Nabingay ti Pagarian

Idi agdaydayaw ni Solomon ken Jehova, natalna iti Israel. Ngem nangasawa ni Solomon iti adu a babbai a naggapu iti sabali a dagdaga. Agdaydayaw dagitoy a babbai kadagiti ulbod a dios isu nga in-inut a nagbalbaliw ni Solomon, ket nagdaydayaw metten kadagiti ulbod a dios. Nakaunget ni Jehova. Imbagana ken Solomon: ‘Isinakto ti Israel iti pamiliam ket bingayekto. Itedkonto ti dakdakkel a paset iti maysa nga adipenmo, ket agturayto ti pamiliam iti basbassit a paset.’

Nalawag nga impakita ni Jehova ti desisionna iti sabali pay a pamay-an. Agbibiahe idi ti adipen ni Solomon a ni Jeroboam idi nasabatna ti propeta a ni Ahias. Pinisangpisang ni Ahias ti badona iti 12 ket imbagana ken Jeroboam: ‘Isina ni Jehova ti pagarian ti Israel iti pamilia ni Solomon ket bingayenna. Alaem ti 10 ta agarikanto iti 10 a tribu.’ Naammuan dayta ni Solomon ket kayatna a patayen ni Jeroboam! Isu a naglibas ni Jeroboam ket napan idiay Egipto. Idi agangay, natay ni Solomon ket nagbalin nga ari ti anakna a ni Rehoboam. Isu a napanunot ni Jeroboam a mabalinnan ti agsubli idiay Israel.

Imbaga dagiti lallakay ti Israel ken Rehoboam: ‘No nasingpetka kadagiti tattao, agbalindanto a matalek kenka.’ Ngem imbaga dagiti gagayyemna a kaedadna: ‘Parigatem dagiti tattao! Ikkam ida iti nadagdagsen a trabaho!’ Sinurot ni Rehoboam ti imbaga dagiti gagayyemna. Pinarigatna dagiti tattao isu a nagrebeldeda. Pinagbalinda ni Jeroboam nga ari iti sangapulo a tribu, a naawagan idi agangay iti pagarian ti Israel. Naawagan met ti dua a tribu iti pagarian ti Juda, ket nagtultuloyda a matalek ken Rehoboam. Naguduan ti 12 a tribu ti Israel.

Saan a kayat ni Jeroboam a mapan agdayaw dagiti tattaona idiay Jerusalem, nga adda iti pagarian ni Rehoboam. Ammom no apay? Mabuteng a baka panawan dagiti iturayanna ket agpaiturayda ken Rehoboam. Isu a nangaramid ni Jeroboam iti dua a balitok a bassit a baka ket imbagana kadagiti tattaona: ‘Adayo unay ti Jerusalem. Mabalinyo ti agdayaw ditoy.’ Nagdaydayaw dagiti tattao iti balitok a baka ket nalipatanda manen ni Jehova.