Surat ti Bagi a Manarawidwid

Patgenmi a Pada nga Agibumbunannag iti Naimbag a Damag:

Nagsayaat ketdin a pribilehio nga agkaykaysatayo nga agdaydayaw iti maymaysa a pudno a Dios a ni Jehova! ‘Katrabahuannatayo’ ken intalekna kadatayo ti sagrado ken makaispal-biag a trabaho a panangasaba ken panangisuro iti naimbag a damag ti naipasdeken a Pagarianna. (1 Cor. 3:9; Mat. 28:19, 20) Tapno maitungpaltayo daytoy a sangalubongan a trabaho nga addaan talna ken panagkaykaysa, masapul a nasayaat ti pannakaorganisartayo.​—1 Cor. 14:40.

Tulongannaka daytoy a libro tapno maawatam no kasano ti panagandar ti kongregasion Kristiano ita. Ilawlawag daytoy a libro dagiti pribilehio ken responsabilidadmo kas maysa a Saksi ni Jehova. No ipategmo dagiti pribilehiom ken aramidem dagiti responsabilidadmo, ‘tumibker ti pammatim.’​—Ara. 16:4, 5; Gal. 6:5.

Gapuna, paregtaendaka nga adalem a naimbag daytoy a libro. Kitaem no kasanom a mayaplikar dagiti impormasion. Kas pagarigan, no nabiitka pay a di bautisado nga agibumbunannag, ania dagiti masapul nga aramidem tapno agbalinka a bautisado a Saksi ni Jehova? Ngem no nabautisarankan, ania ti aramidem tapno rumang-ayka iti naespirituan ken mapalawam ti panagserbim ken Jehova? (1 Tim. 4:15) Ania ti maitulongmo tapno maadda ti talna iti kongregasion? (2 Cor. 13:11) Birokem dagiti sungbat dagitoy a saludsod iti daytoy a libro.

No maysaka a bautisado a lalaki, ania ti aramidem tapno makualipikarka nga agserbi kas ministerial nga adipen ken inton agangay kas panglakayen? Kasapulan unay dagiti kualipikado a lallaki a mangidaulo gapu ta nakaad-adu a kabbaro ti sumsumrek iti organisasion ti Dios. Tulongannaka daytoy a libro tapno maammuam no ania ti kasapulan tapno maragpatmo dagitoy a naespirituan a kalat.​—1 Tim. 3:1.

Naimpusuan nga ikarkararagmi a matulongannaka daytoy a libro tapno maammuam ti pasetmo iti urnos ni Jehova ken maipategmo dayta. Ay-ayatendaka unay ken kanayon nga ikarkararagmi a maysakanto kadagiti agnanayon a siraragsak a mangidaydayaw iti nailangitan nga Amatayo a ni Jehova.​—Sal. 37:10, 11; Isa. 65:21-25.