Dinalusan ni Jesus ti Templo

Napan ni Jesus idiay Jerusalem idi agarup Marso wenno Abril iti tawen 30 C.E. Adu ti napan iti siudad para iti Paskua. Paset ti selebrasion ti panagidaton kadagiti animal iti templo. Adda dagiti nangitugot kadagiti animal, adda met dagiti gimmatang idiay Jerusalem.

Idi napan ni Jesus iti templo, nakitana nga adda dagiti aglaklako iti animal sadiay. Agnegnegosioda iti mismo a balay a pagdaydayawan ken Jehova! Ania ti inaramid ni Jesus? Nangaramid iti pagbaut a tali ket pinaruarna dagiti karnero ken baka iti templo. Imbaliktadna dagiti lamisaan dagiti agsuksukat iti kuarta ken inwarana dagiti baria. Imbaga ni Jesus kadagiti aglaklako iti kalapati: ‘Ikkatenyo dagitoy! Diyo pagbalinen a lugar ti negosio ti balay ni Amak!’

Nasdaaw dagiti tattao iti templo iti inaramid ni Jesus. Nalagip dagiti adalanna ti padto maipapan iti Mesias: ‘Ipatpategkonto unay ti balay ni Jehova.’

Idi 33 C.E., dinalusan manen ni Jesus ti templo. Dina impalubos a saan a marespeto ti balay ni Amana.