Saan a Linipatan ni Jehova ni Jose

Idi adda ni Jose iti pagbaludan, nagtagtagainep ti ari ti Egipto a ni Faraon ket awan ti makailawlawag kadagita. Imbaga kenkuana ti maysa nga adipenna a maibaga ni Jose ti kaipapanan dagita isu a dagus a pinaayabanna ni Jose.

Insaludsod ni Faraon ken Jose: ‘Mailawlawagmo kadi dagiti tagtagainepko?’ Imbaga ni Jose: ‘Pito a tawen nga adunto ti makan iti Egipto, ket iti sumaruno a pito a tawen, awanto ti makan. Mangpilika iti masirib a tao nga agurnong iti makan tapno saanto nga agbisin dagiti tattaom.’ Kinuna ni Faraon: ‘Sika ti piliek! Agbalinka a maikadua a kangatuan iti Egipto!’ Kasano nga ammo ni Jose ti kaipapanan dagiti tagtagainep ni Faraon? Tinulongan ni Jehova.

Iti simmaruno a pito a tawen, nagurnong ni Jose iti makan. Idi kuan, awanen ti makan iti intero a daga, kas iti imbaga ni Jose. Napan ken Jose dagiti tattao a naggapu iti nagduduma a lugar tapno gumatang iti makan. Naammuan ni Jacob nga amana nga adda makan idiay Egipto isu nga imbaonna sadiay ti 10 nga annakna a lallaki tapno gumatang.

Napan ken Jose dagiti kakabsatna ket nailasinna ida a dagus, ngem saan a nailasin dagiti kakabsatna. Nagruknoyda kenkuana a kas iti tagtagainepna idi ubing pay. Kayat a maammuan ni Jose no madi pay laeng ti ugalida isu a kinunana: ‘Espiakayo. Kayatyo a kitaen no ania ti pagkapuyan ti nasionmi.’ Insungbatda: ‘Saan! Sangapulo ket duakami nga agkakabsat a taga-Canaan. Natayen ti maysa a kabsatmi, ket nabati ken tatangmi ti inaudi.’ Kinuna ni Jose: ‘Ipanyo kaniak ti inaudi a kabsatyo tapno mamatiak.’ Isu a nagawidda.

Idi naibus manen ti makan ti pamilia ni Jacob, imbaonna manen dagiti annakna idiay Egipto. Ngem ita, kaduadan ti inaudi a kabsatda a ni Benjamin. Kayat ni Jose a suboken dagiti kakabsatna, isu nga inlemmengna ti pirak a basona iti sako a pagikabilan ni Benjamin iti bukbukel sa imbagana a tinakaw dayta dagiti kakabsatna. Idi nakita dagiti adipen ni Jose ti baso iti sako ni Benjamin, nakigtot dagiti kakabsatna. Impakaasida ken Jose nga isuda lattan ti dusaenna imbes a ni Benjamin.

Ammo itan ni Jose a nagbalbaliwen dagiti kakabsatna. Dinan maigawid ti riknana. Bigla a nagsangit ket imbagana: ‘Siak ni Jose a kabsatyo. Sibibiag pay kadi ni Tatang?’ Napalalo ti kigtot dagiti kakabsatna. Imbagana kadakuada: ‘Dikay madanagan gapu iti inaramidyo kaniak. Imbaonnak ditoy ti Dios tapno saankayo a matay. Ita, alistuanyo, inkay alaen ni Tatang.’

Nagawidda tapno ibagada ken tatangda ti naimbag a damag ken tapno itugotda idiay Egipto. Nagkita met laengen da Jose ken ni tatangna kalpasan ti adu a tawen.