19) Nangipakita ni Kristo Jesus iti ulidan; ammona a napabilegna ti dadduma nga agibtur gapu ta nagmatalek idi nasubok. Mapabilegmo met dagiti kakabsatmo iti kasta a pamay-an.​—Juan 16:33; Heb. 12:2, 3; 1 Ped. 2:21.

¹⁹ Malaksid iti pannakaidadanes ken ibubusor, mabalin nga adda pay dagiti narigat a kasasaad nga ibturam. Kas pagarigan, naupay ti dadduma gapu iti kinaawan interes dagiti tattao iti teritoriada. Masapul a daeran ti dadduma ti pisikal ken emosional a sakitda wenno ibturanda dagiti limitasion gapu kadagiti pagkapuyanda. Masapul nga ibturan idi ni apostol Pablo ti maysa a kita ti pakasuotan a manglapped wenno mangparigat iti panagserbina no dadduma. (2 Cor. 12:7) Kasta met, ni Epafrodito, maysa a Kristiano a taga-Filipos idi umuna a siglo, ket “malidliday unay gapu ta nadamag [dagiti gagayyemna] a nagsakit.” (Fil. 2:25-27) Ti kinaimperpektotayo ken kinaimperpekto ti dadduma ket mabalin a mangpataud kadagiti problema a narigat nga ibturan. Gapu iti nagduduma a personalidad, mabalin a tumaud ti di pagkikinnaawatan kadagiti padatayo a Kristiano wenno uray iti pamiliatayo. Ngem dagita a lapped ket sibaballigi a maibturan ken madaeran dagiti mangipangag iti balakad ti Sao ni Jehova.​—Ezek. 2:3-5; 1 Cor. 9:27; 13:8; Col. 3:12-14; 1 Ped. 4:8.

DETERMINADO NGA AGTALINAED A MATALEK

²⁰ Masapul a kumpettayo iti daydiay dinutokan ni Jehova kas Ulo ti kongregasion, ni Kristo Jesus. (Col. 2:18, 19) Nasken a makitinnulongtayo iti “matalek ken masirib nga adipen” ken dagiti nadutokan a manangaywan. (Heb. 13:7, 17) No surotentayo a naimbag dagiti nateokratikuan nga urnos ken makitinnulongtayo kadagiti mangidadaulo, agbalintayo nga organisado a mangaramid iti pagayatan ni Jehova. Aprobetsarentayo ti pribilehiotayo nga agkararag. Laglagipentayo nga uray maibalud wenno maisinatayo, dinatay malapdan dayta nga agkararag iti naayat a nailangitan nga Amatayo ken dina met madadael ti pannakikaykaysatayo kadagiti padatayo nga agdaydayaw.

²¹ Buyogen ti determinasion ken panagibtur, aramidentayo ti amin a kabaelantayo a mangitungpal iti annongentayo a mangasaba, nga itultuloytayo ti trabaho nga imbilin ti napagungar a ni Jesu-Kristo nga aramiden dagiti pasurotna: “Inkayo ngarud kadagiti tattao iti amin a nasion ket pagbalinenyo ida nga adalak, ken bautisaranyo ida iti nagan ti Ama ken iti nagan ti Anak ken iti nagan ti nasantuan nga espiritu, ken isuroyo a tungpalenda ti amin nga imbilinko kadakayo.” (Mat. 28:19, 20) Kas ken Jesus, masapul nga agibturtayo ken pagtalinaedentayo a nalawag iti panunottayo ti namnama nga ipaay ti Pagarian ken ti biag nga agnanayon. (Heb. 12:2) Kas bautisado nga adalan ni Kristo, adda pribilehiotayo a makiraman iti kaitungpalan ti padto ni Jesus maipapan iti “panungpalan daytoy a sistema ti bambanag.” Kinunana: “Ti naimbag a damag maipapan iti Pagarian maikaskasabanto iti intero a daga tapno maammuan ti amin a nasion; kalpasanna, umayton ti panungpalan.” (Mat. 24:3, 14) No naimpusuan nga aramidentayo ita dayta a trabaho, naragsaktayto nga agbiag nga agnanayon iti nalinteg a baro a lubong ni Jehova!