PASET 5

Agsublika iti ‘Pastor ken Manangaywan iti Kararuam’

Mapadpadasam kadi dagiti pakarigatan a nadakamat iti daytoy a broshur? No wen, saanka nga agmaymaysa. Adu a matalek nga adipen ti Dios idi tiempo ti Biblia ken ita ti naipasango met kadagiti kasta a pakarigatan. Tinulongan ida ni Jehova tapno mapagballigianda dagita. Manamnamam met a tulongannaka.

Madadaan ni Jehova a tumulong kenka no agsublika kenkuana

MASIGURADOM a madadaan ni Jehova a tumulong kenka no agsublika kenkuana. Tulongannaka a mangsango kadagiti problema, mangpaimbag iti nasaktan a riknam, ken maaddaan iti talna ti panunot ken rikna a resulta ti nadalus a konsiensia. Iti kasta, matignayka manen nga agserbi ken Jehova a kadua dagiti kapammatiam. Ti kasasaadmonto ket kas iti kasasaad ti dadduma a Kristiano idi umuna a siglo a sinuratan ni apostol Pedro: “Kaslakayo idi karnero a nayaw-awan, ngem nakasublikayo itan iti pastor ken manangaywan iti kararuayo.”—1 Pedro 2:25.

Ti panagsublim ken Jehova ti kasayaatan a maaramidam. Apay? Gapu ta maparagsakmo ti puso ni Jehova. (Proverbio 27:11) Kas pagaammom, adda rikna ni Jehova, isu nga adda epekto kenkuana dagiti ar-aramidentayo. Siempre, dinatayo pilpiliten a mangayat ken agserbi kenkuana. (Deuteronomio 30:19, 20) Kinuna ti maysa nga eskolar ti Biblia: “Awan ti sabali a makailukat iti pusom. Sika laeng ti makaaramid iti dayta.” No naimpusuan a dayawentayo ni Jehova, arigna lukluktantayo ti pusotayo. No kasta ti aramidentayo, mangmangtedtayo kenkuana iti nakapatpateg a sagut—ti kinamatalektayo—ket sigurado a maparagsaktayo ti pusona. Wen, awan ti makaartap iti ragsak a mariknatayo iti panangipaaytayo ken Jehova iti dayaw a maikari kenkuana.—Aramid 20:35; Apocalipsis 4:11.

Sibabara nga ab-abrasaen ti kongregasion ti nagsubli a di aktibo a kabsat

Kanayonanna, no ituloymo ti panagserbim ken Jehova, maipaay ti naespirituan a kasapulam. (Mateo 5:3) Kasano? Isalsaludsod dagiti tattao iti intero a lubong, ‘Apay nga addatayo ditoy?’ Kayatda a maammuan dagiti sungbat iti adu a saludsod maipapan iti panggep ti biag. Pinarsua ni Jehova dagiti tattao nga addaan iti kasta a tarigagay. Kayatna a naragsaktayo nga agserserbi. Awanen ti ad-adda pay a makaited kadatayo iti pannakapnek ngem iti pannakaammotayo nga agdaydayawtayo ken Jehova gapu ta ay-ayatentayo.—Salmo 63:1-5.

Laglagipem koma a kayat ni Jehova nga agsublika kenkuana. Kasanom a masigurado? Panunotem daytoy: Nabuyogan iti adu a kararag ken siaannad a naisagana daytoy a broshur. Mabalin a maysa a panglakayen wenno sabali pay a kabsat ti nangted kenka iti daytoy. Kalpasanna, natignayka a mangbasa ken mangyaplikar kadagita. Pammaneknek amin dagitoy a saannaka a linipat ni Jehova. Imbes ketdi, siaayat a tultulongannaka nga agsubli kenkuana.—Juan 6:44.

Maliwliwatayo a makaammo a saan a pulos lipaten ni Jehova ti napukaw nga adipenna. Napadasan dayta ni Donna. Kinunana: “In-inut a nayadayoak iti kinapudno, ngem masansan a mapampanunotko ti Salmo 139:23, 24: ‘O Dios, sukimatennak ket ammuem ti pusok. Usigennak ken ammuem ti madandanagan a pampanunotko. Kitaem no adda aniaman a dakes kaniak, ket iturongnak iti dalan ti kinaagnanayon.’ Ammok a saanak a maibagay iti lubong, ken ammok nga iti laeng organisasion ni Jehova ti masapul nga ayanko. Napaneknekak a saannak a pulos pinanawan ni Jehova; kasapulan laeng nga agtignayak nga agsubli kenkuana. Ket naragsakanak unay ta kasta ti inaramidko!”

“Napaneknekak a saannak a pulos pinanawan ni Jehova; kasapulan laeng nga agtignayak nga agsubli kenkuana”

Sipapasnek nga ikarkararagmi a mariknam manen “ti rag-o nga ipaay ni Jehova.” (Nehemias 8:10) Saanmonto a pulos pagbabawyan ti panagsublim kenkuana.

Sungbat Dagiti Saludsod Maipapan iti Panagsubli ken Jehova

PANGRUGIAK?

Saan a dagus a maaramid ti maysa a tao a nagsakit ti dati a rutinana. Masapul nga in-inutenna nga aramiden manen dagita. Maisubli met ti bilegmo kas Kristiano no inaldaw a mangipaunegka iti uray saggabassit laeng a naespirituan a taraon. Saanmo a panunoten a masapul a pampaminsanem nga aramiden ti amin. Nalabit sumagmamano a minuto nga agbasa wenno agdengngegka iti audio recording ti Biblia, agadal iti maysa kadagiti publikasiontayo, aglukat iti website a jw.org, wenno agbuya iti maysa kadagiti programa iti jw.org. Ikagumaam met ti makigimong iti kabiitan a panawen. Kangrunaanna, ikararagmo ken Jehova a tulongannaka. ‘Ipalladawmo kenkuana ti amin a pakadanagam, ta ipatpategnaka.’—1 Pedro 5:7.

“Idi nagbalinak a di aktibo, uray agkararag laeng kabainko payen. Ngem idi naituredko met laengen ti agkararag, adda panglakayen a bimmisita kaniak. Impariknana a saannak a binaybay-an ni Jehova. Insingasingna a kas pangrugiak, inaldaw a basaek ti Biblia. Idi inaramidko dayta, timmuredak a makigimong. Idi agangay, mangaskasabaak manen. Maragragsakanak ta saannak a binaybay-an ni Jehova.”—Eeva.

KASANONTO TI PANANGAWAT KANIAK TI KONGREGASION?

Manamnamam a sibabara nga awatendaka dagiti kakabsat iti kongregasion. Imbes a dillawen wenno husgarandaka, ipariknada ketdi nga ay-ayatendaka ken ikagumaandaka a paregtaen.—Hebreo 10:24, 25.

“Mabainak a mapan manen iti Kingdom Hall. Pampanunotek ngamin no anianto ti reaksion dagiti kakabsat. Kinunana kaniak ti maysa a baketen a kabsat nga addan iti kongregasion 30 a tawenen ti napalabas: ‘Maayatanak a makakita manen kenka, Anakko!’ Natukay ti pusok a nakangngeg iti dayta. Talaga a pasetak manen ti kongregasion.”—Javier.

“Idi nakigimongak, iti makinlikud ti nagtugawak tapno saandak a madlaw dagiti kakabsat. Ngem nabigbigdak ti adu a kakabsat a makakitkita kaniak iti gimong idi ubingak pay. Sibabara nga inawat ken inarakupdak. Talaga a limmag-an ti riknak. Kasla nakaawidak manen iti pagtaengak.”—Marco.

KASANODAKTO A TULONGAN DAGITI PANGLAKAYEN?

Tratuendaka a siaayat dagiti panglakayen. Komendarandaka ta kayatmo a maisubli a “kas idi damo ti ayatmo.” (Apocalipsis 2:4) Siaasi a tulongandaka a mangilinteg iti aniaman a nagkamaliam ket aramidenda dayta a “siaalumamay.” (Galacia 6:1; Proverbio 28:13) Mabalin nga iyurnos dagiti panglakayen nga adda mangyadal kenka. Nalabit nga adalenyo ti publikasion a kas iti Agbiagka a Naragsak iti Agnanayon! wenno Umadanika ken Jehova. Masiguradom a liwliwaen ken tulongandaka dagiti panglakayen bayat ti panagsublim.—Isaias 32:1, 2.

“Iti walo a tawen a panagbalinko a di aktibo, saan a nauma dagiti panglakayen a simmarsarungkar kaniak. Naminsan, impakita ti maysa a panglakayen dagiti retratomi. Naipalagip kaniak dagiti nakaad-adu a nararagsak a kapadasak idi agserserbiak pay ken Jehova ket kailiwko unayen dagita. Siaayat a tinulongandak dagiti panglakayen a mangisubli iti naespirituan a rutinak.”—Victor.

“Papigsaennaka”

Ti pagkantaantayo a ‘Siraragsak a Kantaantayo’ ni Jehova ket naglaon kadagiti makatukay-rikna a kanta a mangliwliwa ken mangparegta kenka bayat nga aramidem manen dagiti naespirituan nga aktibidadmo. Kas pagarigan, usigem ti liriko ti kanta numero 38. Daytoy a kanta, a naibatay kadagiti sasao a masarakan iti 1 Pedro 5:10, ket napauluan iti “Papigsaennaka.”

Ti Dios inruarnaka iti kasipngetan;

Insilnagna kenkat’ kinapudno.

Nakitanat’ nasged a tarigagaymo;

Isut’ kayatmo a maam-ammo.

Biagmo ket impaaymon kenkuana;

Manamnamam a tulongannaka.
Ti Dios intednat’ patpatgenna nga Anak;

Isut’ natay maigapu kenka.

No mismo nga Anakna ket impaayna,

Awan duadua a pabilgennaka.

Ti pammatim dina malipatan;

Saannaka pulos a baybay-an.

(KORO)

Dios ti nangsubbot kenka; kukuanaka itan.

Isut’ mangpapigsa, mangpatibker kenka.

Kanayon nga iwanwan, salaknibannaka.

Wen, papigsaen ken patibkerennaka.

Tapno mangngegmo ti nairekord a pannakakanta daytoy ken ti dadduma pay a kanta ti Pagarian, luktam ti jw.org/ilo.