Saanda a Tinungpal ti Karida

Imbaga ni Jehova ken Moises: ‘Umulika iti bantay ket umayka kaniak. Isuratkonto dagiti bilinko kadagiti tapi a bato ket itedko kenka.’ Immuli ni Moises iti bantay ket nagyan sadiay iti 40 nga aldaw ken rabii. Idi adda sadiay ni Moises, insurat ni Jehova ti Sangapulo a Bilin iti dua a tapi a bato ket intedna kenkuana.

Idi agangay, pinanunot dagiti Israelita a pinanawan idan ni Moises. Imbagada ken Aaron: ‘Kayatmi nga adda mangidaulo kadakami. Iyaramidannakami iti dios!’ Imbaga ni Aaron: ‘Itedyo kaniak dagiti balitokyo.’ Tinunawna dagiti balitok ket nangaramid iti estatua ti bassit a baka. Kinuna dagiti tattao: ‘Daytoy nga urbon a baka ti Diostayo a nangiruar kadatayo idiay Egipto!’ Nagdaydayawda iti balitok a baka, ket nagragragsakda. Kamali kadi dayta? Wen, ta nagkarida a ni Jehova laeng ti dayawenda.

Nakita ni Jehova ti mapaspasamak, ket imbagana ken Moises: ‘Agsublika kadagiti tattao. Suksukirendak ket agdaydayawda iti ulbod a dios.’ Bimmaba ni Moises iti bantay nga awitna ti dua a tapi a bato.

Idi umas-asideg ni Moises iti ayan dagiti tattao, nangngegna nga agkankantada. Nakitana ida nga agsalsala ken agdaydayaw iti bassit a baka. Permi ti unget ni Moises. Imbarsakna iti daga ti dua a tapi ket naburak, sa dagus a dinadaelna ti estatua. Kalpasanna, insaludsodna ken Aaron: ‘Kasanodaka a nakombinsir a mangaramid iti daytoy a nakadakdakes a banag?’ Kinuna ni Aaron: ‘Dika koma agunget. Am-ammom dagitoy a tattao. Kayatda ti maaddaan iti dios, isu a tinunawko dagiti balitokda iti apuy ket daytoy nga urbon a baka ti nagbalinanna!’ Kamali dayta nga inaramid ni Aaron. Simmang-at manen ni Moises iti bantay ket impakaasina ken Jehova a pakawanenna dagiti tattao.

Pinakawan ni Jehova dagidiay naimpusuan a nagtulnog kenkuana. Makitam kadi no apay a napateg nga agtulnog dagiti Israelita iti panangidaulo ni Moises?