Uppat nga Agtutubo a Nagtulnog ken Jehova

Idi impan ni Nabucodonosor dagiti prinsipe ti Juda idiay Babilonia, impaaywanna ida iti maysa nga opisial ti palasio a ni Aspenaz. Imbilinna ken Aspenaz a birokenna dagiti kasasalun-atan ken kasisiriban kadakuada. Masanay dagitoy iti tallo a tawen tapno agbalin a nangato nga opisial ti Babilonia. Masapul a masursuro dagiti agtutubo ti agbasa, agsurat, ken agsao iti Akkadiano a lengguahe ti Babilonia. Manganda met kadagiti kankanen ti ari ken dagiti opisialna. Karaman kadagitoy nga agtutubo da Daniel, Hananias, Misael, ken Azarias. Binaliwan ni Aspenaz ti naganda idiay Babilonia iti Baltazar, Sidrak, Mesak, ken Abednego. Agsardengda kadin nga agserbi ken Jehova gapu iti dayta a pannakasanayda?

Determinado dagitoy nga agtutubo nga agtulnog ken Jehova. Ammoda a saanda a mabalin ti mangan kadagiti makan ti ari gapu ta ibilang ti Linteg ni Jehova a narugit ti dadduma kadagita. Isu nga imbagada ken Aspenaz: ‘Pangngaasim, dinakami pakpakanen iti kankanen ti ari.’ Kinuna ni Aspenaz: ‘No dikay mangan ket makita ti ari a saankayo a nasalun-at, sigurado a patayennakto!’

Adda napanunot ni Daniel. Imbagana iti agay-aywan kadakuada: ‘Pangngaasim ta nateng ken danum laeng ti itedmo kadakami iti 10 nga aldaw. Kalpasanna, ikomparanakami kadagiti agtutubo a mangmangan kadagiti kankanen ti ari.’ Inaramid dayta ti agay-aywan kadakuada.

Kalpasan ti 10 nga aldaw, nasalsalun-at ni Daniel ken ti tallo a gagayyemna ngem iti amin nga agtutubo. Naragsakan ni Jehova ta nagtulnogda kenkuana. Inikkanna pay ni Daniel iti sirib tapno maawatanna dagiti sirmata ken tagtagainep.

Idi nalpasen ti pannakasanay dagiti agtutubo, impan ida ni Aspenaz ken Nabucodonosor. Nakisarita ti ari kadakuada ket nakitana a nasirsirib ken mas alerto da Daniel, Hananias, Misael, ken Azarias ngem iti amin nga agtutubo. Pinagbalinna ida nga opisial ti palasio. Kanayon nga agpabalakad ti ari kadakuada maipapan kadagiti importante a bambanag. Pinagbalin ida ni Jehova a nasirsirib ngem iti amin a mamasirib nga adipen ti ari ken kadagiti agar-aramid iti milagro.

Uray no sabali a lugar ti ayan da Daniel, Hananias, Misael, ken Azarias, saanda a nalipatan nga adipen ida ni Jehova. Kanayon met kadi a laglagipem ni Jehova, uray no saanmo a kadua dagiti nagannakmo?